AMAKURU

UKWEZI
RPF

Gisagara: Abiyitiriye umushinga urihira abana amafaranga y’ishuri batawe muri yombi

Gisagara: Abiyitiriye umushinga urihira abana amafaranga y’ishuri batawe muri yombi
24-05-2018 saa 08:39' | By Akayezu Jean de Dieu | Yasomwe n'abantu 2705 | Ibitekerezo 3

Polisi y’u Rwanda ikorera mu Ntara y’Amajyepfo yataye muri yombi abagabo barimo Niyomugabo Eugene, Uwimana Gaudence na Semanzi Emmanuel bagendaga basaba amafaranga abaturage bo muri Gisagara bababwira ko bazaha abana babo ubufasha burimo kubarihira amafaranga y’ishuri, kubagurira imyambaro no kubaha ibiryo; ariko ko bababeshyaga kuko bababwiraga ko bazafashwa n’Umushinga bakorera witwa OPEDEI; kandi warahagaritse ibikorwa wakoraga byo gufasha abana bo mu miryango itishoboye hamwe n’abana baba ku mihanda; uyu mushinga ukaba warakoreraga mu mirenge ya Mbazi na Ngoma , mu karere ka Huye.

Mu gitondo cyo kuwa Kabiri itariki 22 Gicurasi 2018, nibwo Polisi yo mu karere ka Gisagara yafashe aba bantu batatu bivugwa ko bakekwaho ubwambuzi bushukana bw’amafaranga bakoreye abatuye akagari ka Bweya, umurenge wa Ndora, mu karere ka Gisagara.

Umuvugizi wa Polisi y’u Rwanda mu Ntara y’Amajyepfo, Chief Inspector of Police (CIP) Emmnauel Kayigi, yavuze ko basabaga amafaranga y’u Rwanda Magana ane ku mwana umwe; bakavuga ko ari ayo kugira ngo ashyirwe ku rutonde rw’abazafashwa; bakaba bari bamaze kuvana mu baturage amafaranga y’u Rwanda 60, 800.

Yagize ati,"Bamwe mu bo batse amafaranga ni bo babimenyesheje Polisi nyuma y’aho batahuriye ko ari Abatekamutwe bagamije kubarwa utwabo. Polisi yabafatiye mu cyuho barimo kwaka amafaranga, ibashyikiriza Urwego rw’Igihugu rw’Ubugenzacyaha (RIB).

Yagiriye inama abatuye iyi Ntara yo kurangwa n’ubushishozi; kandi bakagira amakenga kugira ngo birinde kuribwa amafaranga na ba Rutemayeze nk’aba bakoresha amayeri atandukanye kugira ngo bagere ku migambi yabo; abenshi muri bo bakaba bakora icyaha cy’ubwambuzi bushukana biyita abakozi b’inzego zitandukanye.

CIP Kayigi yagarutse ku kamaro ko gutangira amakuru ku gihe agira ati,"Aba batatu bafatiwe mu cyuho kubera ko bamwe mu bo batse amafaranga batanze amakuru ku gihe. Gutangira amakuru ku gihe ni ingenzi cyane kuko bituma inzego zibishinzwe zikumira ibyaha; bikaba kandi bituma hafatwa ababikoze."

Ubwambuzi bushukana buhanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva kuri miliyoni eshatu (3.000.000) kugeza kuri miliyoni eshanu (5.000.000) nk’uko biteganywa n’Ingingo ya 318 y’Igitabo cy’Amategeko ahana ibyaha mu Rwanda.


INKURU ZA :
Tanga Igitekerezo
Ibitekerezo 3
Kwizera Kuya 5-06-2018

Ikorera Huye Ngoma kW Itaba

lulu Kuya 24-05-2018

Bazi kwihutira kwandika ibinyoma gusa ese bagiye babanza kumva neza inkuru

OPDE Kuya 24-05-2018

Mwiriwe ,,mwibeshye kwandika inkuru,OPDE/Rwanda irakora ntago yahagaze kandi iracyafasha abana bafite ibibazo n’abo mu muhanda ariko abo biyitirira OPDE barabeshya ,,aho mwanditse ko ikorera I mbazi mwibeshye ikorera ku i Taba mu mujyi wa Huye,I mbazi nikigo cy’imyuga cya OPDE!!murakoze

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...