AMAKURU

UKWEZI
ubumwe

Abandi bantu 15 bafashwe bakurikiranyweho kwiba umuriro w’amashanyarazi

Abandi bantu 15 bafashwe bakurikiranyweho kwiba umuriro w’amashanyarazi
27-09-2019 saa 17:30' | By Chief Editor | Yasomwe n'abantu 5235 | Ibitekerezo

Ikigo cy’igihugu gishinzwe Ingufu, REG, cyatangaje ko mu mukwabu wakozwe muri iki cyumweru kuva ku wa 20 Nzeri, hafashwe abantu 15 bakekwaho kwiba amashanyarazi bakoresha mu ngo zabo cyangwa mu bikorwa by’ubucuruzi.

Ni umukwabu wakozwe na REG ifatanyije n’inzego zirimo Urwego rw’Igihugu rw’Ubugenzacyaha, RIB, Polisi y’u Rwanda n’abaturage.

Ku wa 26 Nzeri 2019 hafashwe Nsanzabera Daniel n’umuyobozi wa koperative CEPTL bo mu Mirenge ya Gahunga na Cyanika mu Karere ka Burera, bakekwaho kwiba amashanyarazi bakoresha mu ngo zabo.

Kuri iyo tariki kandi mu Murenge wa Gahunga hafatiwe Kanani Benjamin n’umuhungu we Nsanzabera Daniel, bakekwaho kwiba umuriro bakoresha mu nzu ebyiri, imwe ikorerwamo ububaji n’indi irimo icyuma gishya.

Naho ku wa 25 Nzeri 2019 hafashwe Ndadaye Melchior, Rutazihana Damascène na Sibomana Jean Claude bo mu Murenge wa Nduba mu Karere ka Gasabo, bakekwaho kwiba ibikoresho by’amashanyarazi bya REG. Hanafashwe Nzamurambaho Felicien, Niyonzima Joseph, Hitimana Eugene na Ayirwanda Benoit, bakekwaho kwiba amashanyarazi bakoresha mu ngo zabo mu Murenge wa Tumba, mu Karere ka Huye.

Ku wa 24 Nzeri 2019, Hategekimana Jean Baptiste yafashwe akekwaho kwiba amashanyarazi muri Centre y’ubucuruzi ya Gaseke yo mu Murenge wa Kabaya mu Karere ka Ngororero, hanafatwa Bigirimana Léonard uhakorera ubucuruzi.

Ku wa 21 Nzeri 2019 mu Murenge wa Kamembe mu Karere ka Rusizi hafatiwe Nshimiyimana Emmanuel, wafatanywe ibikoresho byifashishwa mu kwiba amashanyarazi; ku wa 20 Nzeri 2019 i Kabuga mu Murenge wa Rusororo mu Karere ka Gasabo hafatirwa Kubwimana Eric akekwaho kwiba amashanyarazi akoresha mu nzu atuyemo.

Muri abo 15, abantu 13 barafunzwe ndetse amadosiye yabo ari gukurikiranwa na RIB, abandi babiri aribo Kanani Benjamin n’umuhungu we Nsanzabera Daniel baratorotse, bari gushakishwa.

Umuyobozi Ushinzwe kurwanya ibihombo muri EUCL-REG, Nkubito Stanley, yamaganye ubujura bw’amashanyarazi, avuga ko butazihanganirwa kandi ko ingamba zo kuburwanya zakajijwe. Yongeyeho ko ubwo bujura bukoma mu nkokora iterambere ry’igihugu kandi ko bushobora guteza ibibazo bitandukanye.

Nkubito yavuze ko abenshi mu bafashwe byashobotse ku bufatanye bw’abaturage n’amatangazo yatanzwe, ahamagarira abaturage gufatanya n’inzego z’umutekano mu kugaragaza abiba amashanyarazi.

Kuva mu Ukuboza 2018, REG ikoresha uburyo butandukanye mu gutahura abakora ubujura bw’amashanyarazi kugira ngo bagezwe mu butabera.

Imibare ya REG yerekana ko igihombo mu bucuruzi bw’ingufu z’amashanyarazi kikiri hejuru, kuko kingana na 6.5 ku ijana by’ingufu zitunganywa mu gihugu hose kandi ahanini giterwa n’ubwo bujura. Imibare y’umwaka ushize igaragaza ko umuriro wibwe wari ufite agaciro ka miliyari 1.9 frw.

Itegeko rigenga amashanyarazi mu Rwanda nk’uko ryahinduwe kugeza ubu, riteganya ko umuntu winjira muri mubazi mu buryo butemewe, ukoresha uburyo butemewe mu gufata, gukurura,kuyobya, gutuma hafatwa, havanwa ku muyoboro w’umuriro w’amashanyarazi cyangwa ukoresha umuriro w’amashanyarazi yahawe mu buryo bw’uburiganya cyangwa butemewe n’amategeko, aba akoze icyaha.

Iyo abihamijwe n’urukiko ahanishwa igifungo kitari munsi y’amezi atandatu ariko kitarenze umwaka umwe n’ihazabu y’amafaranga y’u Rwanda atari munsi ya 1.000.000 Frw ariko atarenze 5.000.000 Frw cyangwa kimwe gusa muri ibyo bihano.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...