konka coffee
KONKA

AMAKURU

UKWEZI

Abahagarariye imitwe ya Politiki ntibavuga rumwe ku kwirukana Human Rights Watch

Abahagarariye imitwe ya Politiki ntibavuga rumwe ku kwirukana Human Rights Watch
24-10-2017 saa 18:00' | By Akayezu Jean de Dieu | Yasomwe n'abantu 4588 | Ibitekerezo 3

Abahagarariye imitwe ya Politiki ntibavuga rumwe ku ngingo iherutse kugarukwaho n’abagize Inteko Ishinga Amategeko y’u Rwanda aho bamwe muri bo basabaga ko Human Rights Watch yakwirukanwa ntizongere gukorera ibikorwa byayo mu Rwanda. Bamwe mu bagize imitwe ya Politiki mu Rwanda ntibavuga rumwe n’iki cyemezo, hari bamwe barimo nka PL, PSD ndetse na PDI basanga koko ibikorwa bya HRW mu Rwanda bigamije guharabika isura y’igihugu ariko ku ruhande rwa Green Party bavuga ko Human Rights Watch itagomba kwirukanwa.

Iyi ni imwe mu ngingo zagarutsweho cyane mu kiganiro abahagarariye imitwe ya Politiki mu Rwanda bagiranye n’abanyamakuru cyari kigamije kugaragaza ibyo aya mashyaka ateganya gufasha ishyaka riri ku butegetsi ari naryo ryatsinze amatora ya Perezida yabaye muri Kanama uyu mwaka. Abanyamakuru babajije aba banyepolitiki icyo bavuga kuri raporo ziri gusohorwa n’Umuryango mpuzamahanga uharanira uburengenzira bw’ikiremwamuntu (Human Rights Watch) zavugaga ko u Rwanda ruri mu bihugu bihonyora uburenganzira bw’ikiremwa muntu.

Dr Frank Habineza uhagarariye Ishyaka riharanira Demukarasi no kurengera ibidukikije mu Rwanda yavuze ko kuri we, bimwe mu bitangazwa muri izi raporo biba ari ukuri ndetse usanga izi raporo hari uruhande rumwe zibavugira nk’ishyaka rya Green Party, bityo ngo abona kwirukana Human Rights Watch atari cyo gisubizo, ahubwo ngo icyaba cyiza ni uko abahagarariye Leta y’u Rwanda bagirana ibiganiro.

Yagize ati “Twebwe uko tubibona hari ibyo bariya (HRW) bandika biba ari ukuri kuko natwe hari byinshi batuvugira tuba tubona twagakwiye kubivuga ariko tukabura uburyo ariko hari ibindi bakora nko kuvuga ngo umuntu yarapfuye kandi ariho ibyo natwe bidutera kwibaza, ariko icyo tudashyigikiye ni ukumva ko uyu muryango uharanira uburenganzira bw’ikiremwamuntu wakwirukanwa mu Rwanda, ahubwo ababishinzwe mu Rwanda hari inteko ibishinzwe yakwicarana nabo bakaganira bagakemura ibibazo”

Umunyamabanga mukuru wungirije w’Ishyaka riharanira Ubwisanzure na Demukarasi(PDI), Madame Ndangiza Madina we yavuze ko raporo zasohowe na Human Rights Watch zakozwe n’abagamije guharabika u Rwanda bishakira akazi n’indonke zitangwa n’iyi miryango ndetse na bamwe mu barwanya Leta y’u Rwanda n’ibyiza imaze kugeza ku banyarwanda.

Yagize ati “Ubundi ibyo u Rwanda rwagezeho bariya ntabwo bibashimisha niyo mpamvu, ikindi kandi abakora ziriya raporo njyewe nabonye ari ababa bagamije kwibonera akazi babinyujije mu nyungu zabo, ikindi kandi hari n’abarwanya u Rwanda baba bari hanze y’igihugu bashaka guharabika igihugu”

Ibi yabihurijeho kandi na Depite Byabarumwanzi Francois uhagarariye PL, uyu avuga ko izi raporo za Human Rights Watch zinyomozwa na bamwe mu bantu zivuga ko bapfuye kandi ari bazima, ikindi kandi ngo ubushakashatsi ahanini bukorwa ku bantu basanzwe bafite ibibazo runaka by’ubuzima kuburyo n’ubwo wamusaba ko kwemera ko yapfuye, ngo yahita abyemera kuko yaba azi ko umukemurira icyo kibazo afite.

Mu Cyumweru gishize nibwo mu Nteko Ishinga Amategeko habaye Ikiganiro nyunguranabitekerezo kuri iyi raporo iherutse gusohorwa na HRW muri Nyakanga uyu mwaka yise “All Thieves Must Be Killed” Bishatse kuvuga mu kinyarwanda “abajura bose bagomba kwicwa”, aho ivuga ko hari abantu 37 bishwe n’abapolisi, abasirikare, inkeragutabara cyangwa DASSO, mu turere twa Rubavu na Rutsiro.

Benshi mu bagize Inteko Ishinga Amategeko y’u Rwanda bakaba baragaragaje ko bababajwe cyane na raporo iherutse gusohorwa n’umuryango mpuzamahanga uharanira uburenganzira bwa muntu (Human Rights Watch) yari igamije guharabika no guhungabanya umudendezo w’abanyarwanda n’ubuyobozi bwabo bityo benshi basaba ko uyu muryango wakwirukanwa mu Rwanda. Uyu ni Majyambere Alphonse ni umwe mu bavugwa muri iyi raporo yaherukaga gukorwa na HRW nawe yavugwaga ko yishwe kandi ari muzima Aba batangabuhamya babeshyuje ibyagaragaye muri raporo ya Human Rights Watch (HRW)


INKURU ZA :
Tanga Igitekerezo
Ibitekerezo 3
Kamanzi Kuya 31-10-2017

Twibuke ko mu Rwanda harimo abantu benshi bitiranwa amazina mushobora kwerekana abo bitiranywa amazina abandi barigendeye kera. Tekiniki yacu yose barayimenye twagombye gushakisha indi cg tukabyemera nubundi ntacyo badutwara.

gasombe Kuya 25-10-2017

ubundi umuntu akubeshye ibyo utakoze hari imfunwe bigutera mubareke niba ataribyo namahoro

Joe Kuya 24-10-2017

Green patty iravuga ukuri nange ndumva kwirukana HRw atariwo muti

IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...