AMAKURU

UKWEZI
pax

Aba-Rayon bongeye kunga ubumwe ! Intandaro y’umwuka mubi umaze igihe muri Rayon Sports

Aba-Rayon bongeye kunga ubumwe ! Intandaro y’umwuka mubi umaze igihe muri Rayon Sports
8-07-2020 saa 14:41' | By Akayezu Jean de Dieu | Yasomwe n'abantu 5734 | Ibitekerezo

Umuvugizi w’Ikipe ya Rayon Sports, Nkurunziza Jean Paul yavuze ko ibibazo iyi kipe imazemo iminsi byamaze gukemuka ndetse kuri ubu Aba-Rayon bamaze kunga ubumwe kandi umwuka ari mwiza mu ikipe.

Muri Gicurasi uyu mwaka, inkuru zivuga kuri Rayon Sports zabaye nyinshi by’umwihariko izigaruka ku mwuka mubi wari imbere mu buyobozi, abafana ndetse n’abagize umuryango mugari wa Rayon Sports.

Ni ibibazo ubuyobozi bw’iyi kipe buvuga ko byakomotse ku mikoro cyane ko nta bundi buryo bwo kwinjiza amafaranga bwari buhari mu gihe imikino yari yarahagaritswe kubera icyorezo cya COVID19.

Mu kiganiro na UKWEZI, yavuze ko kuri ubu ibibazo birimo iby’amikoro byakemutse ahanini binyuze mu masezerano bagirana n’abaterankunga barimo Skol ndetse n’uburyo abafana bishakamo ibisubizo binyuze mu bukangurambaga bise ‘Ubururu bwacu, Agaciro kacu’.

Ati “Ibibazo byose byararangiye navuga ko ubu Aba-Rayon turi hamwe ku kigero gishimishije [99%], ni nayo mpamvu ubwo bukangurambaga buri gukunda ari nayo mpamvu turi kugura abakinnyi nta kibazo cy’amafaranga dufite.”

Yakomeje agira ati “Aba-Rayon iyo twashyize hamwe ntabwo twabura amafaranga, ntabwo twananirwa kwigurira abakinnyi. Ibibazo byose twarabikemuye navuga ko nta kindi kibazo kiri muri Rayon Sports.”

Reba hano ikiganiro n’Umuvugizi wa Rayon Sports….

Ihuriro ry’amatsinda y’abafana ba Rayon Sports (Fan base) yabaye ku wa Gatatu tariki ya 27 Gicurasi 2020, ryatangaje ko batakarije icyizere Komite ya Rayon Sports iyobowe na Sadate Munyakazi.

Ku wa 29 Gicurasi, nibwo Urwego rw’Igihugu rw’Imiyoborere (RGB) rwatangaje ko Munyakazi Sadate ari we uhagarariye Rayon Sports mu mategeko.

Nkurunziza yavuze ko ibyakorwaga n’abantu batandukanye ari nabyo byazanaga umwuka utari mwiza muri iyi kipe akenshi babiterwaga na rwa rukundo bayifitiye.

Ati “Njye mvuga ko abantu bose ibyo bakoraga byabaga bishingiye ku rukundo bafitiye Rayon Sports. Buri wese ku rwego rwe rw’uburyo akunda ikipe akumva ko ibyo ari gukora biri mu nzira za nyazo akumva ko ibyo ari gukora bishobora gutuma ikipe iba nziza ikagira ibihe byiza.”

Nkurunziza yavuze kandi ko hari n’abagera mu buyobozi bwa Rayon Sports bakumva ko badahari ikipe itabaho, ni ibintu ahuza n’urukundo rwinshi baba bayifitiye ariko bakibagirwa ko ubwo bazaba basimbuwe ikipe izakomeza kubaho.

Ibi avuga ko inama bagiriwe n’inzego za Leta bazishyize mu bikorwa ari nayo mpamvu umwuka mwiza, urukundo no guhuza byagarutse mu ikipe ya Rayon Sports.
Reba hano ikiganiro n’Umuvugizi wa Rayon Sports….


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA