konka coffee
KONKA

AMAKURU

UKWEZI

Iby’ingenzi wamenya ku kwinyuramo mu batangabuhamya ku wahanuye indege ya Habyarimana

Iby’ingenzi wamenya ku kwinyuramo mu batangabuhamya ku wahanuye indege ya Habyarimana
18-10-2017 saa 21:21' | By Akayezu Jean de Dieu | Yasomwe n'abantu 6552 | Ibitekerezo 7

Abacamanza b’abafaransa bakunze kugenda bakora ibishoboka byose ngo bagaragaze ko ingabo zari iza RPA zabohoye igihugu zikanahagarika Jenoside arizo zahanuye indege yahanutse tariki 06 Mata 1994 yari itwaye Habyarimana Juvenal ndetse wanahise apfira muri iyo mpanuka. Kuri ubu hashyizwe aharagara uburyo ubuhamya aba bacamanza bashingiraho bwuzuye ukuvuguruzanya no kutavuga rumwe kw’ababutanga.

Ikinyamakuru Jeune Afrique cyasohoye ubusesenguzi cyakoze ku buhamya abahuye n’abacamanza b’Abafaransa batanze kugera ku buheruka bwatanzwe na James Munyandinda watorotse igisirikare mu 2008, wiyita Munyeragwe Jackson. Niwe washinze Ihuriro Inyabutatu-RPRK risebya leta y’u Rwanda ryifashishije Radio Inyabutatu yashinze.

Uyu mugabo uvuga ko yabaye umurinzi wa Perezida Kagame mu gihe cy’urugamba, James Munyandinda yavuze ko kuva mu 1992 kugeza mu 2008 yakoreraga hafi ya Gen James Kabarebe, Minisitiri w’Ingabo kuva mu 2010.

Ibyo ngo byatumye abona n’amaso ye, mu ntangiro za 1994, itegurwa ry’ibisasu bibiri bya missiles zirasa indege za SAM-16, zakoreshejwe mu guhanura indege ya Habyarimana muri Mata. Ni ibintu ngo yari yarateguye mu Ukuboza 2014 mu ibaruwa ifunguye yandikiye senateri w’Umubiligi Alain Desthexe, ariko atarigeze abimenyesha ubucamanza bw’u Bufaransa. Yavuze ko yari mu itsinda ry’abasirikare icumi barindaga izo missiles ku birindiro by’ingabo za APR ku Mulindi, aho izo SAM-16 zari izo kubirinda ngo bitazagabwaho ibitero by’indege.

Gusa ngo muri Werurwe 1994, Munyandinda na bagenzi be ngo bahawe amabwiriza yo gupakira izo missiles mu ikamyo ya Mercedes yerekezaga i Kigali, ahabaga abasirikare 600 ba APR, bahoherejwe kubera amasezerano ya Arusha yasinywe muri Kanama 1993. Uwo mutangabuhamya ngo yavuze ko James Kabarebe yahagarikiye ipakirwa ry’ibisanduku bibiri bya kaki byarimo izo missiles, maze ubuhamya bwa James Munyandinda mu byo yiboneye burangirira aho.

Mu bindi avuga harimo ko ko muri Nyakanga 1994 Jenoside igera ku musozo, babiri mu bari abasirikare bagenzi be, Franck Nziza na Éric Hakizimana, ngo bagarutse mu mutwe w’ingabo babagamo babwira abantu batandukanye ko aribo bakoresheje bya bisasu mu guhanura indege Falcon 50 ya Habyarimana. Ni ibintu ariko Franck Nziza yahakanye yivuye inyuma ubwo yabazwaga n’umucamanza Trévidic mu Burundi, mu 2010. Ni mu gihe ubuyobozi bw’ingabo z’u Rwanda bwagaragaje ko Éric Hakizimana we atigeze agera muri APR.

Abatangabuhamya batatu buri wese avuga ibidahuye n’ibyundi

Munyandinda siwe wa mbere watorotse igisirikare cy’u Rwanda wahawe ijambo n’ubucamanza bw’u Bufaransa. Guhera muri 2001, abatangabuhamya bagera kuri batandatu bahunze igihugu bamwe bakajya mu mitwe irwanya Leta, batanze ubuhamya, ihanurwa ry’indege ya Habyarimana rihirikirwa ku ngabo zahagaritse Jenoside.

Bamwe bavuga ko bumvise itegurwa ry’uwo mugambi, abandi ko bagize uruhare mu gutegura intwaro zakoreshejwe cyangwa mu kuzitwara ziva ku Mulindi zizanwa i Kigali.
Gusa imvugo zabo zigenda zihura n’ikibazo gikomeye kuko zidahura, n’ubwa Munyandinda budasigaye.

