konka coffee
KONKA

AMAKURU

UKWEZI

Kirehe: Umukobwa yari ajyanywe gucuruzwa mu mahanga Polisi irahagoboka

Kirehe: Umukobwa yari ajyanywe gucuruzwa mu mahanga Polisi irahagoboka
13-06-2018 saa 07:28' | By Akayezu Jean de Dieu | Yasomwe n'abantu 4176 | Ibitekerezo 1

Ku Cyumweru tariki 10 Kamena 2018, Polisi y’u Rwanda ikorera mu karere ka Kirehe yatabaye umukobwa w’imyaka 19 y’amavuko bivugwa ko yari ajyanwe gucuruzwa mu mahanga, abagabo babiri bakekwaho kuba aribo bari bamujyanye bahise bafatwa batabwa muri yombi na Polisi aho ibakurikiranyeho icyaha cyo gucuruza abantu

Abafashwe bakekwaho iki cyaha ni Jean Pierre Hakizimana utuye mu kagari ka Kiyanzi, Umurenge wa Nyamugari; wo mu karere ka Kirehe na Amon Ruhamo; aba bombi bakimara gufatwa bashyikirijwe Urwego rw’Igihugu rw’Ubugenzacyaha.

Umuvugizi wa Polisi mu Ntara y’Iburasirazuba, Chief Inspector of Police (CIP) Theobald Kanamugire yavuze ko uyu mukobwa yatabawe ubwo aba bagabo bendaga kumujyana hanze y’u Rwanda baciye ahantu hatemewe n’amategeko.

CIP Kanamugire yagize ati,"Uyu mukobwa yagaragaye ubwo bashakaga kumunyuza mu nzira itemewe yambuka umupaka, hafi y’Uruzi rw’Akagera. Kuba yari wenyine hamwe n’abagabo babiri byateye Polisi muri aka karere kugira amakenga; ibikurikiranye, isanga barashakaga kujya kumucuruza mu mahanga; iburizamo uwo mugambi mubisha, ifata aba bombi bari bamujyanye."

Yavuze ko aba bagabo babeshye uwo mukobwa (amazina ye yagizwe ibanga) ko bazamushakira akazi gahemba umushahara minini ko kwita ku bana mu gihugu cya Malawi; aho bari kugera baciye mu gihugu cya Uganda nk’uko babitangaje.

CIP Kanamugire yagize ati,"Abakora iki cyaha cy’icuruzwa ry’abantu babwira abo bashuka ko bazagira imibereho myiza mu bihugu bashaka kubajyanamo. Babizeza ko nibagerayo bazahabwa imirimo myiza ibahemba umushahara munini; ariko iyo babagejejeyo, babambura ibyangombwa byose; barangiza bakabakoresha imirimo ivunanye nta gihembo; ubundi bakabashora mu bikorwa by’urukozasoni nk’ubusambanyi; ndetse bamwe muri bo barababaga bakabakuramo zimwe mu ngingo z’umubiri nk’impyiko bakazigurisha abazikeneye ku mpamvu zitandukanye."

Yagiriye inama urubyiruko; dore ko ari bo bakunze gushuka, kwima amatwi umuntu wababwira ko ashaka kubajyana mu mahanga abizeza imirimo ihemba menshi, amashuri meza, n’ibindi bitangaza; haramuka hagize umuntu ubibabwira, bakabimenyesha Polisi cyangwa inzego z’ibanze kugira ngo bikurikiranwe.

Bifatwa nk’icuruzwa ry’abantu ibikorwa bihindura umuntu igicuruzwa bijyanye no gushakisha cyangwa kwimurira umuntu ahandi mu gihugu cyangwa mu mahanga hakoreshejwe uburiganya, ibikangisho, imbaraga cyangwa agahato, ububasha ubikora aba amufiteho, akenshi hagamijwe kumwangiriza ubuzima cyangwa kumubyaza inyungu zitemewe akoreshwa mu biterasoni, mu buraya, mu bikorwa binyuranyije n’amategeko, mu bisa n’ubucakara, kumwica urubozo no kumukorera urugomo ndengakamere cyangwa kumukoresha imirimo yo mu rugo nk’umuja, hishingikirijwe intege nke umuntu afite zikomoka ku bibazo afitanye n’ubuyobozi, ku gutwita k’umugore wibana, indwara, ubumuga n’ibindi bibazo byatuma umuntu muzima akora icyo atatekereje nk’uko biteganywa n’ingingo ya 250 y’Itegeko Ngenga N° 01/2012/OL ryo ku wa 02/05/2012 rishyiraho Igitabo cy’Amategeko ahana ibyaha mu Rwanda.

Byitwa kandi gucuruza abantu, kubashakamo inyungu hakoreshejwe kubagira abasabirizi ku gahato, kubabera ababyeyi batababyaye hakoreshejwe ikiguzi mu buryo butemewe n’amategeko, kubakoresha mu mashusho y’urukuzasoni, mu masiporo abangamiye ubuzima, kubashora mu ntambara, kubana na bo nk’umugore n’umugabo hagamijwe iyicarubozo n’icuruzwary’ingingo z’imibiri yabo nk’uko iyi ngingo ikomeza ibivuga.


INKURU ZA :
Tanga Igitekerezo
Ibitekerezo 1
kubwimana elyse Kuya 21-06-2018

OK murakoze kurayamakuru mutujyezaho ibi biriho koko

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...