Imibare itangwa n’urubuga worldometers.info rutanga amakuru ya coronavirus igaragaza ko magingo aya Leta zunze ubumwe za Amerika aricyo gihugu gifite abarwayi benshi ba coronavirus mu gihe kuva iyi virusi yaduka Ubushinwa aribwo bwari bufite abarwayi benshi.

Muri Leta zunze ubumwe za Amerika abarwayi ba covid-19 bamaze kuba 85,604, mu gihe mu Bushinwa ari 81,340. Ejo habonetse abarwayi bashya barenga ibihumbi 17.

Mu Bushinwa abamaze gukira iyi virusi ni 74,588 mu gihe muri Leta zunze ubumwe za Amerika abamaze gukira ari 1,868.

Abamaze gupfa muri Amerika abamaze gupfa ni 1 301 mu gihe mu Bushinwa ari 3,292.

Ubutaliyani nicyo gihugu kiza ku mwanya wa gatatu mu kugira abarwayi benshi ba COVID-19 kuko gifite abarwayi 80,589 gusa kiza ku mwanya wa mbere mu bihugu bimaze gupfusha abarwayi benshi bazize iyi virusi kuko abamaze gupfa mu Butaliyani ari 8,215.

Igihugu cya Espagne kiri ku mwanya wa kane mu bifite abarwayi benshi ba covid-19 kikaba ku mwanya wa kabiri mu bihugu bimaze gupfusha abaturage benshi bazize covid-19. Muri Espagne abarwayi ni 57,786 abamaze gupfa ni 4,365.

Ubushinwa buvuga ko icyatumye bubasha guhagarika ubukana bw’iki cyorezo ari umwanzuro bafashe wo gusaba abaturage kuguma mu ngo.

Ishami ry’umuryango w’abibumbye ryita ku buzima OMS rivuga ko iyi virus ya corona idafite ubushobozi bwo kwivana ahantu hamwe ngo igere ahandi itajyanywe n’umuntu. Niyo mpamvu umwanzuro wo kugumisha abantu mu rugo ariyo ngamba ya mbere itanga umusaruro kurusha izindi zose zo kwirinda ikwirakwira rya COVID-19.

Perezida wa US Donald Trump mu butumwa yashyize kuri twitter yavuze ko igihugu cye cyatangiye gukorana bya hafi n’Ubushinwa ndetse ko babwubaha kuko bwaciye muri iki cyorezo bagatera imbere mu myumvire kuri iyi virusi.