AMAKURU

UKWEZI

Abayobozi bakuru bakuwe ku myanya yabo bazakomeza guhembwa kugeza ryari? Angahe?

Abayobozi bakuru bakuwe ku myanya yabo bazakomeza guhembwa kugeza ryari? Angahe?
22-10-2018 saa 10:04' | By Chief Editor | Yasomwe n'abantu 15424 | Ibitekerezo 5

Tariki 18 Ukwakira 2018 nibwo Perezida wa Repubulika yahinduye abagize Guverinoma anashyira mu myanya abandi bayobozi batandukanye. Muri Guverinoma hinjiyemo amasura mashya ariko hanagira bamwe mu bari bayisanzwemo bayikuwemo ntihabahwa indi mirimo. Hari bamwe mu bakunzi bacu bifuje kumenya uko bigenda iyo umuyobozi mukuru akuwe ku mwanya, ku bijyanye n’umushahara ahabwa n’igihe awuhabwa.

Iteka rya Perezida N°004/01 ryo ku wa 16/02/2017 rigena ingano y’imishahara n’ibindi bigenerwa Abanyapolitiki Bakuru b’Igihugu n’uburyo bitangwa, ryasohotse mu Igazeti ya Leta nimero idasanzwe yo kuwa 23/02/2017, rigaragaza ingano y’Imishahara aba Banyapolitiki Bakuru b’Igihugu bahabwa ndetse n’ibindi biherekeza iyo mishahara.

Mu gihe bamwe mu banyepolitiki bakuru b’igihugu baba bakuwe muri Guverinoma ntibahabwe imyanya muri Guverinoma nshya, bakomeza guhembwa nk’uko biteganywa kandi bigenwa n’Itegeko Ngenga N°01/2017/OL ryo ku wa 31/01/2017 rihindura kandi ryuzuza Itegeko Ngenga n° 05/2012/OL ryo ku wa 03/09/2012 rishyiraho ibigenerwa Abanyapolitiki Bakuru b’Igihugu.

Muri iyi nkuru turibanda ku bayobozi bakuru b’igihugu bari mu rwego rwa Minisitiri, Abanyamabanga ba Leta ndetse na Guverineri w’Intara, dore ko ari bo bayobozi bakuru baherutse guhindurwa ubwo Perezida yakoraga amavugurura muri Guverinoma no mu zindi nzego nkuru z’igihugu.

Iri Tegeko Ngenga riteganya ko Umunyapolitiki Mukuru w’Igihugu uri mu cyiciro cya gatatu n’icya kane, ni ukuvuga nk’Abaminisitiri, abagize Guverinoma, Abanyamabanga ba Leta na ba Guverineri b’Intara, iyo avuye mu mirimo ye atavanyweho icyizere cyangwa adahamwe n’icyaha cyerekeranye n’imirimo ashinzwe, akomeza guhabwa buri kwezi mu gihe cy’amezi atandatu (6) ibintu asanzwe ahabwa birimo umushahara wa buri kwezi; indamunite y’icumbi ya buri kwezi n’amafaranga afasha nyir’ubwite mu kwita ku modoka ye bwite.

Umunyapolitiki Mukuru uhawe undi murimo na Leta cyangwa akibonera umurimo mu nzego z’abikorera muri icyo gihe cy’amezi atandatu (6); umushahara n’ibindi yagenerwaga bihita bihagarara.

Iyo mishahara bakomeza guhabwa iba ingana gute?

Abaminisitiri n’abandi bagize Guverinoma bashobora gushyirwaho na Perezida wa Repubulika bagenerwa buri wese umushahara mbumbe buri kwezi ungana n’amafaranga y’u Rwanda miliyoni ebyiri n’ibihumbi magana atanu mirongo itatu na bine na magana inani na mirongo itandatu na rimwe (2.534.861 Frw). Uyu mushahara ninawo ukomeza guhabwa uwakuwe kuri uyu mwanya mu gihe cy’amezi atandatu.

Abanyamabanga ba Leta bagenerwa buri wese umushahara mbumbe buri kwezi ungana n’amafaranga y’u Rwanda miliyoni ebyiri n’ibihumbi magana ane na mirongo itatu na bine na magana atandatu na cumi n’atatu (2.434.613 Frw). Uyu mushahara ninawo ukomeza guhabwa uwakuwe kuri uyu mwanya mu gihe cy’amezi atandatu.

Aba bose kandi bakomeza guhabwa amafaranga y’icumbi angana n’ibihumbi magana atanu y’u Rwanda (500.000 Frw) buri kwezi; bakayagenerwa mu gihe cy’amezi atandatu.Bakomeza kandi guhabwa muri ayo mezi ibindi birimo icumbi rifite amafaranga yo gukoresha mu rugo; kwishyurirwa fagitire z’amazi n’amashanyarazi, uburinzi n’amafaranga afasha nyir’ubwite kwita ku modoka ye bwite.

Guverineri w’Intara wakuwe kuri uyu mwanya azakomeza guhabwa umushahara mbumbe w’umurimo buri kwezi ungana n’amafaranga y’u Rwanda miliyoni ebyiri n’ibihumbi magana ane na mirongo itatu na bine na magana atandatu na cumi n’atatu (2.434. 613 Frw). Nawe azayahabwa mu gihe cy’amezi atandatu. Azaba anahabwa kandi amafaranga y’icumbi angana n’ibihumbi magana ane by’amafaranga y’u Rwanda (400.000 Frw) buri kwezi; hamwe no guhabwa ibindi birimo amafaranga yo gukoresha mu rugo; kwishyurirwa fagitire z’amazi n’amashanyarazi, uburinzi n’amafaranga afasha nyir’ubwite kwita ku modoka ye bwite.


INKURU ZA :
Tanga Igitekerezo
Ibitekerezo 5
Mami Kuya 28-10-2018

Eeeeeehh!!!! Aya frw niyo abayobozi bahembwa?? Around 2,500M?? Mwarimu agahembwa 40,000??? No, this is to much. Harimo inegalité iteye ubwoba. Birabaje pe. Le monde est cruel.

dada Kuya 27-10-2018

Bacumugani urukwavu rukuze rwonkabana barwo.mureke abayobozi bakuru bibereho.ese wowe revenue izagusanga muri restora ibare isombe nibishyimbo ucuruza kumunsi murunva bayakurahe Atari muri rubanda rugufi?noneho Rura to iteyubwoba, bashyize icyuma mumodoka zabakora special kuburyo ahuzaburihose bahabona kandi ukujyanye umugenzi haramafaranga runaka bakata.murunva rubanda rugufi ururwanda tuzarubamo twishimye??????

fffffff Kuya 24-10-2018

Tuge tunyurwa nibyo fufite nuko tubayeho nahubundi byose bizasigara muriyisi.

tete Kuya 23-10-2018

biratangaje nukuri.nakumiro pe ariko ucyize azahora acyize ukennye azahora akinnye

Ruhamya Kuya 22-10-2018

Barangiza bakavuga ko "nta mafaranga bafite yo "kongeza Mwarimu wa primary " uhembwa 41.000 Frw ku kwezi.Nyamara aba yariganye n’aba ba Nyakubahwa muli University.There is too much INJUSTICE in this world.Wa mugani dukeneye Ubwami bw’imana kugirango burenganure billions z’abantu barengana.
Imana yaduhaye isi ngo tuyisangire.Ariko kubera Injustice,usanga isi iribwa n’abantu bake cyane.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...