AMAKURU

UKWEZI
cheno 2020

Polisi y’u Rwanda yamaganye Bishop Rugagi wavuze ko asengera covid-19 igakira iti ‘Ntabwo byamugwa amahoro’

 Polisi y’u Rwanda yamaganye Bishop Rugagi wavuze ko asengera covid-19 igakira iti ‘Ntabwo byamugwa amahoro’
23-04-2020 saa 21:16' | By Nsanzimana Ernest | Yasomwe n'abantu 2633 | Ibitekerezo 1

Polisi y’u Rwanda yasabye Abaturarwanda kwima amatwi abapasiteri bababwira ko basengera coronavirus igakira, ivuga ko ari ugushuka abaturage, ibasaba gukomeza kubahiriza amabwiriza yo kwirinda iki cyorezo kimaze guhitana abarenga ku bihumbi 180 mu Isi.

Umuvugizi wa Polisi y’ u Rwanda CP John Bosco Kabera yabwiye RBA ko abapasiteri bavuga ko basengera coronavirus igakira babeshya, asaba Abamyarwanda kudaha agaciro bene ubu butumwa.

Yagize ati “Umuntu uwariwe wese ubikangurira Abanyarwanda yaba ari kubashuka kandi ntabwo byamugwa amahoro. Abanyarwanda bakwiye kumvira amabwiriza bahawe n’ubuyobozi bwabo yo kwirinda covid-19”.

Ni nyuma y’uko ku mbuga nkoranyambaga hakomeje gukwirakwira akavidewo ka Bishop Innocent Rugagi, umushumba w’Itorero Redeemed Gospel Church avuga ko asengera abarwayi ba covid-19 bagakira, aho agatanga ingero z’abo avuga ko bakize.

Muri iyo videwo yatambutse kuri TV7, Bishop Rugagi yagize ati “Nawe nuyirwara, iyo nimero iri kuri televiziyo yawe, uyihamagare. Ndakubwira nti uramutse upfuye, uzatangaze ngo ndi umuhanuzi w’ibinyoma. Uzatinye icyo ntangaje ku mugaragaro. Sindi umupfumu uragura aho bihisha. Ndavuga ku mugaragaro Isi yose ibibona.’’

Akomeza agira ati “Ndashima Imana, ubutumwa ndabufite bw’abakize COVID-19. Ni ibitangaza byabaye ku buzima bwawe. Abo ni bo nibuka ubutumwa mwanyoherereje, Imana ishimwe ko mwohereje izindi zivuga ko mwakize icyo cyago cyateye Isi. Icyo nicyo gitangaza, ndababwiye ngo banywe amazi ashyushye. Mwizere Yesu, nyuma yo kuyanywa kira icyo cyago cyawe.”

CP Kabera avuga ko abavuga ko basengera abarwayi ba covid-19 bagakira ataribyo, ndetse ngo bibangamiye ishyirwamubikorwa ry’ingamba za guverinoma y’u Rwanda zo kwirinda ikwirakwira rya covid-19.

Ati “Nta shingiro bifite, ni ibinyoma ni ukuyobya abaturage, abaturage rwose babyirinde…hari amashusho cyangwa se videwo yakomeje gucicikana ku mbuga nkoranyambaga, hari umupasiteri umwe ngira ngo witwa Rugagi, avuga ko yavuye abantu hirya no hino yavuze mu Kinyarwanda n’abaturage babyumvise benshi, twavuga rero ko biriya ataribyo, nawe aho ari yakumva ko ataribyo”.

CP Kabera yakomeje abwira Rugagi ko ibyo yakoze ataribyo ndetse ko bishobora kumuviramo ingaruka akaba yahanwa ati “N’amategeko arahari ariko rero nagira ngo abantu babyirinde be kubiha agaciro”

Leta y’u Rwanda ikomeje gusaba abaturarwanda gukurikiza amabwiriza yo kwirinda covid-19, arimo kubahiriza intera ya metero hagati y’umuntu n’undi, kwitsamura no gukorora bapfukishije umunwa iteranyirizo ry’akaboko, kwirinda gusuhuzanya, kwambara agapfukamunwa, gukaraba intoki kenshi, kwirinda ingendo zitari ngombwa n’ibindi.


INKURU ZA :
Tanga Igitekerezo
Ibitekerezo 1
Nkusi Norbert Kuya 23-04-2020

ko atari mu Rwanda se ubwo police y’urwanda irahurirahe nawe? ko ntamunyarwanda uzava mu Rwanda ngo amusange muri Canada bararushywa niki bamuretse akavuga ibyo ashaka.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...