Urukiko rwo mu mujyi wa Parisi mu Bufaransa ruburanisha urubanza Perezida Nkurunziza w’ u Burundi yarezemo Televiziyo France 3 avuga ko yamuteje urubwa rwashyizwe mu muhezo.
Umwanzuro wo gushyira uru rubanza mu muhezo wafashwe kuri uyu wa 25 Mutarama 2019 ku munsi wa kabiri w’ iburanisha.
Abaregwa ni Televiziyo France 3 n’ umunyamakuru wayo, umunyamategeko Bernard Maingain n’umwanditsi David Gakunzi. Urega ni Perezida Nkurunziza.
Abunganira Perezida Nkurunziza bavuga ko uyu mukuru w’ igihugu abaregwa bamuteje urubwa mu mashusho bacishije kuri iyi televiziyo France3 yerekana ubwicanyi bwakorwaga n’ abantu iyi televiziyo yavuze ko ari Imbonerakure zari mu rugo rwa Perezida Nkurunziza i Karuzi.
Perezida Nkurunziza avuga ko cyari ikinyoma kuko abo bicanyi batari ku butaka bw’u Burundi, n’ikimenyimenyi ngo ni uko barimo bavuga ururimi rwo muri Afrika y’ Uburengerazuba.
Urukiko rwatangaje ko urubanza rushinzwe mu mwiherero, rukazasomwa tariki 05/04/2019.