konka coffee
KONKA

AMAKURU

UKWEZI
ubumwe

Uganda: Ubuhamya bw’ umugore wakuwemo nyababyeyi kubera ukuntu yakubiswe n’ abapolisi

Uganda: Ubuhamya bw’ umugore wakuwemo nyababyeyi kubera ukuntu yakubiswe n’ abapolisi
3-07-2019 saa 11:31' | By Nsanzimana Ernest | Yasomwe n'abantu 1472 | Ibitekerezo

Impirimbanyi y’ uburenganzira bwa muntu muri Uganda yakuwemo nyababyeyi nyuma y’ ukwezi kurenga akubiswe bikomeye n’ abapolisi ba Uganda azira guharanira iyubahirizwa ry’ uburenganzira bwa muntu.

Annette Nana Namata umupfakazi w’ abana batanu yakubiswe tariki 24 Mata 2019. Uyu mugore yazize kuvuga ko atemeranya n’ ibikorwa byo kubangamira uburenganzira bwa muntu bikorwa na polisi ya Uganda.

Namata ukiri mu bitaro byigenga bya Kampala ahitwa Ntinda , ejo tariki 2 Kamena 2019, ubwo yaganiraga na Dail monitor yavuze ko yamagana ubwicanyi bwakorewe Ronald Ssebulime.

Muri Nzeli 2018, Namata yagiye ahari hari kubera inama ivuga kuri politiki y’ imisoro afata micro avuga ko guverinoma ya Uganda nta byinshi iri gukora ngo yite ku baturage bayo.

Uyu mugore warimo asoma igitabo ‘From Dictatorship to Democracy’ (Kuva ku gitugu ugana kuri Demukarasi’) cya Tony Ben yakuwemo nyababyeyi. Gukurwamo nyababyeyi byatewe n’ ikintu yakubiswe ku nda amaraso akipfundika.

Nyuma yo gukubitwa na Polisi ya Uganda yajyanywe ku bitaro bya Iran-Uganda akorerwa ibizami byishyurwa na polisi.

Umuvugizi wa Polisi ya Uganda, Fred Enanga yemeje ko uyu mugore yareze polisi mu rukiko.

Ati “Ikibazo ni uko impirimbanyi zikora amakosa y’ ikinyabupfura mu bikorwa byazo. Ariko kuva yaratanze ikirego mu rukiko urwego rwacu rushinzwe amategeko ruzisobanura uko bikwiye”.

Ubuhamya

Namata avuga ko tariki 23 Mata 2019, yagiye ku kicaro cya Polisi ya Uganda avuga impamvu enye zituma yitabira imyigaragambyo. Yabwiye umuyobozi wa polisi ushinzwe ibikorwa Kalulu ko impamvu ya mbere ari uko Polisi yari yagose urugo rwa Robert Kyagulanyi bityo uyu mugore akaba yarasabaga ko uyu mudepite yakomeza akajya mu kazi ke bisanzwe.

Impamvu ya kabiri avuga ko yabwiye Kalulu ni uko atemeranya n’ ihohoterwa rikorwa Kizza Besigye n’ abanyarwashyaka b’ ishyaka rye FDC, ati “Nabajije Kalulu aho uburenganzira bwa muntu buri niba ibikorwa by’ ubugizi bwa nabi biri kwiyongera”.

Impamvu ya 3 ni ubwicanyi bwakorewe Ssebulime, ndamubwira nti ibintu nk’ ibi birambabaza. Ndamubwira nti Abanyayuganda nubwo bacecetse ntibabyibagiwe.

Impamvu ya kane avuga ngo ni uko yasomye itegeko nshinga rya Uganda agasanga ibyo bikorwa polisi ikora bitari mu nshingano zayo.

“Kalulu yansubije ko izo ngingo enye nshaka ko tuganiraho ari ingingo nziza ariko ambwira ko atampa igisubizo cyuzuye.”

