konka coffee
KONKA

AMAKURU

UKWEZI
Minijust

Rayon Sports yatsinze AS Muhanga, mu gutangiza ubukangurambaga bwo kurwanya ugutwita mu bangavu [AMAFOTO]

Rayon Sports yatsinze AS Muhanga, mu gutangiza ubukangurambaga bwo kurwanya ugutwita mu bangavu [AMAFOTO]
15-02-2019 saa 18:26' | By Nsanzimana Ernest | Yasomwe n'abantu 2402 | Ibitekerezo

Uyu mukino wabereye kuri sitade y’ akarere ka Nyanza kuri uyu wa Gatanu tariki 15 Gashyantare 2019 witabirwa n’ abayobozi batandukanye basabye ababyeyi kuba hafi y’ abana babo bakajya babagira inama z’ uko bakwiye kwitwara kugira ngo badaterwa inda.

Umuyobozi w’ Intara y’ Amajyepfo CG Emmanuel Gasana yasabye urubyiruko kugira intego kuko ngo iyo umuntu afite intego atishora mu biyobyabwenge ntaniyandarike bikamurinda kuba yatera cyangwa yaterwa inda atateguye.


Guverineri w’ Intara y’ Amagepfo yibukije ko umuntu uhamijwe icyaha cyo gusambanya umwana utarageza ku myaka 18 ahanishwa imyaka 25 y’ igifungo

Minisitiri w’ Urubyiruko Rosemary Mbabazi nawe warebye uyu mukino wa gishuti Rayon Sports yatsinzemo 2 ku busa bwa AS Muhanga yavuze ko inda zitateguwe mu bangavu ziterwa no kutagira amakuru ahagije, ubukene n’ ibishuko ariko yongeraho ko ibyo byose Leta y’ u Rwanda itazabyihanganira.


Minisitiri Rosemary Mbabazi yavuze ko abana b’ abakobwa baterwa inda n’ urungano rwabo hakiyongeraho n’ abantu bakuze, babashukisha rifuti, ibicuruzwa.

Ati "Ni ikibazo gikomeye kuko umubyeyi yakagombye kurinda umwana we ikintu cyose cyamwangiza. Nibidakorwa mu muryango ngo umuntu yumve ari inshingano ye amategeko azaza ashyire mu bikorwa ibimugenewe"

Uyu mukino witabiriwe n’ abantu benshi cyane biganjemo urubyiruko rwo mu karere ka Nyanza aho Rayon Sports ivuka.

Abarebye uyu mukino babwiye UKWEZI ko ari abasore n’ abagabo bose bagira uruhare mu gutera abangavu inda. Bavuga ko ababyeyi bakwiye kugira uruhare mu kurinda abana b’ abakobwa gutwita ariko kandi ngo n’ abakobwa bakwiye kwirinda ibishuko no kwiyandarika.

Ntakirutimana Emmanuel w’ imyaka 42, umufana ukomeye wa Rayon Sports uzwi ku izina rya Kagoma international Miss Rwanda, witabiriye uyu mukino yashyize ibintu ku nda ye ku buryo yagaragaraga nk’ umukobwa utwite yasabye ababyeyi bagenzi be kujya baganiriza abana babo avuga ko we atabuza umukobwa we kujya kuboneza urubyaro igihe abona aribwo buryo busigaye.


Yagize ati "Ababyeyi tugomba kuganiriza abana bacu cyane kugira ngo nibahura n’ umusore ubashuka babashe kwikingira. Biriya bita kuboneza urubyaro ku bakobwa njye ntabwo mbyita kuboneza urubyaro ahubwo mbyita kwikingira. Njyewe abana banjye ndabaganiriza sinzi niba n’ abandi babyeyi babikora ariko babikora ntabwo inda zakagombye kuba ari nyinshi"

Umufana wa Rayon Sports witwa Rwabukwisi w’ imyaka 66 ati "N’ abantu b’ abasaza nkatwe , natwe turi mu batera abana inda. Ubona umwana mutoya uti ni akanyogwe, uti reka ndebe ukuntu nakadomeka kagukundira ugahita ukadomeka ariko uwo ntabwo ari umuco ukwiye mu gihugu cyacu. Twese dukwiye kubirwanya wabona umusaza nkanjye ari kumwe n’ umwana ugatanga amakuru ku gihe uti ’umusaza Rwabukwisi ari kumwe n’ umwana kandi ntabwo bakwiranye arimo gushaka kugira ngo amushurashuze"

Abakobwa basabwe kubyaza umusaruro amahirwe Leta y’ u Rwanda yabashyiriyeho yo kuboneza urubyaro no gukoresha agakingirizo.

Muri uyu mukino ibitego bya Rayon Sports byatsinzwe na Jules Ulimwengu na Jonathan Rafael de Silva watsiinze igitego cya kabiri cyatumye agarurirwa icyireze nyuma yo kurata penaliti.

Muri aka karere abakobwa barenga 400 batewe inda batabiteganyije. Mu Rwanda hose abakobwa bangana n’ abaturage batuye umurenge wa Rwabicuma wo mu karere ka Nyanza (ibihumbi 18) baterwa inda buri mwaka.

Umukobwa witwa Uwizeyimana Elina wari witabiriye uyu mukino yavuze ko umukobwa ariwe ukwiye kwifatira umwanzuro akareka gutwarwa n’ iraha. Ati "Umukobwa niwe ugomba kwifatira umwanzuro akarangwa n’ indangagaciro yo kwifata byamunanira akaba yakoresha agakingirizo"

Habyarimana Emmanuel, Umuyobozi w’ umuryango utari uwa Leta FXB Rwanda , ufasha abana b’ abakobwa bo mu karere ka Nyanza babyariye iwabo yavuze ko magingo aya bafite abakobwa barenga 5000 bafasha. Aba bakobwa bafashishwa amahugurwa kugira ngo babashe kwihangira imirimo kuko ubukene ari kimwe mu bituma abana b’ abangavu baterwa inda batabiteganyije.


Habyarimana Emmanuel, uyobora FXB Rwanda

Yagize ati "Nubwo baba babyariye iwabo baba bakiri abacu ntabwo dukwiye kubareka ngo bagire imibereho mibi"


Meya wa Nyanza Ntazinda Erasme

Umuyobozi w’ Akarere ka Nyanza Ntazinda Erasme yavuze ko ubu bukangurambaga buzamara ukwezi. Bwatangijwe none tariki 15 Gashyantare, buzagera tariki 8 Werurwe 2019 ku munsi mpuzamahanga w’ abagore.




INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...