AMAKURU

UKWEZI

Umusirikare warasiye umuntu i Nyamirambo akamwica yagejejwe imbere y’urukiko

Umusirikare warasiye umuntu i Nyamirambo akamwica yagejejwe imbere y’urukiko
5-10-2018 saa 09:00' | By Vincent Nsengiyumva | Yasomwe n'abantu 5096 | Ibitekerezo 2

Ubushinjacyaha bwagejeje imbere y’urukiko rwa gisirikare abantu batatu bakurikiranweho icyaha cyo kwica Niyitanga Jean Claude warasiwe i Nyamirambo mu ijoro ryo kuwa 6 Nzeri 2018.

Aba bantu batatu bakurikiranweho kugira uruhare mu iyicwa rya nyakwigendera Niyitanga barimo, Sgt Rutare Jean Bosco, Musanabandi Sadda wari umugore wa nyakwigendera mu buryo bunyuranyije n’amategeko ndetse na Nsanzabarinda Louis wari ukuriye irondo mu ijoro ryabereyemo ayo mahano.

Kuri uyu wa Kane tariki ya 4 Ukwakira 2018, nibwo aba bose bagejejwe imbere y’urukiko rwa gisirikare ruherereye i Nyamirambo, kugira ngo baburane ku ifungwa n’ifungurwa ry’agateganyo.

Ubushinjacyaha bwatangiye burega Sgt Rutare Jean Bosco ko yarashe nyakwigendera amasasu abiri mu mutima agahita yitaba Imana.

Bwanareze Musanabandi Sadda wari umugore wa nyakwigendera ko ariwe watabaje abanyerondo ko yatewe n’umujura, bakaza bahuruje abasirikare.

Ubushinjacyaha kandi bwareze Nsanzabarinda Louis wari ukuriye irondo ko ariwe wahuruje abasirikare ko batewe n’umujura nabo bakaza bahita barasa nyakwigendera.

Ubushinjacyaha buvuga ko nyakwigendera amaze gupfa, abaregwa bagiye kuzana radio n’amafaranga babigereka ku murambo kugira ngo bigaragare cko yishwe avuye kwiba.

Sgt Rutare Jean Bosco uregwa ko yarashe nyakwigendera, ubwo yahabwaga umwanya ngo yiregure, yahise yiyemerera ko ariwe wamurashe, maze asaba imbabazi umuryango wa nyakwigendera ndetse n’ubuyobozi bw’ingabo z’u Rwanda.

Sgt Rutare yakomeje avuga ko yishe nyakwigendera atabishaka kuko ngo yitabaraga.

Musanabandi Sadda yabwiye urukiko ko Niyitanga wahoze ari umugabo we yaje mu rugo rwe mu gicuku agahonda urugi, yamufungurira agahita amwiba amafaranga yari afite mu nzu.

Ngo bikimara kuba yaratabaje, gusa ngo ntiyigeze yita nyakwigendera umujura.

Nsanzabarinda Louis we yaburanye ahakana ibyaha byose aregwa, asobanura ko yahuruje abashinzwe umutekano agira ngo batabare uwari watewe, ariko ko ibyo kurasa byakozwe n’umusirikare.

Ubushinjacyaha bwasabiye abaregwa ko bakomeza gufungwa iminsi 30 y’agateganyo kuko ngo hari impamvu zikomeye zituma abaregwa bakekwaho kuba barishe Niyitanga .

Abaregwa bo basabye urukiko ko barekurwa by’agateganyo bose bagaragaza impamvu zatuma barekurwa zirimo uburwayi.

Urukiko wavuze ko ruzafata umwanzuro tariki 8 Ukwakira uyu mwaka.

Abo mu muryango wa nyakwigendera ndetse n’abo bakoranaga bavuga ko bababajwe bikomeye n’uko bamwishe bamubeshyera ko yibye, bagaragaza ko icyakozwe ari ugusebya uwapfuye ndetse n’umuryango we muri rusange kuko basanzwe bifashije.

Basaba ko byaba byiza urubanza rwazakomereza ahabereye icyaha muri Rwezamenyo i Nyamirambo maze n’abaturage bakabimenya mu rwego rwo guca umuco wo kudahana.

Mu ijoro ryo ku 6 Nzeri 2018, nibwo abasirikare bari ku irondo barashe Niyitanga Jean Claude ahita apfa, bivugwa yari amaze kwiba mu rugo rw’umuntu mu murenge wa Rwezamenyo mu karere ka Nyarugenge.


INKURU ZA :
Tanga Igitekerezo
Ibitekerezo 2
gakuba Kuya 7-10-2018

urupfu rwanyakwigendera bose ntaho barucikira, uwambere nuriya mugore niwe wamwicishije nta guca kuruhande niwe wahuruje ukuriye irondo niba ataratumwe nuriya mugore niba ntakiri inyuma yabyo, ko uriya mugore avuga ko atamwibye, ninde wazanye, biriya bamugeretse ho!! umuntu nkuriya udafite ninkoni, yananirwa, gufatwa ni irondo gute kandi atiruka, rigatabaza abasirikare! !umusirikare yasabye imbabazi ko yahurujwe byari bihagije aliko yongeraho, ko yitabaraga, kandi bivugwa ko yari yicajwe, hasi ese yararwanaga nuwo mu sirikare nirondo, cyangwa koko yari yicaye, cyangwa bamwemeje, ko ali umujura!!ntanumwe aya maraso, adakoraho, nibajyanwe, aho byabereye abari bahari babisobanure abicanyi bahanwe muruhame, naho ibyuburwayi ntibiruta, urupfu rwu muntu abafunzwe, baravurwa,

Byishimo Kuya 6-10-2018

Uyu musirikare ndumva yababarirwa kuko.we yagiye atabaye uwibwe. Atazi umutego urimo urukiko rurebe niba ataziranye nuyumuryango ubundi ababarirwe.murakoze .

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...