AMAKURU

UKWEZI
pax

Jeannot Witakenge wakiniye amakipe atandukanye mu Rwanda yapfuye

Jeannot Witakenge wakiniye amakipe atandukanye mu Rwanda yapfuye
25-04-2020 saa 13:11' | By Nsanzimana Ernest | Yasomwe n'abantu 1328 | Ibitekerezo

Umunyekongo wakiniye amakipe arimo Espoir, Rayon Sports na APR FC yitabye Imana ejo aguye mu bitaro by’I Bukavu. Uyu mugabo wari mu kigero cy’imyaka 50 y’amavuko, yari anafite ubwenegihugu bw’u Rwanda nyuma yo kuhakinira igihe kinini no gukinira ikipe y’igihugu Amavubi.

GORILLA GAMES

Ari mu bakinnyi bakina hagati baranze umupira w’amaguru mu Rwanda kuva mu myaka ya 1990 kugeza ahagaritse gukina.

Jean Paul Nkurunziza umuvugizi wa Rayon Sports ikipe Witakenge yakiniye mu bihe bitandukanye kuva mu 1990 kugeza mu 2004 - yabwiye BBC ko amakuru y’urupfu rwa Witakenge bayabwiwe n’abari bamurwaje, barimo uwo bakinanye Mbusa Kombi Billy nawe wakinnye muri Rayon.

Umwaka ushize nibwo byamenyekanye ko Jeannot Witakenge yarwaye cancer y’igifu, akaba yavurirwaga i Bukavu, ahaba kandi umuryango we.

Nkurunziza avuga ko icyo gihe ikipe ya Rayon Sports n’abafana bayo bakusanyije ubufasha bakabumwoherereza ngo avurwe.

Ati : "Ni umuntu dufata nk’umunyabigwi wacu, nta mukinnyi urageza ku rwego nk’urwe mu bakina hagati. Usibye ibyo yakoreye ikipe, twibuka ko nko mu 2000 hari igihe abakinnyi bigeze kubura tugiye gukina na Kibuye FC, ubwe arahaguruka ashakisha abakinnyi bakina ari barindwi. Uwo mukino waje no gusubikwa ugeze hagati ariko ntitwaterwa mpaga nk’uko byari bigiye kuba. Tumufata nk’umuntu witangiye ikipe ari umukinnyi, ni umuntu dufata nk’umwe mu bakinnyi b’ibihe byose Rayon Sport yagize"

Jeannot Witakenge yageze muri Rayon Sports mu myaka ya 1990 avuye muri Espoir FC yabaga mu cyahoze ari Cyangugu, mu 1994 haba Jenoside mu Rwanda yagiye gukina muri Inter Stars y’i Burundi.

Yagarutse muri Rayon Sports mu 1996, amateka yerekana ko yatwaranye n’iyi kipe ibikombe bya shampiyona ya 1997, 1998, 2002 na 2004.

Witakenge yari mu ikipe ya Rayon Sports yo mu 1998 yatwaye igikombe cya CECAFA, igikuye Zanzibar.

Yatwaye ibikombe bya shampiyona kandi bya 2006 na 2007 akinira APR FC.

Witakenge yavuze muri APR FC mu 2009 ajya gukina muri St-Éloi Lupopo aho yanasoreje ibyo gukina agatangira gutoza.

Mu 2018 yagizwe umutoza wari wungirije Olivier Karekezi nyuma n’umubiligi Ivan Minnaert muri Rayon Sports, uyu mutoza mukuru amaze gusezererwa Witakenge yatoje Rayon amezi abiri nk’umutoza mukuru.

Nkurunziza avuga ko nubwo Witakenge atahiriwe n’urugendo rw’ubutoza, ariko Rayon Sports imufata nk’umuntu wagiriye akamaro cyane iyi kipe.

Avuga ko komite y’ikipe ya Rayon Sports iza kuganira uko yafatanya n’abafana bayo bagafasha umuryango wa Witakenge muri ibi byago.

BBC


INKURU ZA :
Tanga Igitekerezo
Ibitekerezo
canal Rwanda
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...