konka coffee
KONKA

AMAKURU

UKWEZI

Umunyarwanda wacururizaga i Mbarara yashimuswe n’inzego z’Ubutasi za Uganda

Umunyarwanda wacururizaga i Mbarara yashimuswe n’inzego z’Ubutasi za Uganda
7-01-2018 saa 14:09' | By Akayezu Jean de Dieu | Yasomwe n'abantu 3461 | Ibitekerezo

Umunyarwanda witwa Emmanuel Cyemayire wakoreraga imirimo y’ubucuruzi mu karere ka Mbarara muri Uganda, yashimiswe n’inzego z’ubutasi muri iki gihugu (Uganda Chieftainancy of Military Intelligence -CMI), zamutwaye zimukuye iwe mu rugo kugeza n’ubu akaba atarabonerwa irengero

Bivugwa ko ahagana saa mbiri z’umugoroba wo ku itariki 4 Mutarama 2018, aribwo abasirikare batanu bakora muri uru rwego rw’iperereza rwa Uganda basanze uyu mugabo mu rugo rwe bamze baramutwara.

Itabwa muri yombi rya hato na hato ry’abanyarwanda baba muri iki gihugu ritangiye kugaragara nyuma y’igihe gito bigaragaye ko umubano w’u Rwanda na Uganda utifashe neza mu rwego rwa politike. Gusa mu mpera z’iki Cyumweru turi gusoza nibwo impande z’u Rwanda na Uganda zagiranye ibiganiro bigamije gukemura ibi bibazo biri hagati y’ibi bihugu byombi

Cyemayire yatwawe abana be babiri Patrick Cyemayire na Partine Cyemayire bareba ubwo bari iwabo mu rugo. Yajyanywe mu modoka ya Toyota Hilux y’imiryango ibiri, yerekezwa mu kigo cya gisirikare cya Mbarara.

Ikinyamakuru Virunga Post cyatangaje iyi nkuru, kivuga ko cyamenye ko Maj. Fred Mushambo ukora muri CMI muri ako gace, yari yagaragaye mu rugo rwa Cyemayire mbere y’uko ashimutwa. Gusa ngo icyo gihe ntiyahamusanze.

Cyemayire yari asanzwe akorera i Mbarara, aho afite iduka ry’ibikoresho by’ikoranabuhanga ryitwa Sanyu Electronics. Yahakoreraga guhera mu 2013, hamwe n’umugore we Yvonne Mukakalisa.

Amakuru avuga ko Cyemayire kimwe n’abandi Banyarwanda batandukanye, yari amaze igihe akurikiranwa cyane n’Umupasiteri witwa Deo Nyirigira ufite itorero AGAPE i Mbarara, uwo akaba ari umwe mu bantu bagize umutwe urwanya ubutegetsi bw’u Rwanda, RNC, uyoborwa na Kayumba Nyamwasa.

Si ubwa mbere umunyarwanda akorerwa igisa no gushimutirwa muri iki gihugu kuko mu minsi ishize, abanyarwanda batandukanye bafunzwe binyuranyije n’amategeko n’inzego zishinzwe iperereza mu gisirikare cya Uganda ku mpamvu zidasobanutse, bagakorerwa iyicarubozo bashinjwa kuba intasi z’u Rwanda.

Muri aba bafashwe ku buryo budasobanutse ndetse bakanakorerwa iyicarubozo harimo Fidele Gatsinzi, watawe muri yombi n’abantu bambaye impuzankano ya gisirikare i Kampala ku wa Gatandatu tariki ya 9 Ukuboza 2017 ndetse na Rene Rutagungira washimuswe ku itariki ya 7 Kanama akuwe ahazwi nka Bakuri mu Mujyi wa Kampala ndetse kugeza n’ubu we akaba akiri muri gereza.

Ikinyamakuru gikomeye muri Uganda, "Red Pepper", cyandika amakuru ahishura amabanga y’iki gihugu nacyo giheruka gufungwa kizira gusohora inkuru yavugaga ko perezida Yoweri Museveni yageragezaga guhirika ku butegetsi mugenzi we w’u Rwanda, Paul Kagame.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...