AMAKURU

UKWEZI
pax

Rulindo : Umugore yatawe muri yombi akekwaho gukubita no gukomeretsa umugabo we

Rulindo : Umugore yatawe muri yombi akekwaho gukubita no gukomeretsa umugabo we
26-06-2020 saa 15:54' | By Akayezu Jean de Dieu | Yasomwe n'abantu 4263 | Ibitekerezo 2

Umugore witwa Murekatete Yvonne wo mu Kagari ka Rutonde, Umurenge wa Shyorongi mu Karere ka Rulindo yatawe muri yombi kuri uyu wa Gatanu akurikiranyweho gukubita no gukomeretsa umugabo we.

Uyu Murekatete watawe muri yombi kuri uyu wa Gatanu tariki 26 Kamena 2020, aho bivugwa ko yakubise ibuye umugabo we witwa, Hakizimana Jean Claude babanaga batarasezeranye byemewe n’amategeko.

Amakuru agera ku UKWEZI, avuga ko uyu mugore n’umugabo bari baravuye mu yindi ntara baje gucumbika muri Rulindo aho bari batuye babana mu buryo butemewe n’amategeko.

Aba bombi rero ngo bagiranye amakimbirane ubwo umugore yari atashye mu rugo bwije [yatinze gutaha], bityo ngo umugabo akeka ko yaba avuye kumuca inyuma niko gushaka kumukubita umugore nawe agerageza kumuhunga ari nabwo yamukubise ibuye riramwangiza.

Umwe mu baturanyi b’uyu muryango yagize ati “Umugabo yatashye asanga umugore mu rugo, aho umugore aziye akeka ko yari agiye kumuca inyuma, ashatse kumukubita arahunga amwiyatse amukuta ibuye.”

Umuyobozi w’Akarere ka Rulindo Wungirije Ushinzwe Imibereho Myiza y’Abaturage, Gasanganwa Marie Claire, yabwiye UKWEZI ko ikibazo cy’aba bantu cyaturutse ku makimbirane bari bagiranye ashingiye ku kutizerana.

Ati “Ibyo aribyo byose ni amakimbirane bagiranye ashingiye ku kuba umugore yatashye atinze umugabo agakeka ko avuye kumuca inyuma undi yajya kumukubita akamuhunga bityo akamukubita ibuye. Ubwo rero uwo mugore yafashwe kuko nubwo yaba yari agiye kumukubita ntabwo byemewe.”

Visi Meya Gasanganwa yavuze ko muri aka karere amakimbirane amaze kubaganyuka binyuze mu bukangurambaga bugenda bukorwa hirya no hino bashishikariza abaturage by’umwihariko abadasezeranye kubikora.

Yakomeje agira ati “Twagerageje gukangurira abantu babana badasezeranye twarabasezeranyije nk’aba kubera ko ari abacumbitse ntabwo twari twaramenye ko basezeranye cyangwa badasezeranye.”

Uyu muyobozi yakanguriye abaturage by’umwihariko abo muri aka karere, kwizerana kuko iyo bagiranye amakimbirane bigira ingaruka ku bana babo, umuryango ndetse n’aho batuye naho bikaba ikibazo kuko nk’aba bari bacumbitse bishobora kubaviramo kwirukanwa muri aka gace.

Polisi y’Igihugu yemeje ko Murekatete yamaze gufatwa aho afungiye kuri sitasiyo ya Polisi ya Shyorongi mu gihe iperereza ryatangiye gukorwa.

Polisi yatangaje kuri Twitter ko “Uwahohotewe yajyanwe kwa muganga ku kigo nderabuzima cya Rutonde naho uwafashwe afungiye kuri sitasiyo ya Polisi ya Shyorongi.”

Mu ngingo ya 121 mu gitabo cy’amategeko ahana ibyaha mu Rwanda, hateganywa ko Umuntu wese, abishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka itatu ariko kitarenze imyaka itanu, n’ihazabu y’amafaranga y’u Rwanda atari munsi y’ibihumbi 500 000 FRW ariko atarenze 1 000 000 Frw

Hakizimana yakubiswe ibuye n’umugore we, bapfa amakimbirane ashingiye ku kutizerana


INKURU ZA :
Tanga Igitekerezo
Ibitekerezo 2
Sekirite Kuya 27-06-2020

Igika cya kane ntabwo gisobanutse mugerageze gukoresha ururimi rwacu neza !!

Ndahimana theoneste Kuya 27-06-2020

Uwo mudamu ahanwe byintanga rugero.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...