konka coffee
KONKA

AMAKURU

UKWEZI

Icyifuzo cya Perezida Kagame cyatangiye kubahirizwa mu Ntara y’Amajyaruguru –Amafoto

Icyifuzo cya Perezida Kagame cyatangiye kubahirizwa mu Ntara y’Amajyaruguru –Amafoto
22-01-2018 saa 11:53' | By Muhizi Olivier | Yasomwe n'abantu 2607 | Ibitekerezo

Nyuma y’aho Perezida Paul Kagame asabiye ko siporo ya bose izwi nka ‘Car Free Day’ yakwirakwira hirya no hino mu gihugu, mu Ntara y’Amajyaruguru batangiye gukwirakwiza iyi gahunda mu turere twose aho abaturage bahurira hamwe bagakora siporo bakanahabwa ibiganiro bijyanye n’uburyo bakwirinda ibiyobyabwenge banarinda ubuzima bwabo gufatwa n’indwara.

Kuri uyu wa Gatandatu tariki 20 Mutarama 2018, abaturage b’Intara y’Amajyaruguru by’umwihariko abatuye mu karere ka Rulindo barangajwe imbere n’abayobozi barimo Minisitiri w’Umuco na Siporo, Uwacu Julienne, Guverineri w’Intara y’Amajyaruguru, Gatabazi Jean Marie Vianney ndetse n’abandi bayobozi bakoze iyi siporo rusange, habaho n’igikorwa cyo gupima abaturage indwara zitandukanye banahabwa impanuro n’aba bayobozi.

Mu rugendo rungana na kilometer 4.5 ruva Nyirangarama rukagera ku musozi w’i Tare, Minisitiri Uwacu na Guverineri Gatabazi bifatanyije n’abaturage barimo abakuze n’abato baturutse mu turere twa Musanze, Burera, Gicumbi na Rulindo, bazamuka umusozi utoroshye na gato, ibintu abitabiriye batashye bashimye cyane.

Umwe mu baturage bo mu karere ka Rulindo wanagize uruhare runini muri iki gikorwa, Sina Gerard aho yatanze amazi abantu bifashishije, nawe yijeje itangazamakuru ko azakomeza gufasha abifuza guhatana.

Ati "Ni ukuri ndanezerewe cyane kubona abantu bakuru baje bafatanya n’abakiri bato kandi wabonyeko n’ubuyobozi budushyigikiye twebwe ubwo twabuzwa n’iki koko kwitabira? Ngira ngo mwumvishe uko Minisitiri yatubwiye n’ibyo yadusabye ndabizeza ko mu minsi ya vuba muzatangira kubona abantu bazaserukira igihugu baturutse mu karere ka Rulindo kandi vuba cyane rwose kuko dutuye ahantu heza hari imisozi n’amahirwe tugomba kubyaza umusaruro . "

Guverineri Gatabazi asabana n’abitabiriye iyi siporo

Guverineri w’Intara y’Amajyaruguru Gatabazi JMV yasabye abaturage kubyaza amahirwe Perezida Kagame yabahaye ndetse akaba ari n’umukunzi wa siporo wakataraboneka.

Yagize ati "Buriya Perezida wacu akunda siporo ku buryo budasanzwe mureke tubyaze amahirwe dufite yo kuba akunda siporo yaduha icyo twamusaba cyose igihe tubashije kugira icyo tugeraho mu mikino , uretse kugira ubuzima bwiza twanayibyaza amafaranga. Ndashimira cyane abakecuru n’abasaza bitabiriye iyi siporo natwe tuzakomeza kubaba inyuma tuzi ko muri abantu bakunda gukora n’ibi ntibizabananiza cyane."

Mu butumwa yageneye abari bitabiriye iyi siporo, Minisitiri Uwacu Yagize Ati”Mwebwe mugira amahirwe yo kuba mwaravukiye ahantu hateye uku hari imisozi muhakorera imirimo yanyu ya burimunsi murahamenyereye muhabyaze umusaruro ,siporo wayibyaza amafaranga ,ukaba icyamamare ugahesha n’ishema igihugu cyacu ,kandi n’ibintu byoroshye mubitegure neza natwe tuzabafasha ibyo muzakenera byose ubundi ubutaha mu marushanwa tuzabone umuntu wa mbere akomoka i Rulindo“.

Nk’uko bisanzwe bikorwa no muri siporo ikorerwa i Kigali abitabiriye iyi siporo bapimwe indwara zitandukanye. Intara y’Amajyaruguru niyo ibaye iya mbere mu gukwirakwiza iyi siporo mu turere hafi ya twose tuyigize .


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...