AMAKURU

UKWEZI

Mu mafoto: Polisi y’u Rwanda yizihije isabukuru y’imyaka 18 imaze ishinzwe

Mu mafoto: Polisi y’u Rwanda yizihije isabukuru y’imyaka 18 imaze ishinzwe
17-06-2018 saa 01:01' | By Akayezu Jean de Dieu | Yasomwe n'abantu 2758 | Ibitekerezo

Tariki ya 16 Kamena 2000 kugera kuwa 16 Kamena 2018 imyaka 18 irashize Polisi y’u Rwanda ishinzwe. Uyu munsi mukuru wizihijwe ku cyicaro cya Polisi y’u Rwanda ku Kacyiru ahari abashitsi batandukanye biganjemo abafatanyabikorwa ba Polisi y’u Rwanda mu kubungabunga umutekano.

Uyu munsi mukuru wizihijwe hanasozwa icyumweru cyahariwe ibikorwa bya Polisi y’u Rwanda mu nsanganyamatsiko igira iti ’ Duture mu mudugudu utarangwamo icyaha”. Muri iyo minsi hakozwe ubukangurambaga bugamije gukumira no kurwanya ibyaha bitandukanye ndetse hanubakwa ibiro by’imidugudu itanu muri buri Ntara n’Umujyi wa Kigali yubatswe na Polisi kubera ko yabaye indashyikirwa mu kwibungabungira umutekano no kuba itararanzwemo icyaha mu myaka ishize.

Umuyobozi mukuru wa Polisi y’u Rwanda IGP Emmanuel K Gasana mu ijambo rye yashimiye Nyakubahwa Perezida wa Repubulika Paul kagame washyizeho Polisi mu 2000 n’abaturage kubera ubufatanye mu kwibungabungira umutekano.

Yakomeje agira ati “Ni umunsi wo kureba aho tuvuye no gusubiza amaso inyuma kugira ngo dukomeze dutere imbere. Mu myaka 18 hongerewe ubushobozi n’ubumenyi bw’abapolisi, twashoboye kubaka inyubako n’amacumbi y’abapolisi, twubatse amashuri. Twagize ubufatanye n’imiryango mpuzamahanga no mu butumwa bw’amahoro, twubatse icyizere mu baturage kuko dufite umutekano usesuye. Byagezweho ku bufasha bwa Nyakubahwa Perezida wa Repubulika Paul Kagame na Minisiteri y’ubutabera n’izindi nzego ndetse n’abaturage ubwabo”.

IGP Gasana yagarutse ku bikorwa byaranze icyumweru cy’ibikorwa bya Polisi y’u Rwanda aho yavuze ko inzira ikiri ndende mu kubaka igihugu cyacu. Yasoje vuga ko gutura mumudugudu utarangwamo icyaha bishoboka kubera ubufatanye bw’inzego zose n’abaturage.

Gasamagera Wellars akuriye ba Ambasaderi ba Polisi y’u Rwanda mu gukumira no kurwanya ibyaha. Yavuze ko bashishikariza abandi bakorana mu nzego zitandukanye kubaka igihugu cyacu. Yakomeje avuga ko akazi ka Polisi kagenda neza kurushaho iyo ifatanyije n’abanyarwanda n’abaturarwanda.

Yagize ati "Duterwa ishema no kuba ibyo Polisi y’u Rwanda igeraho tubigiramo uruhare. Ndakangurira buri wese kugira uruhare mu gucunga umutekano kuko ariwo musingi w’iterambere”.

Yizeje gukomeza ubufatanye na Polisi y’u Rwanda, asaba abandi bitabiriye uyu munsi mukuru wa Polisi gufatanya nayo gukumira ibyaha, asoza avuga ko igihugu cyacu kigomba kuba igihugu kizira ibyaha.

Umunyamabanga wa Leta muri Minisiteri y’Ubutabera ushinzwe Itegeko nshinga n’andi mategeko ,Uwizeyimana Evode mu ijambo rye, yavuze ko iyi myaka 18 Polisi y’u Rwanda imaze ishinzwe ari ingenzi kuko umutekano uhari hose mu gihugu ku bufatanye n’abaturage.

Yagize ati: “U Rwanda ruri mu bihugu bya mbere muri Afurika aho ruri ku mwanya wa kabiri mu bihugu bifite Polisi ikora neza inyuma ya Botswana. Byagezweho kubera ubufatanye bw’inzego zose n’abaturage na Polisi. Gucunga umutekano ni uguhozaho, bisaba gukorera hamwe mu bufatanye.

Yagarutse ku bikorwa bya Polisi byari bimaze ukwezi mu nsanganyamatsiko igira iti: Duture mu mudugudu utarangwamo icyaha hibandwa ku bufatanye mu gukumira ibyaha.

Minisitiri Evode uwizeyimana yasoje asaba ko ubufatanye mu kubungabunga umutekano no gukumira ibyaha bwakomeza buri wese akabigiramo uruhare. Umuyobozi mukuru wa Polisi y’u Rwanda IGP Emmanuel K Gasana Gasamagera Wellars akuriye ba Ambasaderi ba Polisi y’u Rwanda mu gukumira no kurwanya ibyaha. Umunyamabanga wa Leta muri Minisiteri y’Ubutabera ushinzwe Itegeko nshinga n’andi mategeko, Uwizeyimana Evode


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...