AMAKURU

UKWEZI

Abanyamadini basabwe uruhare mu bikorwa byo kwibuka Jenoside yakorewe Abatutsi

Abanyamadini basabwe uruhare mu bikorwa byo kwibuka Jenoside yakorewe Abatutsi
8-04-2018 saa 08:15' | By Akayezu Jean de Dieu | Yasomwe n'abantu 660 | Ibitekerezo

Mu gihe u Rwanda ruri mu Cyumweru cyahariwe Kwibuka ku nshuro ya 24 Jenoside yakorewe Abatutsi muri Mata 1994, Umuryango Rabagirana Ministries urasaba abanyamadini n’amatorero yo mu Rwanda kugira uruhare rufatika mu bikorwa byo kwibuka Jenoside yakorewe Abatutsi, kugira uruhare mu komora ibikomere no gufasha abo yagizeho ingaruka.

Uyu muryango wa gikristu Rabagirana Ministries utegamiye kuri Leta usanzwe ukora ibikorwa by’isanamitima n’ubwiyunge urahamagarira abanyamadini n’amatorero kugira umusanzu n’uruhare bifatika mu bikorwa byo kwibuka ndetse no komora ibikomere by’abagizweho ingaruka na Jenoside.

Byagarutsweho mu kiganiro uyu muryango wagiranye n’abanyamakuru kuri uyu wa Gatanu, kigamije kugaragaza uruhare rw’amadini n’amatorero mu kwibuka no komora ibikomere abarokotse Jenoside.

Umuyobozi Mukuru wa Rabagirana Minisitries, Pasiteri Joseph Nyamutera, yavuze ko ubwo twibuka ku nshuro ya 24 Jenoside yakorewe Abatutsi hari byinshi bigikeneye kuvugururwa birimo gushyira imbaraga mu bikorwa by’isanamitima by’umwihariko mu bihe bikomeye nk’ibi byo kwibuka abazize Jenoside

Yagize ati “Haracyarimo ibintu abantu bakwiriye kuvugurura nko kuzamura ibikorwa by’isanamitima biracyari bike, cyane cyane mu gihe cy’icyunamo, turacyabona amatorero amwe abura icyo gukora. Bimwe na bimwe twashishikariza abakirisitu kujya mu biganiro mu bikorwa byo kwibuka, byo gushyingura. Usanga bahora mu nsengero bakayoberwa uko bifata, wenda bakagabanya ibyo kuririmba no gucuranga ariko ubutumwa butangwa n’ibikorwa bikorwamo biracyari hasi cyane.”

Yakomeje avuga ko bifuje kugaragaza icyo amatorero asabwa mu gihe cyo kwibuka ku nshuro ya 24 birimo kwigenzura bakareba ikibazo cyatumye abantu benshi bishora muri Jenoside kandi abanyarwanda barengaga 80% bari bafite amadini babarizwamo bakagikosora, gushyishikariza abakirisitu gahunda y’ubumwe n’ubwiyunge, komora ibikomere abakomerekejwe na Jenoside n’ibindi.

Umuyobozi ushinzwe imari n’umutungo mu muryango GBUR, uhuza imiryango y’abanyeshuri mu ivugabutumwa rishingiye kuri Bibiliya muri za Kaminuza, Bigeyo Esdras, yavuze ko nubwo abanyeshuri benshi bigamo ari abavutse nyuma ya Jenoside, bari mu cyiciro cy’abagerwaho n’ingaruka zayo cyane kubera kubura ababaha amakuru ku mateka ya Jenoside n’abayabahaye bakabaha atuzuye.

Kuva kuwa 7 Mata buri mwaka, u Rwanda rwifatanya n’amahanga mu gutangira igihe cy’iminsi 100 yo kwibuka Jenoside yakorewe abatutsi. Uyu mwaka, insanganyamatsiko iragira iti “Twibuke twiyubaka.”

Rabagirana Minisitiries isanzwe ikora ibikorwa by’isanamitima n’ubwiyunge birimo nk’icyo yatangije mu Karere ka Kicukiro cyo guhura bakanzura ibyo abakirisitu bazakora muri iki gihe cyo kwibuka birimo gusura inzibutso, kwigisha urubyiruko, kuremera abacitse ku icumu, gutanga ibiganiro n’ibindi kandi ko bifuza ko n’ayandi matorero yagiramo uruhare, akaziba icyo cyuho. Umuyobozi Mukuru wa Rabagirana Minisitries, Pasiteri Joseph Nyamutera


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...