konka coffee
KONKA

AMAKURU

UKWEZI
ubumwe

APR FC iri mu mazi abira aho ishobora guta ingata n’ikibindi, ikabura intama n’ibyuma

APR FC iri mu mazi abira aho ishobora guta ingata n’ikibindi, ikabura intama n’ibyuma
14-06-2019 saa 11:12' | By Muhizi Olivier | Yasomwe n'abantu 6690 | Ibitekerezo 3

Mu Kinyarwanda baca umugani bagira bati "Runaka yataye ingata n’ikibindi", bashaka kumvikanisha ko ibyo yashakaga byose nta na kimwe abonye. Ikipe y’ingabo z’igihugu mu Rwanda, APR FC bakunda kwita Gitinyiro, Nyamukandagira mu kibuga kikarasa imitutu, ubu iri mu mazi abira kuko yamaze kubura igikombe cya shampiyona ya 2018-2019 kandi aho bigeze ishobora no kubura igikombe cy’Amahoro cya 2019, ibyo gusohokera igihugu bikayirangirana n’ubwo abafana b’ikipe y’abakeba Rayon Sports bakunda kuvuga ko n’iyo igiye ntacyo ibasha gukorayo (Star à Domicile).

Ntibisanzwe bimenyerewe ko APR FC itsindwa imikino 2 ya shampiyona yikurikiranya ndetse igatsindwa n’amakipe ari inyuma ku rutonde rusange. APR FC yatsinzwe na Muhanga FC ibitego 2 kuri 1. umukino wakurikiyeho yatsinzwe na Espoir FC ibitego 2 kuri 1, ibintu bidasanzwe bimenyerewe muri iyi kipe ndetse n’ikipe yo mu cyiciro cya 2 ya Rwamagana City yatsinze APR FC mu mikino y’igikombe cy’amahoro n’ubwo iyi kipe y’ingabo yabashije gukomeza ariko ubu ibintu ntibyifashe neza kuko na AS Kigali yayitsinze mu mukino ubanza wa 1/8 cy’igikombe cy’amahoro.

Ni iki cyabaye muri APR FC cyatumye isubira inyuma bigaragara ?

APR FC yayoboye urutonde rwa shampiyona ya 2018-2019 igihe kinini, kugeza igihe Rayon Sports yakuyemo ikinyuranyo cy’amanota 14 nayo iyobora urutonde kugeza ubwo yegukana igikombe cya shampiyona habura ukumukino umwe ngo shampiyona irangire. Tugiye kurebera hamwe bimwe mu byatumye APR FC isubira inyuma.

1. Guhuzagurika mu by’abatoza

Jimmy Mulisa yamaze amezi atatu atoza APR FC ndetse anatangira shampiyona atoza APR FC, no mu mikino mpuzamahanga niwe wayitoje. Mbere y’uko Zlatko Krmpotić aza muri APR FC muri Gashyantare 2019, yayisanze ku mwanya wa mbere.

Zlatko Krmpotić, akigera muri APR FC byavuzwe ko hari abakinnyi batumvikanye na we barimo Iranzi Jean Claude na Bigirimana Issa, nyamara aba bakaba bari mu bakinnyi bakundaga gufasha APR FC kubona intsinzi. Byaravuzwe kandi ko hari n’abakinnyi batishimiye umutoza mukuru bituma umusaruro wa APR FC ugenda ugabanuka kugeza itakaje igikombe cya shampiyona. Uyu mutoza yumvikanye abwira abafana ko niba bamwanga nabo abanga.

Zlatko Krmpotić yaje gutoza APR FC iri ku mwanya wambere muri Gashyantare uyu mwaka

Jimmy Mulisa yatozaga APR FC ndetse iri ku mwanya wa mbere Zlatko Krmpotić ataraza ngo Jimmy Mulisa amwungirize

2. Abakinnyi APR FC yaguze ntacyo bayimariye muri iyi shampiyona irangiye

APR FC yatakaje abakinnyi 2 mu bari bayihesheje shampiyona ya 2017-2018 aribo Bizimana Djihad na Nsabimana Aimable. Mu gusimbuza aba bakinnyi ubuyobozi bwa APR FC bwaguze abakinnyi ba 6 aribo Ally Niyonzima, Ntwari Evode, Nsengiyumva Moustapha ,Nizeyimana Mirafa, Danny Usengimana na Nshuti Innocent.

Muri aba bakinnyi APR FC yaguze abenshi ntibakandagira mu kibuga na Nizeyimana Mirafa, Nsengiyumva Moustapha nabo bakina imikino imwe n’imwe uretse Ally Niyonzima ukunda kubanza mu kibuga inshuro nyinshi, mu bwugarizi bwa APR FC naho hakunze kugaragara ikibazo cyane.

Nshuti Innocent na Danny Usengimana bagarutse mu Rwanda bavuye gukina muri Tunisia ariko nta kinini bafashije APR FC

3.Guhindagura abakinnyi babanza mu kibuga bya hato na hato

APR FC irangije umwaka wa shampiyona itagira ikipe imwe ibanza mu kibuga kuko bahoraga bahindagura ikipe bigatuma abakinnyi batamenyerana neza ngo bahuze umukino.

Mu bakinnyi APR FC ikunda gukoresha, abakinnyi 7 nibo badakunda guhinduka mu babanza mu kibuga. Abo ni Kimenyi Yves, Buregeya Prince, Rugwiro Hervé, Rusheshangoga Michel, Mugiraneza Jean Baptiste Migi, Muhadjiri Hakizimana na Imanishimwe Emmanuel, mu gihe abandi bahindagurika kuri buri mukino.

Muri uyu mwaka w’imikono wa 2019, APR FC isigaje amahirwe mu gikombe cy’Amahoro gusa ndetse na CECAFA Kagame Cup ariko nabwo imikinire y’iyi kipe ntabwo iha abakunzi bayo icyizere cy’uko yazabasha kucyegukana.

CECAFA Kagame Cup iterwa inkunga n’umukuru w’igihugu Paul Kagame ndetse ikaba izanabera mu Rwanda ku matariki ya 26 Nyakanga kugera tariki 10 Kanama 2019.

Guhinduranya abakinnyi babanza mu kibuga bishobora kuba biri mu byatumye APR FC itakaza igikombe

Abakinnyi barindwi muri 11 banza mu kibuga nibo badakunda guhindagurika

Uko bisanzwe APR FC iba isabwa gutwara buri gikombe gikinirwa mu Rwanda uyu mwaka bishobora kwanga ntigire na kimwe itwara

Ubusanzwe bimenyerewe ko APR FC iba ishaka gutwara buri gikombe cyose gikinirwa ku butaka bw’u Rwanda ariko uyu mwaka yabuze igikombe cya Shampiyona, hasigaye igikombe cy’Amahoro hakiyongeraho na CECAFA gusa bishobora kurangira ibuze intama n’ibyuma ikabura ibi bikombe byose. Ibi dore impamvu bishoboka cyane cyane ku gikombe cy’Amahoro:

1.Rayon Sports iri mu zihanganira ibikombe na APR FC ifite morale iruta kure iya APR FC

Guhera mu bafana kugeza mu bakinnyi Rayon Sports ifite morale iri hejuru kurusha iyo abakinnyi n’abafana ba APR FC bafite. Ibi byagaragaye ku mukino APR FC yatsinzwemo na Espoir FC ibitego 2 kuri 1 kuwa Gatandatu tariki 25 Gicurasi 2019 aho abafana ba APR FC bari bari ku kibuga bari mbarwa.

Uku gucika intege ku bafana ba APR FC gushobora kuyikoraho no mu mikino yo mu gikombe cy’Amahoro mu gihe ntabyaba bihindutse mu ikipe dore ko nta bakinnyi baziyongera kubo yakinishije muri shampiyona. Abakinnyi nabo batakaje morale, ibi byagaragaye nko ku mukino APR FC yatsinzwemo na Rwamagana City mu gikombe cy’Amahoro kongeraho n’abakinnyi bivugwa ko badacana uwaka n’umutoza.

Morale muri APR FC ni uku ihagaze mubakinnyi

2. Ubusatirizi bwa Rayon Sports buratyaye cyane kurusha ubwa APR FC

Ubusatirizi bwa Rayon Sports buratyaye cyane kurusha ubwa mukeba wayo kuko uteranyije ibitego abataka ba Rayon batsinze biruta kure ibyo aba APR bafite. Ulimwengu Jules na Michael Sarpong bose hamwe bafite ibitego 35 naho Hakizimana Muhadjiri na Byiringiro Lague bafite ibitego 23, bivuga ko harimo ikinyuranyo cy’ibitego 12. Abakinnyi Rayon Sports yakoresheje muri Shampiyona ninabo izakoresha ikina igikombe cy’Amahoro bo bazamuye urwego mugihe aba APR FC basa n’abatakaje icyizere .

Ubusatirizi bwa APR FC buyobowe na Muhadjiri Hakizimana mu gihe ubwa Rayon Sports buyobowe na Ulimwengu Jule na Michael Sarpong

3 .APR FC irimo kwitwara nabi mu mikino ya mbere y’igikombe cy’Amahoro mu buryo bugaragara

Mu mikino 3 APR FC imaze gukina imaze gutsinda umwe itsindwa imikino 2, ibintu bitamenyerewe dore ko harimo n’umukino yatsinzwe n’ikipe ya Rwamagana City yo mu cyiciro cya kabiri yabashije kuyibonamo igitego kimwe ku busa, kongeraho n’umukino yatsinzwe na AS Kigali mu mukino ubanza.

Ukurikije uko APR FC yasoje shampiyona ndetse n’uko irimo kwitwara muri iyi mikino ibanza y’igikombe cy’Amahoro yaguha ishusho y’uko iyi kipe izitwara mu gikombe cy’Amahoro no mu marushanwa ya CECAFA Kagame cup izabera i Kigali .

Abakinnyi bamwe mu bakuru muri APR FC bazarangiza amasezerano uyu mwaka ndetse byatangiye kuvugwa ko hari abazajya mu makipe yo hanze y’igihugu ndetse hari n’abamaze kugenda barimo Issa Bigirimana na Hakizimana Muhdjili bishoboka ko ari mu nzira agenda nk’uko bivugwa.


INKURU ZA :
Tanga Igitekerezo
Ibitekerezo 3
Manzi Kuya 15-06-2019

TURASABA UBUYOBOZI BWA APR FC KONTARIKI 4/7 BUZATWARA ABAKINNYI BOSE KU MULINDI WI NTWARI AHO APRFC YAVUKIYE.BAKABWIRA ABAKINNYI AMATEKA YA EWUIPE KUKO BAKINA NKA BANCASHURO.MURAKOZE

Manzi Kuya 15-06-2019

TURASABA UBUYOBOZI BWA APR FC KONTARIKI 4/7 BUZATWARA ABAKINNYI BOSE KU MULINDI WI NTWARI AHO APRFC YAVUKIYE.BAKABWIRA ABAKINNYI AMATEKA YA EWUIPE KUKO BAKINA NKA BANCASHURO.MURAKOZE

Manzi Kuya 15-06-2019

TURASABA UBUYOBOZI BWA APR FC KONTARIKI 4/7 BUZATWARA ABAKINNYI BOSE KU MULINDI WI NTWARI AHO APRFC YAVUKIYE.BAKABWIRA ABAKINNYI AMATEKA YA EWUIPE KUKO BAKINA NKA BANCASHURO.MURAKOZE

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...