AMAKURU

UKWEZI
pax

Perezida Trump yashyiriweho impapuro zimuta muri yombi

Perezida Trump yashyiriweho impapuro zimuta muri yombi
29-06-2020 saa 14:18' | By UKWEZI | Yasomwe n'abantu 3710 | Ibitekerezo

Leta y’igihugu cya Iran yashyizeho impapuro zita muri yombi Perezida wa Leta Zunze Ubumwe za Amerika, Donald Trump, inasaba Polisi Mpuzamahanga gutanga ubufasha mu guta muri yombi uyu mugabo ushinjwa kwica Umuyobozi Mukuru mu ngabo z’iki gihugu.

Umushinjacyaha wo mu Mujyi wa Tehran muri Iran, Ali Alqasimehr niwe watangaje iki cyemezo kuri uyu wa Mbere avuga ko Perezida Trump n’abandi 30, bagomba gutabwa muri yombi.

Yavuze ko igihugu cya Iran kibashinja kugira uruhare mu gitero cyo ku wa 3 Mutarama 2020, cyaguyemo General Qassem Soleimani.

Umushinjacyaha Ali Alqasimehr yavuze ko aba bantu bose uko ari 30 bakurikiranyweho ibyaha by’ubwicanyi n’iterabwoba.

Aljazeera yatangaje ko uyu mushinjacyaha atigeze avuga andi mazina y’aba bantu 30 bakurikiranywe mu kirego kimwe na Perezida Trump.

Polisi Mpuzamahanga ishinzwe kurwanya ibyaha, Interpol ifite icyicaro I Lyon mu Bufaransa , kugeza ubu ntacyo iravuga ku busabe bwa Iran yayigejejeho iyisaba ubufasha mu guta muri yombi Perezida Trump.

Qassem Soleimani yiciwe mu bitero bya drones byagabwe n’Ingabo za Leta Zunze Ubumwe za Amerika ku modoka yari arimo ubwo yari avuye ku kibuga cy’indege cy’i Baghdad ku wa Gatanu w’icyumweru gishize.

Soleimani yafatwaga nk’intwari muri Iran ndetse yari azwiho n’ubuhanga buhambaye mu bya gisirikare ku buryo n’abasirikare benshi bo mu bindi bihugu bamugaragazaga nk’umuhanga uhambaye.

Yari umuyobozi w’umutwe wa Quds wari ushinzwe ibikorwa bya gisirikare n’iby’ubutasi byo hanze y’igihugu gusa Leta Zunze Ubumwe za Amerika zawufataga nk’umutwe w’iterabwoba.

Soleimani yagaragaje ubuhanga bwe mu bya gisirikare mu gihe cy’intambara ya Iran na Iraq ahagana mu 1980, aheraho azamuka mu nzego kugeza ubwo aba umuntu ukomeye mu gihugu ndetse agira n’uruhare rukomeye mu byemezo bitandukanye mu bihugu byo mu Burengerazuba bw’Isi.

Amerika yakunze kuvuga ko Soleimani yagize uruhare rukomeye mu rupfu rw’ibihumbi by’abanyamerika n’abandi bo mu bihugu by’inshuti zayo.

Soleimani yayoboye umutwe Quds kuva mu 1998, niwe wari inyuma y’ibikorwa bya gisirikare bya Iran muri Iraq na Syria
Qassem Soleimani yari umwe mu bantu bakomeye muri Iran


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...