konka coffee
KONKA

AMAKURU

UKWEZI

VIDEO: Inzira itangaje mu gutunga imodoka n’udushya tw’amagare i Beijing mu Bushinwa

VIDEO: Inzira itangaje mu gutunga imodoka n’udushya tw’amagare i Beijing mu Bushinwa
24-08-2018 saa 12:10' | By Chief Editor | Yasomwe n'abantu 8545 | Ibitekerezo 4

Muri uku kwezi kwa Kanama, i Beijing mu Bushinwa habaye amahugurwa agenewe abahagarariye ibitangazamakuru byo muri Africa bikoresha ikoranabuhanga rigezweho rya Internet. Ikinyamakuru Ukwezi.com cyari cyatumiwe, giserukira u Rwanda muri aya mahugurwa yagarutse kuri byinshi. Ugihagariraye hamwe na bagenzi be bo mu bihugu bitandukanye, uretse guhugurwa ku bijyanye n’itangazamakuru, banatemberereye mu bice bitandukanye bigize iki gihugu kinini cyane dore ko ari icya kane mu bunini nyuma y’u Burusiya, Canada na Leta Zunze Ubumwe za Amerika.

U Bushinwa, ni igihugu cy’igihangange, igihugu cya kabiri mu bikize kurusha ibindi ku isi ariko kikaba icya mbere mu bihugu bifite abaturage bakize ugiye ureba ku mibereho ya buri muntu. Ni igihugu kidasanzwe, gifite byinshi by’umwihariko umuntu yavuga bukira bugacya. Nicyo gihugu gifite abaturage benshi ku isi, kuko 1/5 cy’abatuye isi yose ni Abashinwa, ni ukuvuga abasaga 1.408.000.000 mu gihe isi yose ituwe n’abasaga 7.000.000.000.

Ku mugabane wa Afurika, uzasanga muri iki gihe hari umubare munini w’Abashinwa bubaka amagorofa, imihanda y’imodoka, iya gari ya moshi cyangwa ibindi bikorwa remezo bitandukanye. Burya isuku igira isoko, biriya bakora hari aho babikuye, kuko igihugu cy’u Bushinwa kirubatse kandi inyubako zabo zihambaye zirimo izimaze imyaka myinshi cyane kandi zikomeye cyane. Iki gihugu gifite inganda nyinshi zikora ibintu bitandukanye byo mu ngeri zose, na gari ya moshi gikoresha mu ngendo ni izo kikorera ubwacyo kikanasagurira amasoko y’amahanga. Ibijyanye n’imihanda byo, ubu u Bushinwa bufite intumbero yo gushaka uko hakubakwa ibiraro byambuka inyanja byazahuza imigabane bikoroshya ubuhahirane.

JPEG - 151.2 kb
JPEG -
JPEG - 72.3 kb
JPEG - 227.1 kb
JPEG - 40.6 kb

Umujyi wa Beijing niwo mujyi utuwe n’abaturage benshi kurusha indi mijyi yose yo ku isi

By’umwihariko ibijyanye n’imihanda, mu bice bitandukanye by’u Bushinwa uhasanga imihanda igerekeranye, ica munsi y’imisozi kandi yose migari mu buryo bugaragara. Hari imihanda ya gari ya moshi zihuza imijyi, hakaba n’izikora ingendo z’imbere muri buri mujyi zizwi nka ‘Subway’, izi zo usanga zica munsi y’ubutaka cyangwa hejuru y’imihanda isanzwe y’imodoka.

Icyo tugamije muri iyi nkuru, si ukubabwira iby’amagorofa adasanzwe n’ibikorwaremezo bihambaye biri mu Bushinwa, ahubwo tugiye kureba by’umwihariko ibintu bitangaje mu ngendo zo mu mujyi wa Beijing, umurwa mukuru w’u Bushinwa ukaba n’umujyi utuwe kurusha iyindi yose ku isi.

JPEG - 36.8 kb

Beijing ituwe n’abantu basaga miliyoni 23, ubwinshi bwabo bugatuma mu masaha 24 yose agize umunsi ubona banyuranamo bagenda mu buryo butandukanye. Uyu mujyi kugeza ubu ubarizwamo imodoka zisaga miliyoni 6, ariko n’ubwo abantu bigaragara ko bafite amafaranga, ni inzozi zikomeye kuba wabasha kwigurira imodoka yawe kuko amafaranga ubwayo ntahagije.

Iyo ushaka kugura imodoka, ni ukujya muri tombola nk’imwe ya Green Card ku bashaka amahirwe yo kujya gutura muri Amerika. Iyo tombola iba ari iyo kuguhesha kubona ikirango cyangwa se ‘plaque’, kuko ubanza kuyigura mbere yo kugura imodoka. Ibi ni amahirwe asekera bacye cyane kuburyo hari abayabuze bamaze nk’imyaka 3 barabuze uko nabo batunga imodoka zabo bwite.

Iyo utomboye plaque biba ari ibirori mu muryango wawe no mu nshuti, ariko nabwo ntibwacya ngo ujye kugura imodoka kuko uba ugomba kwicarana iyo plaque umwaka wose ukabona kugura imodoka. Iyo uyiguze kandi ntiwemerewe kugura iya kabiri ndetse n’iyo uwo mwashakanye cyangwa undi wo muryango wawe wa hafi asanzwe atunze imodoka, bikwambura amahirwe yo kuba wakwemererwa kuyitunga.

Iyo utuye hanze ya Beijing ntuba wemerewe kuhinjiza imodoka kuko buri mujyi ugira plaque zawo. Iyo byabaye ngombwa cyane, ubisabira uburenganzira bakabisuzuma basanga ubikwiye bakaguha amasaha macye yo kugeza imodoka yawe i Beijing.

JPEG - 194.8 kb

Umujyi wa Beijing hari ibice binini biba birimo imodoka nyinshi n’ubwo imihanda yaho ari migari bihagije

Ikindi gikomeye kandi gitangaje, ni uko buri wese ufite imodoka ye muri Beijing atemerewe kuyitwara iminsi yose. Hari umunsi w’abafite plaque z’igiharwe hakaba n’umunsi w’abafite plaque zitari igiharwe, bivuga ngo ntiwajya ku kazi n’imodoka kuwa mbere ngo wongere uyisubizeyo kuwa kabiri. Ibi byemerewe abayobozi bakomeye n’abandi bacye cyane bafite akazi kazwi muri Leta kabategeka kugenda mu modoka zabo igihe cyose.

Ni ukuvuga ko iyo wagiye gusura inshuti, wagiye mu birori cyangwa ahandi ugatindayo ukabona saa sita z’ijoro zigiye kukugereraho ngo ugere ku wundi munsi, uparika imodoka ku muhanda aho ubonye ukirinda ko wahanirwa ko imodoka yawe yagaragaye mu muhanda kandi yambaye plaque itari yemerewe kujya mu muhanda uwo munsi. Ibi bituma, hirya no hino ku mihanda ya Beijing uhasanga imodoka ziba ziparitse ari nyinshi ku nkengero z’imihanda, harimo n’izo ubona ziba zihamaze nk’icyumweru.

Ibi ni ibintu ubuyobozi butajenjekera kuburyo uwari ushinzwe gutanga uburenganzira no kugenzura iby’abemerewe gutunga imodoka i Beijing, ubu yakatiwe igihano cy’igifungo cya burundu azira ruswa n’ikimenyane mu guhesha abantu uburenganzira bwo gutunga imodoka zabo bwite.

Ibi byose ariko se biterwa n’iki? Abatuye muri Beijing bagenda bate? Ubuse ingendo ntizibagora? Kurikira neza wumve igisubizo…

Nyuma yo kubona ko umujyi wa Beijing ukomeje guturwa n’abantu benshi cyane kandi biganjemo abifite aho buri wese yifuzaga gutunga imodoka ye bwite, ubuyobozi bw’uyu mujyi bwasanze ubwinshi bw’imodoka zisanzwemo budafatiwe ingamba byateza umuvundo w’imodoka nyinshi ingendo zikagorana kurushaho. Uretse umuvundo, kwanduza ikirere nabyo byari ikibazo gishishikaje cyane ubuyobozi bwa Beijing.

Mu gukemura iki kibazo, hashyizwe imbaraga muri serivisi zo gutwara abantu mu buryo bwa rusange, aho za gari ya moshi n’ama ‘bus’ bitwara abantu benshi kandi kuri macye, kuburyo hari n’aho umuntu yishyura kimwe cya kabiri cy’ifaranga rikoreshwa mu bushinwa, ubaze mu mafaranga y’u Rwanda ni nka 65. Izi modoka zitwara abagenzi ndetse na za gari ya moshi, inyinshi ntizikoresha ibikomoka kuri peterori ahubwo zikoresha ingufu z’amashanyarazi, zikoze mu ikoranabuhanga rituma zirahura umuriro ku nsinga z’amashanyarazi ziri ku mihanda.

Hari ubundi buryo ariko budasanzwe bwo gukemura ikibazo cy’ingendo ndetse n’ikibazo cyo kwanduza ikirere. Ubwo buryo si ubundi, ni ukwifashisha amagare. Igare ni ikintu gikomeye i Beijing kandi cy’agaciro cyane, ku b’ubushobozi bucye n’abaherwe bose bubaha igare, kandi uburyo aya magare akoreshwamo nabwo ntibusanzwe.

Amamiliyoni y’amagare, aba aparitse ku mihanda yose hirya no hino mu mujyi wa Beijing. Umuntu udakoresheje uburyo twavuze haruguru mu ngendo zitandukanye yifatira akagare kandi ntagakura kure ahantu hose ku nkengero z’imihanda amagare aba ahaparitse. Muri Beijing nta moto zitwara abagenzi zihaba, icyakoze ushobora kubona utumoto dutoye tw’abantu ku giti cyabo bakoresha mu ngendo zabo za buri munsi.

Aya magare rero yo si ay’abantu ku giti cyabo ahubwo ni ay’ibigo bitandukanye mu Bushinwa. Aba aparitse ku muhanda ari menshi ukagenda ukarebamo iryo ushaka, usanga rifunze mu buryo bw’ikoranabuhanga kuburyo rifungurwa n’umubare w’ibanga. Aha Beijing abaturage bose baba bafite uburyo bw’ikoranabuhanga muri telefone zabo (application) bakoresha kuri buri gare bakabona wa mubare w’ibanga bawushyiramo rigafunguka, akishyura ifaranga rimwe cyangwa igice cy’ifaranga (nka 65 ubaze mu manyarwanda) akarigendaho yagera aho agiye akariparika ku muhanda akigendera yakenera kujya ahandi agafata irindi gutyo gutyo.

Iyo igare rigupfiriyeho ntubitindaho, uriparika aho ugeze ku nkengero z’umuhanda ukifatira irindi, haba hari abakozi bagenda bareba amagareyagize akabazo bakayakora, bakagenda banongera andi ku mihanda asimbura agenda asaza kuburyo nta kibazo abifuza kugenda ku magare bajya bagira.

REBA VIDEO UKO BIBA BYIFASHE I BEIJING HANO:


INKURU ZA :
Tanga Igitekerezo
Ibitekerezo 4
richard Kuya 30-08-2018

urasetsa! ibi n’ugutekinika. ibi nibyo bashatse ko ureba n’aho ubundi ubushinywa bufite abaturage bakennye cyane. ndetse bamwe barwaye bwacyi.
ibi bimeze nk’uwaza mu rwanda bakamwereka za Nyarutarama, Kagarama , kagugu...ukajyenda wiyamira ngo abanyarwanda barakize....batakweretse za bannyahe, katabaro, n’ahandi henshi

Habimana Kuya 28-08-2018

Ndabona iterambere r yacu r igiye kumera nk Ubushinwa ngomba kugura imodoka hakiri kare bataratangira gufata ibyemezo.

C Kuya 26-08-2018

Eh! Mbega inkuru! Ndumiwe. i Kigali naho rero hageze ko imodoka zigenda bitewe na Plaque zifite nkuko bigenda Beijing, Paris,...

Emmy Kuya 24-08-2018

Murakoze cyane menye byinshi ntari nzi kubashinwa gusa nkunda China cyane cyane kuko yo ntabwo yivanga muri politic zibihugu yo icyo ishaka ni business gusa murakoze murakarama

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
  • uwayo https://umuseke.rw/amp/turarakaye-twabuze-epfo-na-ruguru-abagore-babwira-paapa.html

    ">nsubize#Igiraneza https://umuseke.rw/amp/turarakaye-twabuze-epfo-na-ruguru-abagore-babwira-paap
  • IZINDI NKURU WASOMA
    Loading...