AMAKURU

UKWEZI
pax

Rwatubyaye Abdul yashyizwe mu kato

Rwatubyaye Abdul  yashyizwe mu kato
30-07-2020 saa 10:52' | By UKWEZI | Yasomwe n'abantu 1607 | Ibitekerezo

Rwatubyaye Abdul, umunyarwanda ukinira ikipe Colorado Springs Switchbacks FC yo muri Leta Zunze Ubumwe za Amerika yashyizwe mu kato k’iminsi 12 nyuma yo gusanga umwe mu bakinnyi bakinana yaranduye Covid-19.

Uyu musore asanzwe ari umwe mu bakinnyi iyi kipe ya Colorado Springs Switchbacks FC yifashishaga cyane kuva Shampiyona y’Icyiciro cya Kabiri muri Amerika isubukuwe muri ibi bihe bya Coronavirus.

Rwatubyaye mu minsi ishize yari aherutse gutorwa nk’umukinnyi w’umukino ubwo yari yitwaye neza mu mukino wabahuye n’ikipe ya Real Monarch SLC ku wa 19 Nyakanga.

Leta Zunze Ubumwe za Amerika ni hamwe mu hantu hibasiwe n’icyorezo cya COVID19 ku Isi, dore ko imibare y’Ishami ry’Umuryango w’Abibumbye ryita ku buzima igaragaza ko kugeza mu gitondo cyo ku wa Kane tariki 30 Nyakanga igaragaza ko Abamaze kucyandura ari 4,568,375 mu gihe kimaze gutwara ubuzima bw’abagera ku 153,845.

Rwatubyaye Abdul yabwiye B&B FM, ko yashyizwe mu kato k’iminsi 12 kubera ko hari umukinnyi bakinana banacumbitse mu nzu imwe, wagaragaweho Covid-19.

Ati ”Yego meze neza ariko ntabwo navuga ko ari 100%, impamvu ni uko ndi kuri rya tegeko ryo kuguma mu rugo iminsi 12 kubera ko umwe mu bakinnyi dukinana yanduye Coronavirus.”

Yakomeje agira ati “Na we dukinana muri Colorado Rapids ariko rimwe na rimwe iyo bamwohereje kuza gukina imikino muri Switchbacks akunda kuba muri apartement [inzu] imwe nanjye, rero yafashwe yaje gukina hano ariko njyewe ntabwo nigeze nandura ni yo mahirwe.”

Rwatubyaye yakomeje avuga ko nyuma yo gusanga uyu mukinnyi mugenzi we yaranduye, na we yabwiwe ko agomba kwishyira mu kato.

Ati “Federasiyo ya hano yafashe icyemezo cy’uko nanjye ngomba kuguma mu rugo iminsi 12 kugira ngo ngaragaze ko nta bwandu mfite mbere yo gusubira mu myitozo n’abandi kuko urebye n’umukino dufite mu mpera z’iki cyumweru ntabwo nzawugaragaramo.”

Rwatubyaye Abdul yagiye muri Leta Zunze Ubumwe za Amerika ubwo yagurwaga na Sporting Kansas City ikina Shampiyona y’Icyiciro cya Mbere (Major League Soccer) muri Gashyantare 2019 avuye muri Rayon Sports.

Nyuma iyi kipe yamuguranye Benny Feilhaber ukina hagati mu ikipe ya Colorado Rapids, ihita imutiza muri Switchbacks yo mu cyiciro cya kabiri, akinamo kugeza ubu.

Switchbacks iherereye muri Leta ya Colorado. Iyi leta imaze gupfusha abantu 1807 mu gihe abasaga ibihumbi 45 aribo bamaze kwandura Coronavirus.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA