AMAKURU

UKWEZI
cheno 2020

Obama yamaganye Abademukarate bashyize imbere impinduka zikomeye bati ‘watwumvise nabi’

Obama yamaganye Abademukarate bashyize imbere impinduka zikomeye bati ‘watwumvise nabi’
18-11-2019 saa 08:50' | By Nsanzimana Ernest | Yasomwe n'abantu 1996 | Ibitekerezo

Abakandida b’ abademukarate mu matora ya Perezida wa Leta zunze ubumwe za Amerika ari imbere bagaragaje icyo batekereza ku mpanuro bahawe na Barack Obama umudemukarate uheruka kuba Perezida w’ iki gihugu.

Mu bukangurambaga bwo gukusanya amafaranga ishyaka ry’ abademukarate rizakoresha mu matora, Obama yavuze ko abakandida b’ abademukarate bagomba kwitondera impinduka muri gahunda yabo ya politiki kuko baramutse bakoze impinduka zikomeye bashobora gutakaza abarwanashyaka batazishakaga.

Kugeza ubu hari abademukarate 18 bahatanira kuzasimbura Perezida Trump ugiye kurangiza manda ya mbere. Ibiganiro birakomeje mu bademukarate kugira ngo barebe uburyo bwazakoreshwa mu gutsinda Trump.

Obama ntiyavuze amazina y’ abakandida bafite politiki ishobora gutuma abarwanashyaka bava mu ishyaka ry’ abademukarate, gusa uyu mugabo wategetse iki gihugu kuva muri 2009 kugera muri 2017, akagenda agikunzwe yaburiye abademukarate ko bagomba kwirinda impinduka zikomeye.

Yagize ati “Abanyamerika ntabwo bakeneye ko sisiteme yose ivugururwa. Ni igihugu gikeneye ko sisiteme inozwa ntabwo bakeneye impinduramatwara”.

Bernie Sanders, umwe mu bavuga rikijyana mu ishyaka ry’ abademukarate yagaragaje ko Obama ashobora kuba yaramwumvise nabi, ati “Kuvuga ko tuzazamura umushaharafatizo ntabwo ari ugusenya sisiteme ni uguharanira uburenganzira. Ni gahunda ishigikiye na rubanda nyamwinshi”.

Elizabeth Warren nawe uri mu bakomeye muri iri shyaka yavuze ko Obama yashyizeho gahunda yo kwivuza Obama care yatumye ubuvuzi bugera kuri miliyoni nyinshi z’ abaturage mu gihe abenshi babona ko bidashoboka.

Ati “Mureke tureke gukomeza gusenyana no guca imirongo ya rengarenga”.

Julián Castro, umudemukarate wahoze ari meya w’ umujyi wa san Antonio yavuze ko umudemukarade wese wakwiyamamaza yatsinda Trump.

Bitandukanye n’ ahenshi muri Afurika aho Perezida agera ku butegetsi akabugundira, muri Leta zunze ubumwe za Amerika Perezida atorerwa manda y’ imyaka 4, akongera akiyamamaza inshuro imwe yatsinda akayobora indi manda yatsindwa agakorerwa mu ngata.

Perezida Trump yatowe mu mpera za 2016, bivuze ko mu mpera za 2020 azaba amaze imyaka 4 ku butegetsi manda ya mbere irangiye.

Amatora ya Perezida wa Leta zunze Ubumwe za Amerika azaba ku wa Kabiri tariki 3 Ugushyingo 2020.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...