konka coffee
KONKA

AMAKURU

UKWEZI

Umugore wa Bobi Wine yariye karungu ngo umugabo we yongeye gukubitwa n’inzego z’umutekano

Umugore wa Bobi Wine yariye karungu ngo umugabo we yongeye gukubitwa n’inzego z’umutekano
31-08-2018 saa 14:26' | By Vincent Nsengiyumva | Yasomwe n'abantu 4460 | Ibitekerezo

Umugore wa Depite Robert Kyagulanyi[Bobi Wine] yariye karungu aho ashinja inzego z’umutekano za Uganda gukubita umugabo we ubwo yari amaze gufatirwa ku kibuga cy’indege cya Entebbe ajya mu mahanga kwivuza.

Barbie Itungo Kyagulanyi, yabitangaje kuri uyu wa Gatanu tariki 31 Kanama 2018 abinyujije ku rukuta rwe rwa Facebook.

Ku mugoroba wo kuri uyu wa Kane tariki 30 Kanama, nibwo umunyapolitike ubifatikanya n’ubuhanzi Robert Kyagulanyi uzwi ku izina rya Bobi Wine yafatiwe ku kibuga cy’indege cya Entebe ubwo yerekezaga muri Amerika kwivuza nyuma y’uko abaganga bamukurikirana mu bitaro bya Lubaga arwariyemo bari bemeje ko agomba kujya kwivuriza hanze.

Depite Bobi Wine amaze iminsi mu bitaro bya Lubaga aho yagiye kwivuza nyuma yo gusohorwa mu buroko, aho yemeza ko ari ingaruka z’iyicarubozo yakorewe n’abasirikare ba Uganda aho yari afungiye.

Bobi Wine wari wageze ku kibuga cy’indege , ubwo indege yari kugendamo yari imaze kuhagera, abasirikare bahise bahagera bamukura ku kibuga cy’indege bamujyana ku bitaro bikuru bya Mulago.

Umuvugizi wa Polisi mu gihugu cya Uganda Emillian Kayima yatangaje ko bajyanye Bobi Wine mu bitaro bya Kirudu kugira ngo babanze bamusuzume barebe niba koko arwaye bikomeye ku buryo yajyanwa kuvurizwa hanze y’igihugu.

Yagize ati " Bobi Wine yajyanwe mu bitaro bikuru bya Mulago kugira ngo bamukorere isuzuma ryimbitse ngo barebe niba koko yarakorewe iyicarubozo."

Umugore wa Bobi Wine ntakozwa icyemezo cyafashwe cyo gukumira umugabo we kujya kwivuriza hanze aho avuga ko ababikoze bagambiriye kumutinza nkana kugira ngo atabona ubuvuzi bityo azamugare burundu.

Mu nyandiko yashyize kuri Facebook Barbie Itungo Kyagulanyi yagaragaje ko umuryango we ndetse n’inshuti z’umuryango zitishimiye ibikomeje gukorerwa Bobi Wine.

Yagize ati “Bobi yongeye gufatwa n’inzego z’umutekano mu buryo bumuhutaza ubwo yari ku kibuga cy’indege i Entebbe ajya i Washington kwivuza kandi yari afite icyemezo cy’urukiko kimwemerera kujya hanze. Afite icyemezo cya muganga cyatanzwe n’ibitaro bya Lubaga cyemeza ko akeneye ubuvuzi bwisumbuye hanze y’igihugu.”

Barbie Itungo yanahishuye ko mu biganiro yagiranye na Bobi Wine ngo yamubwiye ko abapolisi bamujyanye bamukubitiye bikomeye mu modoka bari bamutwayemo ku buryo n’abaganga babyiboneye.

Yagize ati “Yambwiye ko bakimara gufunga inzugi za ambulance bongeye kumukubita mu buryo bubabaje imbere y’abaganga b’igihugu. Bazimije amatara yo muri ambulance ubundi baramukubita. Bobi ubu yasubiye mu buribwe bukomeye aho yashyizwe mu bitaro bikuru bya Mulago.”

Uyu mugore yakomeje avuga ko yamaganye ubugome n’ubugambanyi buri gukorerwa umugabo we n’abandi bahuje ibitekerezo. Yanavuze ko atizeye ibizava mu bizamini bizakorwa n’abaganga bari ku ruhande rw’abishe urubozo Bobi Wine.

Kuva ku mugoroba wo kuri uyu wa Kane inzego z’umutekano za Uganda zari zakambitse mu mihanda yo mu mijyi inyuranye muri iki gihugu bitegura ko abakunzi ba Bobi Wine bashobora kongera kwigaba mu mihanda mu myigaragambyo.

Barbie Itungo yashimangiye ko umugabo we, Bobi Wine yongeye gukubitwa n’abashinzwe umutekano


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...