AMAKURU

UKWEZI
cheno 2020

AS Muhanga yahawe igisubizo kirambye ku bibazo by’ubukene bwavugwagamo

AS Muhanga yahawe igisubizo kirambye ku bibazo by’ubukene bwavugwagamo
7-03-2020 saa 13:53' | By Twagirayezu Vincent | Yasomwe n'abantu 1059 | Ibitekerezo 1

Nyuma y’ibibazo bikomeje kuvugwa mu ikipe ya AS Muhanga byashoboraga gutuma isezera mu mikino y’icyiciro cya mbere muri uyu mwaka w’imikino wa 2019-2020 itarangiye, ubuyobozi bw’akarere ka Muhanga bwatanze igisubizo kigiye gutuma ibibazo byose by’iyi kipe bikemuka burundu.

Mu ntangiriro z’uku kwezi nibwo ubuyobozi bw’iyi kipe yo mu karere ka Muhanga bwandikiye umuyobozi w’akarere bumumenyesha imibereho y’ikipe n’abakinnyi bayo itameze neza bunagaragazamo uruhuri rw’ibibazo iyi kipe ifite ari nabyo biri gutuma ititwara neza mu mikino yo kwishyura ya shampiyona nk’uko yari yabikoze mu mikino ibanza.

Ubuyobozi bw’iyi kipe bwagaragaje ko bwugarijwe n’ubukene aho bwagaragaje ko nibura kugirango ibibazo ifite bikemuke hakenewe asaga miliyoni 96 z’amafaranga y’u Rwanda.

Muri izi miliyoni zisaga 96 ikipe yatangaje ko hagomba kwishyurwa ibirarane by’amezi 2 ifitiye abakinnyi bingana na 9,850,000frw, amafaranga yo gusinyisha abakinnyi (Recruitement) angana na 6,000,000frw batabahaye ndetse n’amafaranga yo kongerera abakinnyi amasezerano kuri ubu bayasoje mu kwezi k’Ukuboza 2019 angana na 6,500,000frw.

Iyi kipe kandi nk’uko yakomeje ibigaragaza ikeneye kwishyura umwenda ibereyemo perezida wayo wayigurije 22,723,000frw, kwishyura umwenda ifitiye umukozi utekera abakinnyi hamwe na Pharmacy ibaha imiti agera kuri 1,360,000frw hanyuma ukongeraho na 25,200,000frw kugirango ikipe ibashe gusoza umwaka wa shampiyona neza, yose hamwe wayateranya akangana na 96,833,000frw.

Mu gutanga igisubizo kuri ibi bibazo by’iyi kipe, umuyobozi w’akarere ka Muhanga, Madame Kayitare Jacqueline yavuze ko akarere n’ubuyobozi bw’intara bicaye kakayishakira igisubizo kirambye binyuriye kuyegurira ibirombe by’amabuye y’agaciro ikajya ibicukura igakora ubucuruzi bubyara inyungu aho gukomeza kujya ihabwa amafaranga ikoresha agahita ashira.

Yagize ati “Icyagaragaye ni uko AS Muhanga yahabwaga amafaranga kashi ariko noneho hatekerejwe uburyo yahabwa ubushobozi bubyara amafaranga. Twarebye rero ibintu bitandukanye dushobora kubonamo ubushobozi AS Muhanga yakoresha dusanga mu mutungo kamere dufite haba mu karere kacu ndetse n’ahandi hatandukanye tuzajya tubakomangira ari uburyo bwo kubashakira ubushobozi bushingiye ku gucukura kariyeri (amabuye y’agaciro)… kugirango bashobore kubona amafaranga abyara andi aho kugira ngo tujye tubaha amafaranga ashire ahubwo tubahe inkunga twabageneye ariko tubahe n’igishoro baheraho nabo bakagira icyo bageraho.”

Kayitare Jacqueline yakomeje avuga ko nk’akarere bemereye iyi kipe kubakorera ubuvugizi mu mabanki kugirango ashobore kubaha amafaranga yo gukoresha muri iyi minsi ya shampiyona isigaye hanyuma akarere kakazabashakira ingengo y’imari umwaka utaha iza ikishyura ayo mafaranga bakeneye ku buryo bwihuse.

Umuyobozi w’akarere ka Muhanga kandi yavuze ko bari gukorera ubuvugizi ikipe ya AS Muhanga mu bigo bitandukanye ndetse ngo ubu akarere hari ibiganiro kari kugirana n’abantu batandukanye mu kuyishakira abaterankunga.

Ikipe ya AS Muhanga iri mu bibazo by’ubukene biri gutuma ititwara neza muri shampiyona


INKURU ZA :
Tanga Igitekerezo
Ibitekerezo 1
EMMANUEL MINANI Kuya 8-03-2020

Ark nge ndibza nkayoberwa. n’iyihe kipe yambere murwanda ifite abakinnyi barengeje imyaka 50?

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...