Mbere ye, abandi babiri bahoze mu ngabo bavuze ko bagize uruhare mu gutwara izo missiles, aribo Aloys Ruyenzi na Emile Gafirita, bafite byinshi bagenda babusanyaho na Munyandinda.

Uwa mbere avuga ko missiles zari zihishe mu gisanduku gikoze mu biti, ziza gutwarwa munsi y’inkwi zari zipakiye mu ikamyo ya Mercedes. Uwa kabiri we yavuze ko bazizingiye mu kintu bazishyira munsi ya matola n’indi myenda, bazipakira mu ikamyo.

Munyandinda we azana imvugo ya gatatu ko zari zashyizwe mu bisanduku bibiri, akavuga ko ibyo bisasu byaturutse mu Burusiya (SA-16 IGLA) biriho n’inyandiko nyinshi mu rurimi rw’icyo gihugu. Ku bijyanye n’igihe ibyo bisasu byajyaniwe i Kigali nabwo, uko ari batatu batanga ubuhamya budahura na gato.

Ruyenzi avuga ko hari muri Gashyantare 1994. Gafirita we yavuze ko ari mu minsi cumi n’itanu mbere y’uko indege ihanurwa, ni ukuvuga ahagana kuwa 24 Werurwe 1994, Munyandinda we akavuga ko byari hagati y’impera za Gashyantare n’intangiro za Werurwe 1994.

Iyo bigeze ku itsinda ry’abantu bapakiye izo missiles n’abazijyanye i Kigali, naho hazamo kubusanya. Ruyenzi avuga ko abasirikare bane ba APR baje mu ikamyo ariko akavugamo babiri gusa; Franck Nziza na Eric Hakizimana binavugwa ko aribo bahanuye indege.

Gafirita avuga ko we yari mu ikamyo ya Mercedes yatwaye ibyo bisasu, aherekejwe n’umushoferi Eugène Safari alias ‘Karakonje’ na Sergent Emmanuel. Yavuze ko ahubwo Lieutenant Franck Nziza yabahaye ikaze kuri CND (ahakorera Inteko Ishinga Amategeko y’ubu), bivuze ko atari ku Mulindi ubwo bajyaga guhaguruka.

Munyandinda ni we wenyine washyize mu majwi James Kabarebe

Imbere y’umucamanza, James Munyandinda niwe mutangabuhamya rukumbi wavuze ko bapakiye ibisasu James Kabarebe ahari. Nta n’irindi zina avuga haba mu gupakira cyangwa gutwara ibyo bisasu ryagaragaye mu bundi buhamya, uretse Franck Nziza.

Ukundi kunyuranya, nk’uko Aloys Ruyenzi na Emile Gafirita babivuze, iyo kamyo ya Mercedes yaherekejwe n’imodoka ebyiri za Jeep z’ingabo za Loni zari mu butumwa bw’amahoro mu Rwanda, MINUAR, imwe iri imbere indi iri inyuma. Ariko James Munyandinda we siko yabivuze, ngo yari imodoka ya burende ikurikiwe n’imodoka ya pick-up ya APR, nayo ikurikiwe n’ikamyo ya Mercedes yarimo missiles, ikurikiwe na pick-up ya kabiri ya APR nayo ikurikiwe na burende yindi.

Nyamara n’ubwo uyu mutangabuhamya Munyandinda adahuza na bagenzi be, umucamanza Herbaut asa n’uwahaye agaciro amagambo ye, kuko yahamagaje Gen James Kabarebe ngo azajye kwisobanuraho, n’ubwo amakuru avuga ko atazajyayo dore ko ibi birego by’u Bufaransa byakomeje gushyirwa mu mutaka w’ubutabera kandi ari politiki nsa.​

Ese mu by’ukuri, iyi ndege ya Habyarimana, ubuhamya bwinshi bugaragaza ko yarashwe nande?

Tariki 6 Mata 1994, nibwo indege y’uwahoze ari Perezida w’u Rwanda Juvenal Habyarimana yarashwe, akaba yari kumwe na Perezida w’u Burundi Cyprien Ntaryamira. Ubu imyaka 23 irashize, ariko abantu benshi bagiye bavuga byinshi bitandukanye ku waba yarahanuye iyi ndege, icyabimuteye n’icyo yari agamije. Igihugu cy’u Bufaransa, kiri mu byakomeje gutinda ku by’iperereza ry’uwaba yararashe iyi ndege ndetse mu mpera z’umwaka wa 2016 giheruka gutangaza ko kigiye gusubukura ubushakashatsi, hagashingirwa no ku buhamya butangwa na Kayumba Nyamwasa wahoze ari umugaba w’Ingabo z’u Rwanda ubu akaba atavuga rumwe na Leta y’u Rwanda, uyu we akaba yemeza ko indege yarashwe na Perezida Kagame n’ingabo yari ayoboye zabohoye u Rwanda, gusa ibi bihabanye n’ubuhamya benshi batanga ku waba yarahanuye iyi ndege.

