AMAKURU

UKWEZI
cheno 2020

Huye: Batewe ubwoba n’ icyobo kimaze gupfiramo ihene 5 no kuvunikiramo umukecuru

Huye: Batewe ubwoba n’ icyobo kimaze gupfiramo ihene 5 no kuvunikiramo umukecuru
14-12-2019 saa 07:52' | By Nsanzimana Ernest | Yasomwe n'abantu 2225 | Ibitekerezo

Abaturage bo mu karere ka Huye murenge wa Mukura mu kagari ka Bukomeye umudugudu wa Bweramana bavuga ko batewe ubwoba n’ icyobo Abashinwa bakuyemo laterite bagasiga batahasubiranyije.

Iki cyobo cyacukuwe kuva mu myaka 10 ishize nk’ uko abahatuye babivuga. Kugeza ubu hari uruhade rufite uruhavu rurerure ruhora rutenguka ari narwo abaturage bavuga ko hahanutsemo umukecuru akavunika akajyanwa kwa muganga akamarayo amezi 6 nk’ uko byemezwa na Nyirambonimana Vestine uhaturiye akaba anahafite isambu.

Aganira na UKWEZI yagize ati “Kiriya cyobo ku mutekano wacu urahungabana. Iyo umuntu agiye kwicira inshuro avuga y’ uko asanga abana baguyemo. N’ abantu bakuru bagwamo nkanswe abana. Umuntu waguyemo ntabwo yari yasinze ahubwo yari agiye gusura umukobwa we hano hirya aranyerera ahita yikubitamo yanabaye mu bitaro igihe”.

Nyirambonimana avuga ko iki cyobo cyanaguyemo ihene ye ihaka ikaramburura. Ati “Icyo dusaba ubuyobozi ni uko iki cyobo bagisiba cyangwa bakatwimura. Reba nk’ ubu haguyemo ihene yanjye ihaka ihita irambura abana batatu none byananteye ubukene nta rindi tungo ngira”.

Hakizimana Emmanuel avuga ko iki kinogo ari Abashinwa bagicukuye batwara laterite zo gukoresha umuhanda. Uyu mugabo utuye muri metero zitageze kuri 30 uvuye kuri iki kinogo avuga ko haguyemo ihene ze ebyiri zirapfa.

Agira ati “Uko imvura iguye hahita hariduka, uko iguye hariduka n’ ubu harakatse. Hamaze kugwamo abantu batatu n’ amatungo harimo ayagiye ahapfira, haguyemo ihene ebyiri zanjye zirapfa”.

Ngabo Fidele, Umunyamabanga Nshingwabikorwa w’ umurenge wa Mukura avuga ko bafatanyije n’ urubyiruko bafite gahunda yo gusiba iki kinogo no kuhatunganya hakaba ikibuga cyiza cy’ umupira.

Agira ati “Ubundi mu bijyanye no gucukura kariyeri hari amabwiriza avuga uburyo abahacukuye bagomba gusiga bahasubiranyije, twebwe ku rwego rw’ umurenge mu gihe akarere hari ukuntu gashobora gukurikirana abahakoreye bagakurikiza amabwiriza, hari icyo twiyemeye nk’ abaturage b’ umurenge wacu”.

Yakomeje agira ati “Turebye nk’ imiterere yaho ni ahantu hashobora kuba ikibuga cyiza cy’ imikino. Twavuze ko tugiye gukorana n’ urubyiruko, tukagira uburyo tuhakora mu buryo bw’ umuganda dusa n’ abahashyira ibintu bimeze nk’ amatarasi ku buryo hatakongera guteza ikibazo”.

Abaturiye iki kinogo bavuga ko kimaze imyaka irenga 10 gicukuwe kandi ko Abashinwa bahacukuye mbere n’ umugabo witwa Muhire wahacukuye nyuma ashaka laterite yo gukoresha muri sitade ya Huye nta ngurane yaho bigeze babaha.



Iki kinogo kiri munsi y’ ishuri rya G.S.Mubumbano


Aho Abashinwa bacukuye iki cyobo bakuramo laterite n’ imbere y’ ibiro by’ akagari ka Bukomeye


Gitifu Ngabo Fidele asaba abaturage kwirinda gusohora amatungo mu rugo kuko binyuranyije n’ amabwira agenga aborozi


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...