konka coffee
KONKA

AMAKURU

UKWEZI

Imvugo "Ntacyo mvuze ntiteranya", icyorezo cyashyize aharindimuka imikino yo mu Rwanda

Imvugo
12-01-2018 saa 09:46' | By Muhizi Olivier | Yasomwe n'abantu 1837 | Ibitekerezo 1

Ni kenshi uzumva abakinnyi b’imikino itandukanye, abayobozi b’amakipe mu mikino itandukanye ndetse n’abafana bijujutira ibintu bavugira mu matamatama ko babangamiwe n’ibikorwa abayobozi runaka bakora kandi ari bo babatoye yewe banafite uburenganzira bwo gutanga igitekerezo bakavuga ibitagenda neza ariko bakaryumaho bakicarira ikara ryaka bati “Ntacyo mvuze ntiteranya". Ibi rero byabaye icyorezo cyatumye imikino mu Rwanda itajya itera imbere uko bikwiye.

Iyi mvugo ikomeje koreka imikino yo mu Rwanda kuburyo igejeje imikino aharindimuka, ndetse hari abagerageje kwiteranya bavuga ibitagenda mu mikino itandukanye ariko bikababyarira amazi nk’ibisusa. Nimvuga ibi, Munyandamutsa Augustin yambera umuhamya, Hadi Janvier, Ruhumuriza Abraham wasabye imbabazi nyuma akaza kugaruka mu ikipe y’igihugu y’amagare, Rudahunga Emmanuel mu magare na Muvunyi Hermas wategetswe gusaba imbabazi muri Volleyball n’abandi

Si aha gusa kuko no muyindi mikino itandukanye hari abaterwa inkunga n’impuzamashyirahamwe y’imikino ku isi baba bahagarariye hano mu Rwanda ariko ntibazigeze mu Rwanda bakazirigisa, abakinnyi badahamagarwa mu ikipe y’igihugu ku mpamvu zitumvikana neza harimo ngo "bateye uducupa tw’amazi imigeri imbere y’abayobozi" cyangwa ngo umukinnyi runaka yambuye umuyobozi amafaranga yamugurije yo kwivuza, umuyobozi nawe ati “uzasubira mu ikipe y’igihugu ntakiri umuyobozi “ ariko nyamara hari abagafashe ibyemezo bigacyemuka banga kwiteranya, ndetse bagatinya na za munyangire zishobora kubibasira nyuma yo kugaragaza ukuri kwabo.

Nta muntu ukurikirana umupira w’amaguru mu Rwanda utazi Munyandamutsa uruhare yagize mu mupira wo mu Rwanda, ikipe yakinnye igikombe cy’isi yabatarengeje imyaka 17 hari harimo abakinnyi yarereye mu ishuri rye ry’umupira w’amaguru rya SEC Academy ndetse afite n’ikipe mu cyiciro cya kabiri, amakipe yose yo mu Rwanda ayo wasanga atarimo abakinnyi barerewe mu ishuri rye ni mbarwa, ariko bamushumbushe guhagarikwa imyaka ibiri mu bikorwa bya ruhago, ndetse agacibwa amande y’ibihumbi magana atanu, byose azira imyitwarire itari myiza. kugaragaza ibitagenda neza kandi bihabwa umugisha n’abagize inama y’inteko rusange ya FERWAFA.

Mu byo yagiye agaragaza bitagenda neza hari n’ibyo yagaragaje yandikira ibaruwa umuyobozi wa FERWAFA amusaba kwegura. Tariki ya 20 Kamena 2016, nibwo Munyandamutsa yandikiye umuyobozi wa FERWAFA, Nzamwita ViNcent De Gaulle amusaba kwegura ku mirimo ye kuko ntaho abaganisha mu mupira w’amaguru.

Munyandamutsa yavuze ko iki cyemezo cyo kwandika iyi baruwa bagifashe nk’ubuyobozi bw’ikipe ya SEC babitewe n’uko bashyira amafaranga mu mupira w’amaguru ndetse binabavuna, ariko bagakomeza gusuzugurwa kugeza aho basaba raporo z’ibikorwa ndetse n’imari uko ikoreshwa, ariko ntibazihabwe. Guhagarikwa imyaka ibiri mu bikorwa bya ruhago, ndetse agacibwa ihazabu (amande) y’ibihumbi magana atanu, nibyo yahembwe ku bwo kugaragaza ibitagenda.