Kimwe mu bimenyetso byinshi simusiga bigaragaza ko Jenoside yateguwe kare kandi ko uwahanuye indege ashobora kuba yarashakaga gutangira gushyira mu bikorwa ibyari byaragambiriwe, ni amagambo yavuzwe na Col Theoneste Bagosora wavuze mbere y’ihanurwa ry’indege ko mu Rwanda hagiye kuba imperuka y’ibyahishuwe cyangwa se ko hagiye kuba AKANTU. Abandi banyepolitiki b’icyo gihe, bagiye bivugira byeruye ko igihe cyo gutsemba abatutsi cyegereje, ndetse ibitangazamakuru byabikwirakwizaga byo akazi kabyo kari karanogejwe.

Lt Gen Roméo Dallaire wari uri mu Rwanda icyo gihe, agaragaza mu by’ukuri uwahanuye indege ya Perezida Habyarimana, agatanga ibimenyetso n’impamvu ashingiraho. Mu gitabo cye yise «J’ai serré la main du diable», bishaka kuvuga ngo "Nakoze mu kiganza cy’umudayimoni", Lt Gen Roméo Dallaire wari ukuriye ingabo z’umuryango w’Abibumbye zizwi nka MINUAR zabungabungaga amahoro mu Rwanda mbere ya Jenoside no mu gihe yabaga, agaragaza iby’iraswa ry’indege ya Juvenal Habyarimana wari uri kumwe na Cyprien Ntaryamira.

Roméo Dallaire nk’umuntu wari uyoboye ingabo z’umuryango w’Abibumbye zabungabungaga amahoro mu Rwanda, yabashije kwibonera amahano yagwiriye u Rwanda mu 1994 ndetse yageragaje kurwanya ubwicanyi n’ubwo ingabo nkeya n’imbaraga ze bitari kubasha ubwabyo guhagarika ayo mahano. Ibikorwa bye, bivugwa ko byibuze byarokoye ababarirwa mu 30.000. Yagerageje guhamagara imiryango mpuzamahanga ngo itabare ariko ntibyagira icyo bigeraho. Gusa ubu avuga ko iyo abimenya ko gutabaza kwe kutazasubizwa, aho guhamagara kuri telefone aba yarafashe indege akajya gusaba ubutabazi amahanga imbonankubone.

Mu buhamya yatanze mu mwaka wa 2014, Lt Gen Romeo Dallaire yavuze ko ibimenyetso simusiga bihari bigaragaza ko indege ya Perezida Juvenal Habyarimana yarashwe n’abahezanguni bari bafatanyije mu buyobozi bwa Guverinoma y’icyo gihe. Ahinyura cyane ibyagiye bivugwa ko iyi ndege yaba yarahanuwe n’ingabo za FPR Inkotanyi akanagaragaza ibimenyetso ashingiraho.

Romeo Dallaire ati: "Agace indege yarasiwemo kari gacunzwe cyane n’ingabo zarindaga Perezida Habyarimana, hakaba ari hamwe mu hantu bitari gushoboka icyo gihe ko ingabo za FPR zagera. FPR kandi ntabwo bari bafite ibisasu bya ’Missiles Mistral’ byahanuye iriya ndege, ibi bisasu ni iby’Abafaransa kandi Abafaransa ni bo bari inyuma y’ingabo za Leta y’icyo gihe. "

Uyu mugabo akomeza avuga ko amatara yo ku kibuga cy’indege cy’i Kanombe babanje kuyazimya mbere gato y’uko indege ihagera, ibi bikaba byarabafashije kuyirasa mu buryo bworoshye. Lt Romeo Dallaire ati: "Nta gushidikanya na gato kuri mu ntekerezo zanjye, iyo ndebye biriya mu buryo bwa gisirikare n’ubuhanga bukoreshwamo, ndabibona ntashidikanya ko byakozwe n’abahezanguni bo ku ruhande rwa Perezida Habyarimana Juvenal. Ikindi gikwiye kwibazwaho, abasirikare barindaga Perezida bamaze ibyumweru bitatu barabujije abandi basirikare kugera aharasiwe indege, kugirango bayobye uwashaka kuzagira iperereza abikoraho."

Romeo Dallaire agaragaza ko impamvu yatumye abahezanguni bakoranaga na Guverinoma ya Habyarimana bafata icyemezo cyo kumwivugana, ari uko yari avuye mu masezerano y’amahoro ya Arusha yagombaga gutuma ingabo za FPR Inkotanyi zigabana na we ubutegetsi. Kugabana ubutegetsi na FPR, byumvikana neza ko byagombaga gutuma hari bamwe muri abo bahezanguni bari gutakaza imyanya yabo y’ubuyobozi, abandi basigayemo na bo bagakorana n’abantu bari gutambamira umugambi wa Jenoside yari imaze igihe itegurwa.

Muri mwaka wa 2013, Colonel Thierno Athie wo muri Sénégal wari i Kigali mu 1994 mu butumwa bw’ingabo zari ziyobowe na Lt Gen Roméo Dallaire, nawe yatanze ubuhamya buhura neza n’ubw’uwari umuyoboye mu ngabo icyo gihe, ashimangira ko azi neza abarashe indege ya Habyarimana kuko aho byabereye yari ahibereye.

Uyu yivugiye ko mu mugoroba wa tariki ya 6 Mata 1994 yari mu rwakiriro rw’icyubahiro mu kibuga cy’indege cya Kanombe ahari hategerejwe Perezida Juvénal Habyarimana, akemeza ko yashidutse abona abasirikare barindaga Perezida bamugose akabuzwa kumenya ibyari bigiye kuba, bigaragaza ko bari bazi icyo bategereje gukora.

Abandi bagize icyo bavuga ko muntu waba warahanuye iyi ndege, ni abacamanza Mark Trevidic na Nathalie Poux, aba muri raporo yabo bakaba baragaragaje ko indege yari itwaye Juvenal Habyarimana na Cyprien Ntaryamira wari Perezida w’u Burundi, ishobora kuba yararashwe n’intagondwa z’abasirikare ba Habyarimana zitamushakaga.

Indi raporo yakozwe ku ihanurwa ry’iyi ndege ariko ikanengwa cyane kuko uwayikoze atigeze anabasha kugera aho iyi ndege yarasiwe, ni iyakozwe n’umucamanza w’umufaransa Jean Louis Bruguière wavuze ko yarashwe n’ingabo zari iza FPR Inkotanyi. Kuba ari Umufaransa ubwabyo kandi iki gihugu kikaba gishinjwa uruhare rugaragara muri Jenoside yakorewe abatutsi, benshi babihereyeho bagaragaza ko iyi raporo yo nta shingiro ifite, cyane ko nta n’ibimenyetso bifatika yigeze agaragaza akaba atarigeze anakandagira aho indege yarasiwe.


INKURU ZA :
Tanga Igitekerezo
Ibitekerezo 7
Habimana Kuya 21-10-2017

Bose bahurira aho ibisasu byavuye

innocent nimubona Kuya 20-10-2017

Iyo nimitwe y abasungu.ariko bakora iperereza bareka icaha kiri hejuru y umunyavyaha

vip Kuya 19-10-2017

hhh akore iki ko nubundi yari yasize igihugu akajyenda knd yaraziko harimo intambara njye numva ataribujyende asize igihugu mbona igihano ari kiriya kimukwiriya kubera amaraso yinzira karengane niwe wayamennye iyo ahaba ntihari gupfa million wenda hari gupfa bake

Natus Kuya 19-10-2017

Puuu..!! Iyindege nayo iranze ibaye indege’ Asyii we...

dada Kuya 19-10-2017

Forget the past ,we focus our future .thats life

Emmy Kuya 19-10-2017

Aliko abazungu bazi ubwenge koko.ubuse bazi ko twemera ibyo batubeshya ngo ntibazi uwahanuye iyo ndege ngo baracyakora iperereza.Bafite ibyo bagamije naho ibyindege byo nakiziritse kumuhoro.Boite noir yiyo ndege nibo bayibitse,satelites nazo zali zarahindukijwe zireba mu Rwanda hose,barangiza ngo barashaka kumenya uwarashe indege?!cyakora nibyo da! nubulyo bwo gukarishya ubwenyi no kugirango bamenye ko abakozi babo bazi akazi.Ninkuko mwarimu aha abanyeshuri umwitozo.Havamo abawutsinda nabawutsindwa aliko mwarimu aba awuzi kdi iyo birangiye awukosorera hamwe nabo.ngibyo ibyo abo bazungu baba bibereyemo ngo baraperereza.N’iteshamutwe gusa.

Joe Kuya 18-10-2017

Imyaka izashira ibinyejana bishore ariko uwahabuye indege arahari

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...