AMAKURU

UKWEZI
ubumwe

Nyanza: Umukobwa w’ imyaka 18 akurikiranyweho kwica se amukubise umuhini mu mutwe

Nyanza: Umukobwa w’ imyaka 18 akurikiranyweho kwica se amukubise umuhini mu mutwe
10-10-2019 saa 17:44' | By Nsanzimana Ernest | Yasomwe n'abantu 4180 | Ibitekerezo

Umukobwa w’ imyaka 18 wo mu karere ka Nyanza akurikiranyweho kwica umubyeyi we w’ imyaka 56 amukubise umuhini mu mutwe. Ubuyobozi burasaba abafitanye amakimbirane kwegera abayobozi bakabafasha kuyakemura hakiri kare.

Ku wa Kabili tariki 8 Ukwakira 2019 nibwo uyu mukobwa witwa Batamuriza Mediatrice wo mu mudugudu wa Gakenkeri B Akagari ka Nyanza Umurenge wa Busasamana yaba yarakubise se umuhini nk’ uko bitangazwa n’ ubuyobozi bw’ inzego z’ ibanze.

Umunyamabanga Nshingwabikorwa w’ Umurenge wa Busasamana Bizimana Egide yatangarije UKWEZI ko uyu musaza witwaga Nkurikiyimfura Jean Baptiste akimara gukubitwa umuhini inzego z’ ubuyobozi na RIB bagiye aho icyaha cyabereye bata muri yombi uyu mukobwa naho se ajyanwa ku kigo nderabuzima.

Uyu musaza bivugwa ko yari yasinze akigera ku kigo nderabuzima bahise bamwohereza ku bitaro bya CHUB ari naho yapfiriye kuri uyu wa 10 Ukwakira 2019 saa munani z’ amanywa.

Nkurikiyimfura n’ umukobwa we bari bafitanye amakimbirane kuko abagiye kubatabara umusaza akimara gukubitwa agatabaza basanze bari gutongana.

Gitifu Bizimana avuga ko atazi icyo ayo makimbirane ashingiyeho gusa avuga ngo ubwo Urwego rw’ igihugu rw’ ubugenzacyaha RIB ruri gukora iperereza kuri iki kibazo iby’ ayo makimbirane bizamenyekana.

Arasaba abafitanye amakimbirane kujya bayageza mu buyobozi bukabafasha kuyakemura bitaragera aho umwe yica undi.

Ati “Ubutumwa duha abaturage ni uko igihe bafite amakimbirane cyangwa bafite kutumvikana mu miryango yabo, bajya babigeza ku mudugudu, akagari cyangwa umurenge cyangwa bakitabaza n’ izindi nzego RIB zigashaka uko cyakemuka aho kugira ngo umuntu ufitanye amakimbirane n’ undi agere aho amukubita bikamuviramo urupfu nk’ uko kuri iki kibazo byagenze”.

Ubuyobozi bw’ Umurenge wa Busasamana buvuga ko ari ubwa mbere ikibazo nk’ iki kibaye.

Batamuliza Mediatrice ukekwaho gukubita se umuhini bikamuviramo urupfu afungiye kuri Sitasiyo ya Polisi mu murenge wa Busasamana.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...