AMAKURU

UKWEZI
pax

Rayon Sports yabonye umuyobozi mushya

Rayon Sports yabonye umuyobozi mushya
24-10-2020 saa 16:24' | By UKWEZI | Yasomwe n'abantu 2186 | Ibitekerezo 1

Ikipe ya Rayon Sports izwiho kugira abafana benshi mu Rwanda ndetse no mu Karere ka Afurika y’Uburasirazuba muri rusange yabonye umuyobozi mushya nyuma y’igihe yari imaze ifite ubuyobozi bw’inziibacyuho burangajwe imbere na Murenzi Abdallah.

Uwayezu Jean Fidèle niwe watorewe kuyobora iyi kipe mu matora yabaye kuri uyu wa Gatandatu tariki 24 Ukwakira 2020.

Uyu mugabo w’imyaka 54 akomoka i Nyanza, yatorewe kuyobora Umuryango Rayon Sports mu myaka ine iri imbere, ahigitse Bizimana Slyvestre bari bahanganiye uyu mwanya, ariko we akaba atitabiriye amatora kubera ko ari Umudivantisite w’umunsi wa karindwi.

Uwayezu asanzwe ari umuyobozi w’ikigo cyigenga gicunga umutekano w’abantu n’ibintu kinyamwuga, cya RGL Security Company.

Ku mwanya wa Visi Perezida wa Mbere, hiyamamaje Mushimire Jean Claude wahoze akuriye imishinga muri manda ebyiri ziheruka muri Rayon Sports ndetse na Kayisire Jacques wakiniye Rayon Sports nyuma gato ya Jenoside yakorewe Abatutsi mu 1994.

Ngoga Roger Aimable yiyamamaje nk’umukandida rukumbi ku mwanya wa Visi Perezida wa kabiri naho Ndahiro Olivier yiyamamaza nk’Umubitsi.

Iyi Nteko Rusange ya Rayon Sports idasanzwe yatangiye nyuma y’iminota 36 ku i saa tatu yari yatangajwe mbere ndetse abayitabiriye babanza kwamburwa telefoni ngendanwa kugira ngo ibiganirwa bigume hagati yabo.

Amatora ya Komite Nyobozi yabanjirijwe n’ayo kwemeza amategeko shingiro mashya azagenderwaho n’uyu Muryango.

Iyi nama y’Inteko Rusange idasanzwe yemeje ko abanyamuryango nyakuri ba Rayon Sports ari Fan Club 45 zasinye ku mategeko shingiro yatowe, kongeraho izindi zizavuka nyuma, aho buri imwe igomba kuba byibuze igizwe n’abantu 30, buri umwe akajya itanga byibuze umusanzu ungana na 2000 Frw ku kwezi. Utabikoze mu gihe kingana n’amezi atatu azajya atakaza ubunyamuryango.

Ku bijyanye no kuba RGB yari yagarageje ko Gikundiro Forever ifite ubuzima gatozi, bigatuma Rayon Sports isa nk’aho ari impuzamiryango, hemejwe ko nta Fan Club igomba kugira ubuzima gatozi.

Uwayezu yahoze ari Umusirikare mu Ngabo z’u Rwanda ndetse yahawe umudali wo kubohora igihugu.

Mu 2011, yiyamamarije kuba Umusenateri aturutse mu Ntara y’Amajyepfo gusa ntiyahirwa. Icyo gihe yari ashyize imbere amahoro n’umutekano nk’ishingiro ry’iterambere n’uburumbuke by’u Rwanda.


INKURU ZA :
Tanga Igitekerezo
Ibitekerezo 1
EV MUNEZA Kuya 24-10-2020

twishimiye ko RAYON ibonye ubuyobozi nibyiza igisigaye nuko abayiyoboye kuvakera nabo badakwiye gutererana nyobozi nshyashya bakwiye guhana imirongo ngenderwaho hagamijwe kuzahura ubuzima bw,ikipe.

IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA