Minisiteri y’Ubuzima mu Burundi yatangaje ko abantu 20 bashya basanganywe Coronavirus bituma abamaze kwandura mu gihugu hose bagera kuri 80, mu gihe ubuyobozi butangaza ko umuntu umwe ariwe umaze guhitanwa nacyo.

Guverinoma y’u Burundi yatangaje bwa mbere ku wa 31 Werurwe 2020, ko habonetse abantu babiri banduye icyorezo cya COVID19 giterwa n’agakoko gashya kazwi nka Coronavirus.

Kuva icyo gihe ubuyobozi bw’iki gihugu ntibwigeze bushyiraho ingamba zigamije gukumira iki cyorezo cyayogoje Isi yose cyane ko mu minsi ishize iki gihugu kivuye mu bikorwa by’amatora y’Umukuru w’Igihugu.

Minisiteri y’Ubuzima muri iki gihugu itangaza ko kugeza kuri uyu wa Gatandatu tariki 6 Kamena 2020, abantu bamaze kwandura iki cyorezo ari 80, mu gihe abamaze gukira ari 45 naho umuntu umwe akaba ariwe umaze guhitanwa na Coronavirus mu Burundi.

Muri aba bantu bamaze kwandura Coronavirus mu Burundi harimo Denise Bucumi Nkurunziza, umufasha wa Perezida Pierre Nkurunziza.