konka coffee
KONKA

AMAKURU

UKWEZI

Ubuhamya: MUTEZINKA wahamagarwaga MUTEZIMBWA ubu yarenze ayo yose yitwa “CHERIE”

Ubuhamya: MUTEZINKA wahamagarwaga MUTEZIMBWA ubu yarenze ayo yose yitwa “CHERIE”
12-12-2017 saa 16:41' | By Jerome Munyentwari | Yasomwe n'abantu 4029 | Ibitekerezo 1

Mu muhango wo gusoza iminsi 16 yahariwe ibikorwa byo kurwanya ihohoterwa rikorerwa abagore n’abakobwa cyane cyane harwanywa irishingiye ku gitsina, niho hatangiye ubuhamya bw’umugore witwaga Mutezimbwa rigasimbura Mutezinka, ariko ubu ayo yose yarayarenze.

Muri iki gikorwa, umuryango wa MBARUBUKEYE Nicodem waje uturuka mu karere ka Nyagatare, mu murenge wa Musheli, watanze ubuhamya bwakoze ku mitima ya benshi ahabereye uyu muhango wo gusoza iyi minsi 16.

Ubwo hatangwaga ubuhamya, abantu hamwe barasetse, ab’imitima yoroshye bagaragaza amarangamutima yabo, abatanga amashyi barayatanga, ariko ubuhamya bwabo busozwa ababwumva batabishaka, abantu banyuzwe n’intambwe yatewe muri uyu muryango.

Mbarubukeye Nicodem afite imyaka 38, yari kumwe n’umugore we Mutezinka Scholastic afite imyaka 36 y’amavuko, n’umwana wabo bari kumwe Mugwaneza Fabline wavuze umuvugo watangaje abari aho kubera ubuhanga bugaragazwa n’uyu mwana. Aba babyeyi bavuze ko bafitanye abana 6.

Mbarubukeye yavuze ko mu bugeni bwabo umugore we yahukanye inshuro 4, kuko yumvaga atari umugore we, ngo yakundaga kumukubita amuziza ubusa, ngo n’iyo yazanaga ibiryo yarabimenaga, byose bigaterwa n’uko yikundira agacupa (Ubusinzi).

Yagize ati: "Inzoga ni zo zabinteraga, najyaga gusangira inzoga n’abandi bagabo mu kabare, bakambwira ko umugore udakubitwa asuzugura umugabo, nagera mu rugo aho kugirango muhe umwanya tuganire yanzanira ibiryo nkabimena nkamusanganiza inkoni, gusa aho byaje guhindukira, nageze mu rugo nsanga umugore wanjye yashize ubwoba imbere yanjye, ambwira ko avuye mu mugoroba w’ababyeyi ansaba ko nareka tukajya tujyana, icyo gihe namukubise iminsi 2 yikurikiranya, ndamubaza nti urashaka ko mba inganzwa aka kanya? Nyuma araza ati nushaka unyice, ariko uze tujyane ubanze wumve ibivugirwa mu mugoroba w’ababyeyi. Namuteze amatwi wagirango uwo munsi umwuka wari wamanukiye… ambwira ko amasomo y’umugoroba w’ababyeyi afasha abantu ukagirango ni nko mu rusengero,... Umunsi umwe tujyanayo, uko bigishije nkumva ndakorogoshorwa, bigishije ibyo kubaka ingo zibana mu makimbirane, nsanga ni njye babwira, gusa kuko bari bazi ko ndi umunyamahane batangira kuntunga urutoki, bati urugero ni kwa Nikodemu, byatumye mpfukama nsaba imbabazi nk’aho ngeze imbere ya penetensiya, mbabwira ko ntazabyongera”

Nikodemu yakomeje kujyayo kenshi, ndetse aza kuvuga uburyo yahohoteraga umugore we. Ati: "Nakomeje kujya kwiga nk’ujya kwigira isakaramentu, maze ingabire z’umugoroba w’ababyeyi zinjyamo, mu gihe yitwa Mutezinka njye namwitaga Mutezimbwa, ariko kugeza ubwo naramuhagurukije musaba imbabazi turahoberana, mvuga ko abaye umudamu wanjye ntazongera kumwita Mutezimbwa, mvuga ko noneho abaye umugore wanjye ntazongera kumwita Schola, ndetse nti no kumwita madamu wanjye ndabihinduye kugeza iyi saha mwise CHERIE wanjye”

Mutezinka Scholastica nawe wahamije ibi, mu magambo ye yagize ati"Kuva mu ntangiro z’urushako rwanjye sinigeze nezerwa mu buzima bwanjye nawe, tukibana ku nshuro ya mbere twaraye neza, inshuro ya kabiri arankubita ngo ari kunyereka amashyiga, nabyo biranyobera, rwose ntako nabaga ntakoze, ubwo yagendaga, nateguraga ibyo kurya, yaza nta kunsuhuza usibye kuza akubita, hari n’ubwo numvaga aje nkiruka cyangwa nkihisha, yazaga avuga ngo ndakwica, najya kumva nkumva inshyi ziravugira mu matwi, byamaze nk’amezi ane, ageze aho ati sinzagukwa nturi umugore wanjye, abagore bari iyo bari, ntuzi gukaraba, ntuzi kwisiga kandi ubwo ntako nabaga ntagize, usibye ibyo kurya n’ibindi byose bisabwa narabiteguraga ariko reka ashwi”

MUTEZINKA yemeje ko umugabo we yahindutse koko, aho yagize ati "Twari tubayeho nk’abakene dukodesha, ariko nyuma yo guhindurwa n’umugoroba w’ababyeyi ubukungu bwariyongereye, kandi byose byatewe n’umutekano n’amahoro mu rugo, twarakodeshaga, ariko ubu twaguze inzu y’ibihumbi 600 tuyishyiramo umuriro, ubu mfite uburenganzira ku mutungo wo mu rugo, mu gihe yawijyaniraga mu kabare akawupfusha ubusa, ubu naguze imashini idoda y’ibihumbi 45 by’amanyarwanda nyakuye mu itsinda, kandi mbere ntiyemeraga ko njyayo, dufite ihene nyinshi"

Umwana wabo w’umukobwa MUGWANEZA Fabline, mu buhanga bwe, yavuze mu mutwe umuvugo wanyuze benshi yise “HUMURA” agaragaza ko ihohoterwa mu ngo cyane cyane irikorerwa abagore n’abakobwa rigira ingaruka mbi cyane ku bana kurusha abakuru. Yagize ati "Umuntu uzaba intwali abihera mu buto"

Uyu muryango urashimira cyane umugoroba w’ababyeyi n’amasomo awutangirwamo, washimiye kandi uburyo umuryango AJEPRODHO Jijukirwa wababaye hafi muri byose.


INKURU ZA :
Tanga Igitekerezo
Ibitekerezo 1
pasy Kuya 16-12-2017

uwo mugabo nukr nuwo gushimwa kuba yaraciye bugufi akemera inama yagiriwe ikiruseho agasaba umufasha we imbabazi kd nanone nejejwe no kwihangana kuwo mubyeyi nibibere urugero benshi bakigirana amakimbirane

IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...