konka coffee
KONKA

AMAKURU

UKWEZI

Guverineri Gatabazi yavuze ku baturage b’Intara ye bakorerwa iyicarubozo muri Uganda

Guverineri Gatabazi yavuze ku baturage b’Intara ye bakorerwa iyicarubozo muri Uganda
15-01-2018 saa 16:33' | By Akayezu Jean de Dieu | Yasomwe n'abantu 975 | Ibitekerezo

Guverineri w’Intara y’Amajyaruguru, Gatabazi Jean Marie Vianney, yavuze ko benshi mu baturage bamaze iminsi bavugwaho gufungirwa no gukorerwa ibikorwa by’iyicarubozo muri Uganda ahanini ari abakomoka muri iyi ntara gusa asobanura ko kuri bo nk’ubuyobozi bw’Intara icyo barimo gukora kugeza ubu ari ubukangurambaga bugamije gusobanurira abaturage uburyo bwo kwitwara no kumenya kubahiriza amategeko agenga ibindi bihugu bakibuka kuyubahiriza mu gihe bagiyeyo

Ku wa 10 Mutarama 2018, twabagejejeho inkuru ivuga ko abaturiye umupaka w’u Rwanda na Uganda uri mu murenge wa Kagogo, mu karere ka Burera ho mu ntara y’Amajyaruguru baravuga ko hari abavandimwe n’abaturanyi babo bagera kuri 48 bafatiwe mu gihugu cya Uganda aho bivugwa ko bahise batabwa muri yombi aho hari bamwe bakatiwe igifungo cy’amezi 18 ndetse bagacibwa n’amashilingi ya Uganda miliyoni n’igice.

Ubwo yari mu kiganiro n’abanyamakuru cyo kuri uyu wa Mbere tariki 15 Mutarama 2018, Guverineri w’Intara y’Amajyaruguru, Gatabazi JMV yavuze ko abanyarwanda benshi bakunze kujya muri Uganda gushakayo akazi, ndetse bamwe bakaba banafiteyo abavandimwe babo ariko muri ibi bihe umwuka usa n’utari mwiza hagati y’u Rwanda na Uganda abaturage bakwiye kwitwararika mu gihe hagishakwa umuti w’ikibazo.

Guverineri kandi yavuze ko hari abaturage benshi bakunze kumvikana bakorerwa ibikorwa bisa nk’iyicaurubozo muri Uganda ndetse bamwe bakaba barafunzwe abandi bagacibwa amafaranga kugira ngo barekurwe ariko kugeza ubu hakabab hategerejwe ibizava mu biganiro Perezida Kagame w’u Rwanda aherutse kugirana na Minisitiri w’Ububanyi n’Amahanga wa Uganda.

Yagize ati “Abaturage bagiye baduha ubuhamya hari abatubwiye ko bajyayo bagafatwa bagakubitwa abandi bagafungwa, ndetse bamwe mwaranabumvishe bavuga ko bacibwa amafaranga abandi bagafungwa, ariko ngewe icyo nabivugaho kuri uyu munsi, ibijyanye n’ibibazo umuntu yagirira mu gihugu avuye mu kindi ubundi birebwa n’urwego rwa Minisiteri ifite ububanyi n’amahanga mu nshingano”

Yakomeje agira ati “Twebwe icyo dushinzwe nk’abayobozi baturanye na Uganda, ari naho hari ikibazo ni ugushishikariza abaturage gukora bagakoresha neza amahirwe bafite mu gihugu cyabo, ikindi tubabuza kwambukiranya imipaka batabanje kuzuza ibisabwa tukababwira ko bagomba kubanza bakamenya kubahiriza amateko y’ikindi gihugu”

Yunzemo ati “Twebwe dusaba abaturage bacu bagiye kwambuka umupaka guca ku mupaka bakuzuza ibisabwa, kuko burya iyo umuturage agiriye ikibazo mu kindi gihugu biratworohera kubimenya kuko aba yagiye mu buryo buzwi”
Guverineri w’Intara y’Amajyaruguru, Gatabazi JMV

Kuva muri Nzeri 2017, abanyarwanda bafungwa mu buryo bunyuranyije n’amategeko bigizwemo uruhare n’Urwego rushinzwe Ubutasi mu Ngabo za Uganda, CMI, bagakorerwa iyicarubozo basabwa kwemera ku gahato ko ari intasi z’u Rwanda. Bivugwa ko abakorana na Kayumba Nyamwasa aribo batungira agatoki inzego za gisirikare muri Uganda uwo zigomba guta muri yombi.

Mu gihe uyu mwuka wo gushimuta ukomeje gufata indi ntera, ubwoba ni bwose ku banyarwanda bajya muri Uganda umunsi ku wundi. Benshi barashaka kumenyesha imiryango yabo, inshuti n’abayobozi igihe cyose baba bagiye kugenda, ko bagomba gusigara bari maso bakamenya icyababayeho mu gihe baburiwe irengero mu buryo nk’ubu budasobanutse.

Kuwa Gatanu tariki 5 Mutarama 2018,nibwo intumwa ya Perezida Museveni ari nawe Minisitiri w’Ububanyi n’Amahanga muri Uganda, Sam Kutesa yagiranye ibiganiro na Perezida Kagame w’u Rwanda aho bivugwa ko ibi biganiro byari bigamije gushakira hamwe umuti w’ibi ibibazo bimaze iminsi bivugwa hagati y’ibihugu byombi harimo iri tabwa muri yombi rya hato na hato ry’abanyarwanda


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...