konka coffee
KONKA

AMAKURU

UKWEZI

Ikipe y’igihugu Amavubi iri mu mikino ya CHAN 2018 yihagazeho imbere ya Guinea Equatorial

Ikipe y’igihugu Amavubi iri mu mikino ya CHAN 2018 yihagazeho imbere ya Guinea Equatorial
20-01-2018 saa 09:22' | By Muhizi Olivier | Yasomwe n'abantu 854 | Ibitekerezo

Mu mukino wose u Rwanda rwayoboye kuva ku munota wa mbere kugeza ku munota wa nyuma, ikipe y’igihugu Amavubi yabashije kwihagararaho yegukana intsinzi nyuma yo kubona igitego kimwe cyatsinzwe na Manzi Thierry, umukino wose ukarangira ari kimwe ku busa.

Kuri uyu wa Gatanu tariki 19 Mutarama 2018, nibwo imikino yo mu itsinda C ry’imikino ya CHAN yakomezaga, nyuma y’aho Nigeria itsindiye Libya igitego kimwe ku busa, umukino w’u Rwanda na Guinea niwo wakurikiyeho. Amavubi yari yakoze impinduka aho Nshuti Domique Savio yabanje mu kibuga asimbuye Mubumbyi Barnabe wari wabanjemo mu mukino wabanje. Amavubi yatangiye asatira cyane ndetse ku munota wa 5 Savio Nshuti ahusha igitego cyari cyabazwe, ariko umuzamu wa Guinea Equatorial amubera ibamba.

Umukino wakomeje ariko ukabona Amavubi yihagazeho cyane kurusha Guinea Equatorial. Rutanga Eric wakinaga ku ruhande nawe yagoye cyane ikipe ya Guinea Equatorial n’ubwo yateraga imipira yo mu mpande cyane igapfa ubusa. Igice cya mbere cyarangiye Amavubi anganya ubusa ku busa na Guinea Equatorial.

Igice cya kabiri umutoza Antoine Hey yakoze impinduka Omborenga Fitina asimbura Iradukunda Eric maze Amavubi arushaho gusatira cyane kubera ko impande zombi zose zakoraga yaba uruhande rwa Rutanga ndetse n’uruhande rwa Ombolenga Fitina. Ku munota wa 67 umutoza yakoze impinduka Usengimana Faustin asimburwa na Hakizimana Muhadjili watangiye kujya atera amashoti ya kure ariko umuzamu wa Guinea Equatorial akaba ibamba .

Ku munota wa 79 nibwo Amavubi yabonye koruneri, Bizimana Jihad ayitera neza isanga Manzi Thierry wasimbutse neza awutera mu izamu maze igitego kiba kirinjiye abasore b’Amavubi batangira kubyina igishakamba bishimira intsinzi.

Amavubi nyuma yo kubona igitego yakomeje gusatira cyane. Ku munota wa 85 umutoza yakoze impinduka Nshuti Dominique Savio asimburwa na Nshimiyimana utagize byinshi akora, umukino urangira i Rwanda rutahanye amanota 3, ku ntsinzi y’igitego kimwe ku busa bwa Guinea Equatorial.

Muri iri tsinda C ,imibare yabaye myinshi kuko u Rwanda runganya amanota na Nigeria, ibihugu byombi bifite 4 kuri 4 naho Libya yo ifite amanota 3 mu gihe Guinea Equatorial yo ifite ubusa. Umukino utaha Amavubi azahura na Libya izaba ishaka gutsinda byanga bikunze mu gihe Amavubi n’ubwo yanganya umukino byaba bihagije kugirango akomeze. Nigeria yo izakina na Guinea Equatorial mu mukino ukurikiraho nayo isabwa kunganya na Guinea Equator igakomezanya n’izaba yarokotse hagati y’u Rwanda na Libya.

Umukino u Rwanda rwakinnye na Guinea warangije Manzi Thierry ari we ubaye umukinnyi w’uyu mukino witwaye neza kurusha abandi. Manzi Thierry si we munyarwanda wa mbere ubaye umukinnyi w’umukino kuko umukino waherukaga Bizimana Jihad yabaye umukinnyi w’umukino. Mu mibare Amavubi yarushije Guinea Equatorial cyane kuko Amavubi yo afite 58% naho Guinea Equatorial yo ni 42%.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...