Si Munyandamutsa gusa kuko hari n’abakinnyi bavuga ibitagenda bagafatirwa ingamba zikaritshye. Muvunyi Cliff Hermas, umukinnyi watwaye imidali itandukanye mu marushanwa mpuzamahanga mu bafite ubumuga bakina imikino ngororamubiri (Athletics), hashize igihe yarasabye imbabazi NPC abitegetswe. Muvunyi Hermas nyuma yo kubona itike yo kujya mu mikino Paralempike yabereye i Rio de Janeiro muri Brazil, yatangiye kujya akora imyitozo, ariko n’ubwo atemeraga ko bijya mu itangazamakuru ntiyahwemye kugaragaza ko atishimiye uburyo yafashwe agereranyije n’uko ikipe y’abakobwa ya Sitting Volleyball yari ibayeho.

Abo bakobwa mu mezi ya nyuma mbere yo kujya muri Brazil babaga bacumbikiwe ahantu hamwe bitabwaho kuri buri kintu cyose bakeneye, ariko Muvunyi yakunze kuvuga ko atishimiye uburyo akora imyitozo ataha mu rugo ndetse no kubona amazi yo kunywa ari inzitizi kuri we kandi azaserukira igihugu.

Muvunyi akibona ko atishimiye uko afashwe yatangaje ko nyuma ya 2016, akiva mu mikino Paralempike azahita asezera mu mikino y’abafite ubumuga atari uko amaze kunanirwa ahubwo ari impamvu ze bwite.

Nyuma yo kuva mu mikino Paralempike nibwo yatangarije ikinyamakuru The New Times ko atigeze ategurwa ari nayo mpamvu yitwaye nabi. Nyuma yo gusoma iyo nkuru nibwo Muvunyi yahise aba nk’ugiye mu kato nawe atangira kwiheza kuko yari amaze kumenya ko ibyo yatangaje byababaje ubuyobozi bwa NPC Rwanda, nk’uko yabitangarije ikinyamakuru Izubarirashe.rw mu kiganiro bagiranye.

Ibaruwa isaba imbabazi Muvunyi yayanditse tariki ya 2 Ugushyingo 2017, ibyari biyikubiyemo byagaragazaga ko nyuma yo gutekereza akabona amakosa yakoze yahise afata icyemezo cyo gusaba imbabazi ubuyobozi bwa Komite y’Igihugu y’Imikino y’Abafite Ubumuga (NPC Rwanda), Umutoza w’ikipe y’igihugu, Minisiteri ya Siporo n’Umuco (MINISPOC), APR Athletisme Club ndetse n’abakunzi b’uyu mukino.

Mu kiganiro yagiranye n’ikinyamakuru Izubarirashe.rw, abajijwe icyatumye ategeka Muvunyi gusaba imbabazi, Umunyamabanga Mukuru wa NPC Rwanda yagize ati “Impamvu twategetse Muvunyi gusaba imbabazi Minisitiri kandi atari Minisitiri wari ushinzwe kumukurikirana umunsi ku wundi, ni uko NPC iri munsi ya MINISPOC ndetse ni umufatanyabikorwa ukomeye cyane kandi mu magambo Muvunyi yavuze ko ntacyo twamufashaga yavuzemo na MINISPOC akaba ariyo mpamvu twamubwiye kubikora muri ubwo buryo”.


Muvunyi Cliff Hermas watwaye imidali itandukanye mu marushanwa mpuzamahanga mu bafite ubumuga bakina imikino ngororamubiri

Muvunyi si we mukinnyi wa mbere ukomeye wagiranye ikibazo n’ubuyobozi bwa Komite y’Igihugu y’Imikino y’Abafite Ubumuga (NPC Rwanda) kuko na Nkundabera Jean de Dieu, Umunyarwanda wa mbere wazanye umudali wa Bronze mu mikino Paralempike yabereye i Athene mu Bugereki muri 2004 ubu ntashobora kongera gukandagira mu biro bya NPC, ndetse no mu masabukuru yose yagiye ategurwa ntaho agaragara mu gihe amafoto ye yifashishwa iyo NPC Rwanda ishaka kugaragaza ibikorwa yagezeho by’indashyikirwa. kandi hari abashobora kugira uruhare kugirango aba bakinnyi bagokeye igihugu bahabwe agaciro.

Mu magare naho hagiye havugwa ibibazo ku bakinnyi batandukanye nka Rudahunga Emmanuel we udashobora kwatura ngo avuge icyatumye azinukwa umukino w’amagare burundu ndetse bigatuma adahabwa n’agaciro kandi yaraserukiye igihugu.

