AMAKURU

UKWEZI

Kigali: Yafatanywe uruhinja yemera ko yarwibye nyuma yo kubeshya umugabo we ko atwite

Kigali: Yafatanywe uruhinja yemera ko yarwibye nyuma yo kubeshya umugabo we ko atwite
12-02-2018 saa 06:45' | By Chief Editor | Yasomwe n'abantu 4120 | Ibitekerezo 1

Kuwa Gatanu tariki 9 Gashyantare Polisi y’u Rwanda yasubije Uwimana Agnes uruhinja rwe rw’amezi 2, rwari rwatwawe na Beatrice Nyirankuriza ufite imyaka 30, ubu akaba afunzwe akurikiranyweho kwiba uwo mwana.

Umuvugizi wa Polisi y’u Rwanda mu mujyi wa Kigali Senior Superintendent of Police (SSP) Emmanuel Hitayezu yavuze ko tariki 6 Gashyantare aribwo uyu Nyirankuriza yaje mu murenge wa Gitega mu karere ka Nyarugenge agasanga Uwimana Agnes akamushuka ko ari umuturanyi we ndetse amwigiraho inshuti ako kanya ariko agamije kumwiba uruhinja yari afite.

SSP Hiyatayezu yagize ati”Ubundi uyu Uwimana Agnes akora ubucuruzi buciriritse hariya mu Gitega, Nyirankuriza rero yaraje aramwegera amwigiraho inshuti ndetse amubwira ko ari umuturanyi, ahita asaba Uwimana kumuha umwana ngo amumufashe mu gihe arimo kwakira abakiriya. Uwimana yaherutse aha uwo mugore umwana ntiyongera kumubona”.

SSP Hitayezu avuga ko Uwimana amaze kubura umwana we yagiye kubariza aho uwo mugore yari yamubwiye ko atuye, abahatuye bamubwira ko uwo mugore batamuzi ndetse ko atanahatuye. Nibwo yahise abimenyesha ubuyobozi bwa Polisi y’u Rwanda ikorere mu murenge wa Nyarugenge.

Bigeze mu ijoro ryo ku itariki ya 8 Gashyantare abaturage bo mu Mudugudu wa Munini mu kagari ka Nyakabanda ya mbere mu murenge wa Nyakabanda aho uwo mugore atuye(Nyirankuriza) babonye afite uruhinja kandi batarigeze bamubona atwite ndetse bavuga ko atigeze atwita, birabatangaza ariko bibatera amakenga bahita bamufata bamushyikiriza ubuyobozi bwa Polisi mu murenge wa Rwezamenyo.

Uyu mugore amaze kugezwa kuri Polisi yahise yemera ko yibye urwo ruhinja kuko yari yarabeshye umugabo we ko atwite.

Ni nyuma y’aho uyu mugore aviriye iwabo ku ivuko mu karere ka Karongi akagaruka abeshya umugabo we ko noneho atwite , nyamara yari yarangije gucura umugambi wo kwiba umwana kugira ngo agabanye uburakari bw’umugabo we. Ubusanzwe Nyirankuriza n’umugabo we bari bamaranye imyaka isaga itanu batarabyara umwana.

SSP Hitayezu avuga ko uruhinja rwahise rujyanwa mu kigo Isange One Stop Center kugira ngo harebwe ko nta kibazo rufite.

Yagize ati”Uruhinja tukimara kurubona twahise turujyana kwa muganga mu kigo Isange One Stop Center kugira ngo hasuzumwe ko nta kibazo cy’ubuzima rufite. Kubw’amahirwe twasanze nta kibazo cy’ubuzima rufite, ubu twarusubije nyina”.

Kugeza ubu uyu Nyirankuriza wari wibye uru ruhinja afungiwe kuri sitasiyo ya Polisi mu murenge wa Rwezamenyo mu gihe iperereza rigikomeza.

Uyu mugore akurikiranyweho icyaha cyo kwiba umwana ku babyeyi be, ingingo ya 224 mu gitabo cy’amategeko ahana ibyaha mu Rwanda ivuga ko uwibye umwana ku babyeyi be cyangwa abandi bamurera ahanishwa igifungo kuva ku mwaka umwe kugera ku myaka 3 ndetse n’amande y’amafranga kuva ku bihumbi 500 kugeza kuri Miliyoni 5.


INKURU ZA :
Tanga Igitekerezo
Ibitekerezo 1
Jean Paul UWIHOREYE Kuya 7-03-2018

Mana kutabyara birababaza shenge!!!!gusa polisi nimubabarire kuko nawe siwe ni ugushaka umwana!!!!

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...