Urukiko rwo mu mujyi wa Nairobi ruburanisha urubanza ruregwamo abantu bane baregwa kugira uruhare mu gitero simusiga cyahitanye abantu 148 muri Kaminuza ya Garissa rwasubitse isomwa ry’ uru rubanza.

Abaregwa uko ari bane Rashid Mberesero, Sahal Diriy Hussein, Hassan Edin Hassan na Muhamed Abd bari mu rukiko biteuye kumva umwanzuro w’ urukiko.

Umucamanza yavuze ko urukiko rutarafata umwanzuro kuri uru rubanza ku gitero cyabaye mu myaka 4 ishize.

Abaregwa bakurikiranyweho ibyaha 156 birimo no kuba mu mutwe w’ iterabwoba wagabye iki gitero, iterabwoba, ubwicanyi, n’ ibindi.

Umucamanza yavuze ko isomwa ry’ uru rubanza ryimuriwe tariki 18 z’ ukwezi gutaha kwa Kamena nk’ uko byatangajwe na BBC.

Mu kwezi kwa Mbere uyu mwaka abaregwa uko ari bane bagejejwe imbere y’ urukuko baburana bahakana ibyaha byose baregwa uko ari 156.

Igitero cya Garissa cyapfiriyemo abantu 148 biganjemo abanyeshuri bo muri Kaminuza ya Garissa. Abaregwa bakekwaho kuba abanyamuryango b’ umutwe w’ iterabwoba wa Al Shabaab.

Umunyatanzania Mberessero uri mu baregwa we yihariye icyaha cyo kwinjira muri Kenya mu buryo bunyuranyije n’ amategeko.

Igitero cya Garissa cyo ku wa 2 Mata 2015 cyabanjirijwe n’ igitero cyagabwe ku isoko rya Westgate kigahitana abantu 69.