Uyu mugore ku munsi wakurikiyeho avuga ko yasubiye kuri polisi, akabwira abapolisi ko ashaka guhura n’ Umuyobozi mukuru wa Polisi Martins Okoth-Ochola cyangwa umwungirije Maj Gen Sabiiti Muzeeyi. Yabajijwe niba afitanye nabo randezu asubiza ko ntayo bafitanye. Ati “Ntabwo nari nzi ko kujya kureba umuntu uwo ari wese bitangirwa uruhushya”.

Uyu mugore avuga ko yagiye guparika imodoka ye, kugira adafungira inzira izindi modoka. Aha niho abapolisi bamusanze bazenguruka imodoka ye.

Muri abo bapolisi ngo hajemo uw’ umugore akomanga ku kirahure cy’ imodoka amubwira amagambo amutera ubwoba mu Giswahili gipfuye nk’ uko Namata abivuga.

Mbere yo kuva kuri Polisi yari yasize avuze ko azagaruka ejo kandi ko atazahava ingingo 4 yabwiye Kalulu zitaganiriweho ngo ibyo bibazo bikemuke.

Namata yabwiye uwo mugore ko ari kuvuga Igiswahili gipfuye, uwo mugore ahita arakara, yigira hirya yitaba telefone.

Uyu mugore w’ umupolisi yagarutse abwira Namata ngo ave mu monota amujyanye kwa IGG ariko ngo yanze kuva mu modoka kuko yari yamaze kubona ko abo bapolisi bashaka kumukubita.

Yanze kuva mu modoka bakubise ibipfutsi ku kirahure, batera ibyuka biryana mu maso, Namata afungura igisenge cy’ imodoka ngo ahumeke.

Namata avuga ko atazi uko abapolisi bafunguye umuryango w’ imodoka, batangira gukurura amaguru. Wa mupolisikazi yashatse kumukuramo ipantalo Namata ati winyambika ubusa. Ubwo ngo hejuru y’ imodoka hariyo undi mupolisi ari gusunika uyu mugore ngo asohoke mu modoka.

Umwe mu bapolisi yabwiye uwo mugore ko Namata atwite inda nkuru undi ati ‘ndabizi’.

Bamaze kumukura mu modoka ngo bamujugunye hejuru baramurekura aramanuka akubita umugongo hasi araruka. Wa mupolisikazi ngo yahise amubwira ngo birye, Namata aranga, uwo mupolisikazi amukandagira ku nda.

Avuga ko ibyo aribyo yibuka yabonye. Ngo yongeye kwisanga ari mu bitaro bya Iran Uganda. Uyu mugore wari utwite inda y’ amezi 6 avuga ko yasabye abapolisi babiri bari aho yari arwariye , Agaba Godson na Josephine Kakule ngo age kwivuriza ku bitaro byamukurikiranye atwite abo bapolisi barabyanga.

Yabasabye telefone ye yari afite mu modoka ngo ahamagare abantu bo mu muryango we nabyo barabyaga.

Dr Kato wari uri kumuvura yumvise ko abo bapolisi banze ko Namata avuga n’ abo mu muryango we, amutiza telefone arahamagara.

Amaze guhamagara yasuwe n’ abantu batandukanye barimo na Dr Kizza Besigye ari nabo bamuzaniye ambulance imujyana mu bitaro byigenga bya Kampala ari naho arwariye kugeza ubu.

Ibitaro bya Kampala Independent ku nshuro ya mbere byaramuvuye arataha kuko yabonaga nakomeza kuba mu bitaro atazoshobora kwishyura ikiguzi cy’ ubuvuzi.

Tariki 17 Kamena nibwo yongeye kurwara asubiye mu bitaro bamubwira ko afite ibibazo muri nyababyeyi. Bafata icyemezo cyo kubyaza umwana atarageza igihe kugira ngo umwana atamupfira mu nda.

Abaganga basanze uyu mugore afite ikibumbe cy’ amaraso muri nyababyeyi bayimukuramo.

Namata avuga ko ubusanzwe yari afite iduka ricuruza ibitabo ariko naryo ngo ntirigikora kuko nyirinzu yacururizagamo yanze amafaranga y’ ubukode.

Ati “Sinigeze mba umuntu mubi, ntabwo niyumvishaga ko ibintu nk’ ibi byambaho”.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...