Hadi Janvier yabaye kapiteni wa Team Rwanda, ariko tariki 20 Nzeri 2016 mu kiganiro yagiranye n’itangazamakuru yatangaje ko yahagaritse gukina umukino wo gusiganwa ku magare kandi yabitekerejeho neza ko ari mukuru. Yagize ati ”Nasezeye gukina umukino w’amagare burundu nzajya nyonga nkora siporo bisanzwe kandi sinahubutse kuko ku myaka 25 mfite ndakuze bihagie. Nabitekerejeho bihagije nasanze nta terambere ryanjye”.


Hadi Janvier yabaye kapiteni wa Team Rwanda

Yakomeje agira ati: "Ubundi ibyanteye gusezera ni byinshi kandi kubirondora byose byangora. Naritanze bihagije ariko nabonye ntitaweho. Yaba umutoza usanga ataranyikozaga kandi n’ubuyobozi ntibunshyigikire.”

Icyo gihe Hadi atangaza ibyo yakiniraga ikipe ya Bike Aid yo mu Budage ndetse ngo n’amafaranga ye yarazaga akajya muri Team Rwanda nyamara abajije abayobozi be hano mu Rwanda ntibamusubiza, gusa ubu uyu we yamaze gusaba imbazi ndetse yanagarutse mu mukino w’amagare.

Rudahunga Emmanuel nawe yagiye aserukira Team Rwanda hirya no hino ku isi, ndetse yanakinira ikipe ya Les Amis Sportif y’i Rwamagana ariko yaje guhagarika umukino w’amagare ndetse ntiyongera kugaragara mu bikorwa bijyanye n’umukino w’amagare yewe ntiyanafasha ikipe yaturutsemo ya Les Amis Sportif. Ubusanzwe abakinnyi b’amagare iyo basoje uyu mukino bamwe bafashwa kuba abatoza, abakanishi b’amagare cyangwa abananura imitsi y’abakinnnyi bagenzi babo ariko uyu Rudahunga we nta na kimwe yisangamo kugeza ubu.


Rudahunga Emmanuel yahagaritse burundu umukino w’amagare

Twaganiriye na Bayingana Aimable, Perezida w’ishyirahamwe ry’umukino w’amagare mu Rwanda tumubaza ku bibazo nk’ibi bigaragara mu mikino muri rusange, kuko abandi baperezida b’andi mashyirahamwe bamwe na bamwe twagerageje guhamagara telefone zabo ntiziboneke cyangwa ntibazitabe.

Mu kiganiro Bayingana yagiranye n’ikinyamakuru Ukwezi.com yatangaje ko mu gihe hari umukinnyi ugiye adasezeye neza mu mukino w’amagare batajya kumwiruka inyuma. Yagize ati: "Twebwe mu mukino w’amagare twimirije imbere gahunda y’uko uvuze ibitagenda twihatira kubikemura aho kumwigiza hirya, yego hari abagenda batatubwiye ikibajyanye nka Rudahunga Emmanuel n’abandi batandukanye ntitwajya kubiruka inyuma ngo baze tubahe imirimo nk’uko tuyiha abandi kuko n’ubundi muri iyo mirimo ashobora kongera akagaragaza imico nk’iyo yagaragaje mbere ariko uwasezeye neza natwe tumusaba ko adufasha kandi bitanga umusaruro”.

Ubusanzwe inteko rusange niyo ifatirwamo ibyemezo bitandukanye mu mashyirahamwe y’imikino atandukanye kandi abanyamuryango bagatora amategeko ndetse hakagenzurwa ibijyanye n’umutungo uko wakoreshejwe n’ibindi byose bijyanye nayo ariko mu nteko rusange usanga abayitabira bahera mu kwemera gusa hari n’ubwo bemera ibizabacisha umutwe mu minsi izakurikiraho, banga gusa kuvuga ukuri babona ngo batiteranya.

Ugasanga hari bamwe banze kuvuga ibitabanyuze muri izo nama z’inteko rusange ahubwo bakijujutira mu matatamatama ko batanyuzwe kandi inama y’inteko rusange ntacyo bayivugiramo ngo batiteranya n’umuyobozi runaka bagahitamo kuruca bakarumira ari nabyo bikurura umusaruro ugayitse uboneka mu mikino itandukanye hano mu Rwanda, hakibazwa impamvu ibintu bizamba mu mikino kuburyo n’igitamba mbuga cyabibona ariko ntibikosorwe kandi banyiri kubikosora bahari.


INKURU ZA :
Tanga Igitekerezo
Ibitekerezo 1
Muhire Seth Kuya 15-01-2018

Narinzi ko FERWAFA ariyo irimo amanyanga y’agahomamunwa gusa none ndabona ari muri sports yose mu Rwanda! Birababaje. Ibi biragaraza intege nke za Ministry y’umuco na sports kuko niyo yafasha gukemura ibi bibazo.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...