konka coffee
KONKA

AMAKURU

UKWEZI

Ibyo gushyira udukingirizo mu mashuri ntibivugwaho rumwe

Ibyo gushyira udukingirizo mu mashuri ntibivugwaho rumwe
25-01-2018 saa 06:14' | By Akayezu Jean de Dieu | Yasomwe n'abantu 1268 | Ibitekerezo 2

Bamwe mu babyeyi bo mu karere ka Rwamagana ntibavuga rumwe n’abana babo ku ngingo irebana no gushyira udukingirizo mu bigo by’amashuri aho benshi mu babyeyi bavuga ko ibi ari uburyo bwo gukurura ubusambanyi no kwigisha abana imico mibi. Gusa ku rundi ruhande hari abemeza ko ubu ari uburyo bwiza bwo kurinda indwara zandurira mu mibonano mpuzabitsina no gukumira inda zitateganyijwe zikunze guterwa abangavu bakiri mu mashuri.

Bamwe muri ibi byiciro baganiriye na Ukwezi bagaragaje ko gushyira udukingirizo mu bigo by’amashuri bisa no kwigisha abantu imico mibi ndetse no gukurura ubusambanyi, gusa ariko hari n’abandi biganjemo abanyeshuri bavuze ko iyi gahunda yafasha benshi mu kubarinda izo nda zitateganyijwe ndetse no kubarinda indwara zandurira mu mibonano mpuzabitsina.

Umunyeshuri wiga ku rwunge rw’amashuri rwa Gishari waganiriye na Ukwezi, yagize ati “Ngewe mbona ari nk’uko baba bashaka kwigisha abana ibintu bijyanye n’ubusambanyi, igihe babibonye nyine nabo bajya barwana ishyaka ryo kubikoresha (Udukingirizo) kuko babibonye”

Yakomeje agira ati “Udukingirizo batuzanye nko mu kigo abanyeshuri urumva bajya babikurura ubusambanyi kuko abantu benshi baterwa inda baziterwa n’abasore baba hanze rero mbona udukingirizo twaba tudafite akamaro mu mashuri”

Iraguha Yvette nawe wiga mu mwaka wa Gatatu w’amashuri yisumbuye kuri iki kigo yagize ati “ Birakwiye cyane kuko utwo dukingirizo batuzanye hari byinshi baba bakemuye kuko kuvuga ngo bakazanye ngo byatuma abanyeshuri barushaho ngo kugira uburara nk’ubwongubwo? Oya! Hari byinshi byaba bikemuye izo nda ziba zitateganyijwe zahagarikwa byacika kabisa”

Yakomeje agira ati “Hari icyo byadufasha, n’abanyeshuri ubwabo erega biraba cyane, ariko nkatwe twiga dutaha izo nda baziterwa n’abantu bo hanze.”

Yvette kandi yavuze ko icyo bifuza ari uko utu dukingirizo bajya batuzana mu mashuri bakabigisha no kudukoresha mu rwego rwo kubafasha kwikingira mu buryo bwiza.

Nyinawumuntu Cecile, Umunyamabanga muri Gs Gishari, iherereye mu Murenge wa Gishari, Akarere ka Rwamagana we yavuze ko iki kintu cyo gushyira udukingirizo mu bigo by’amashuri ari byiza ariko bikaba akarusho mu bigo bicumbikira abanyeshuri.

Yagize ati “Rwose ngewe mbona byaba ari byiza, byaba byiza kubera ko yego abana ntabwo tuba tubashora mu busambanyi cyangwa kugira gute (……) Ariko nk’iyo urebye hanze aha uko hameze n’abana benshi ubona batwara inda z’indaro batarageza igihe mbona nk’icyo kintu cy’udukingirizo kudushyira mu bigo by’amashuri byaba byiza.”

Kumutariza Marie Assumpta, umubyeyi utuye mu mudugudu wa Nyakabungo akagari ka Bwisange, umurenge wa Gishari ho mu karere ka Rwamagana, Intara y’Iburasirazuba we yabwiye Ukwezi ko gushyira udukingirizo mu mashuri ari ukwigisha abana ubusambanyi

Yagize ati “Agakingirizo se mama? Yego numvishe bavuga ngo ni nka mituweri ariko kariya nako numva kaba gakuruye imico mibi, mwahura ati ntufite agakingirizo ati akira aya ngaya bakagakoresha noneho yazageraho akamenyera akanibagirwa bakaba bakorera aho akaba arasamye ya nda atateganyijwe”

Mu kuboza 2017, Ubwo yari mu nama n’abayobozi bagize inzego zinyuranye mu Ntara y’Amajyaruguru, Musenyeri Servilien Nzakamwita, umushumba wa Diyosezi ya Byumba yavuze ko kumenyereza abana udukingirizo bituma birekura, bakishora mu busambanyi kuko baba beretswe ko mu gihe hari udukingirizo gusambana babyemerewe.

Ati “Hari n’ababyeyi babivuga ngo umwana we iyo yagiye ku ishuri abishyira (udukingirizo) mu isakoshi ye agira ngo nagira ibyago yitabare! Ibyo rero bituma abana birekura tukazabura aho tubigarurira.”

Nyinawumuntu Cecile, Umunyamabanga muri Gs Gishari Kumutariza Marie Assumpta,, Umubyeyi ufite abana b’abakobwa avuga ko bidakwiye gushyira udukingirizo mu mashuri


INKURU ZA :
Tanga Igitekerezo
Ibitekerezo 2
Huh Kuya 30-01-2018

Ibyo ni ubusambanyi burigukururwa turabyamaganye! Acceleration du peche!

alfa Kuya 25-01-2018

Ndabasuhuje. Nka mwalimu kandi w’umubyeyi ibyo simbyemeye, kuko kubyemera ubwabyo bitanga isura y’uko umunyeshuri yemerewe imibonano mpuzabitsina kandi si byo na busa. Aho kubigira rusange, uwakumva ko bikwiye yajya aganiriza umwana we mu ibanga akajya amu packingira utwo dukingirizo. Ibi byarinda abana bagifite indangagaciro kugwa mu bishuko. Rwose mudufashe iyi topic sinyifuza no mu byaganirwaho. Murakoze cyane.

IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...