AMAKURU

UKWEZI
Canal+ christmax

Amajonjora y’Irushanwa rya Miss Rwanda 2021 yasubitswe

Amajonjora y’Irushanwa rya Miss Rwanda 2021 yasubitswe
5-01-2021 saa 21:58' | By UKWEZI | Yasomwe n'abantu 4061 | Ibitekerezo

Rwanda Inspiration itegura Irushanwa rya Nyampinga w’u Rwanda yatangaje ko ijonjora rya Miss Rwanda 2021 ryari riteganyijwe kubera i Rubavu ku wa Gatandatu ryasubitswe bitewe n’ingamba nshya zafashwe zo kwirinda COVID-19.

Iri tangazo ryasohotse kuri uyu wa Kabiri tariki 5 Mutarama 2021, nyuma y’Inama y’Abaminisitiri yateranye ku wa Mbere yanzuye ko ingendo zihuza Umujyi wa Kigali n’uturere zihagaritswe mu rwego rwo kwirinda ikwirakwira rya Coronavirus

Iyi nama yateraniye muri Village Urugwiro ku Kacyiru yayobowe na Minisitiri w’Intebe, Dr Ngirente Edouard. Yanzuye ko ingendo hagati y’uturere zibujijwe.

Itangazo ryashyizwe hanze na Rwanda Inspiration rivuga ko ijonjora rya Miss Rwanda 2021, ryari riteganyijwe ku wa Gatandatu ryasubitswe kubera ingamba zo kwirinda Coronavirus.

Rigira riti “Abategura irushanwa rya Miss Rwanda baramenyesha abantu bose ko amajonjora yari ateganyijwe tariki 9 Mutarama 2020, abaye asubitswe.”

Ryakomeje rivuga ko abategura irushanwa baha agaciro ubuzima bw’abantu baryitabira n’Abanyarwanda muri rusange, bityo bakaba bakwiriye gukurikiza amabwiriza ya Leta ajyanye no kwirinda icyorezo cya COVID-19.

Abakobwa bashaka kwitabira iri rushanwa bagiye gukomeza kwiyandikisha mu gihe ibindi bikorwa by’irushanwa bizatangazwa mu gihe cya vuba.

Byari biteganyijwe ko tariki 9 Mutarama 2021 mu Karere ka Rubavu hagombaga gutoranywa abazahagararira Intara y’Uburengerazuba bw’u Rwanda, tariki 16 Mutarama 2021, igikorwa cyakombaga gukomereza mu Ntara y’Amajyaruguru mu Karere ka Musanze n’aho tariki 23 Mutarama 2021, abahatana bagatoranywa mu Karere ka Huye mu Ntara y’Amajyepfo.

Tariki 30 Mutarama 2021 ijonjora ryari gukomereza mu Ntara y’Iburasirazuba mu Karere ka Kayonza naho tariki 6 Gashyantare 2021 hagombaga gutoranywa abo mu Mujyi wa Kigali.

Byari biteganyijwe ko tariki 20 Gashyantare 2021 hagombaga gutoranya abakobwa 20 bagombaga kuzajya mu mwiherero i Nyamata kuva tariki 7 Werurwe kugera ku wa 19 Werurwe 2021.

Tariki 20 Werurwe 2021 nibwo byari biteganyijwe ko hazaba umuhango wo kwambika ikamba Nyampinga w’u Rwanda wa 2021 n’ibisonga bye. Ni ibirori bizabera ku Intare Conference Arena.

Umukobwa w’ubwiza n’ubwenge uzatoranywa nka Nyampinga w’u Rwanda azasimbura Miss Nishimwe Naomie ufite ikamba rya 2020.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA