AMAKURU

UKWEZI
RPF

Iby’ingenzi wamenya kuri Dr Frank urangaje imbere aba Green Party bashaka kuba abadepite

Iby’ingenzi wamenya kuri Dr Frank urangaje imbere aba Green Party bashaka kuba abadepite
20-07-2018 saa 11:15' | By Chief Editor | Yasomwe n'abantu 15251 | Ibitekerezo

Dr Frank Habineza, yari umwe mu bakandida batatu bahatanye mu matora ya Perezida wa Repubulika y’u Rwanda yabaye muri Kanama umwaka ushize, none ubu niwe uri ku isonga ku rutonde rw’abantu 34 batanzwe muri Komisiyo y’amatora nk’abazahagararira ishyaka rya Democratic Green Party mu matora y’abadepite ateganyijwe mu mpera z’uyu mwaka. Uyu mugabo umaze imyaka myinshi muri Politiki y’u Rwanda nk’utavuga rumwe n’ubutegetsi, hari benshi baba bifuza kumenya byinshi bimwerekeyeho ari nabyo tugarukaho muri iyi nkuru.

Dr Frank Habineza yavukiye ahitwa i Mityana mu gihugu cya Uganda, avuka mu mwaka w’1977 bivuga ko kuri ubu afite imyaka 41 y’amavuko. Kimwe n’abandi banyarwanda bari baravukijwe uburenganzira bwo kuba mu gihugu cyabo bagahunga, Frank Habineza yatashye mu Rwanda n’umuryango we mu mwaka w’1994 ubwo Ingabo zahoze ari iza RPA zabohoraga igihugu. Habineza kandi yize muri kaminuza nkuru y’u Rwanda i Butare, aho yakurikiranye ibijyanye na Politiki n’Imiyoborere mu myaka y’1999 kugeza muri 2004 ari nabwo yashinze ishyirahamwe rishinzwe kurengera ibidukikije akiri muri kaminuza.

JPEG - 303.1 kb

Dr Frank Habineza yabaye umunyamakuru akiri umunyeshuli muri kaminuza aho yakoreraga icyitwaga Rwanda Herald Newspaper muri 2002 ndetse akaba yaranakoreye Ikinyamakuru Umuseso kiri mu binyamakuru byakunze kwandika inkuru zikomeye cyane mu bya Politiki mu myaka yashize.

Frank Habineza akirangiza kwiga muri Kaminuza yabaye Umunyamabanga wihariye muri Minisiteri yo kurengera ibidukikije, amashyamba na mine hano mu Rwanda, icyo gihe iyi Minisiteri ikaba yarayoborwaga na Mugorewera Dorocella. Habineza yaje kuva muri iyi mirimo ajya kuyobora ikibaya cy’uruzi rwa Nil mu karere ka Afurika y’Uburasirazuba mu myaka ya 2006 kugeza 2009.

JPEG - 76.2 kb

Umugore wa Dr Frank Habineza aba amushyigikiye mu bikorwa bya Politiki

Tariki ya 14 Kanama 2009 nibwo afatanyije na bamwe mu bo bari bahuje ibitekerezo bashinze ishyaka riharanira Demukarasi no kurengera Ibidukikije mu Rwanda (Democratic Green Party of Rwanda) ryaje no kugera aho rikemererwa gukorera mu Rwanda, uyu kandi akaba ari nawe uhagarariye amashyaka yose ya Green Party muri Afurika. Frank Habineza kandi yigeze no kuyobora icyitwa Global Greens Federation (Ihuriro rishinzwe kurengera ibidukikije ku isi)

Muri Werurwe 2010, Habineza yabaye umutumirwa w’icyubahiro muri Kaminuza nyafurika yita ku bidukikije y’i Rabat muri Marroc. Iyi nama yari mu rwego rwo kugirango amashyaka aharanira kubungabunga ibidukikije yo muri Afurika ahurize hamwe imbaraga. Ukwezi kwakurikiyeho yahise atorerwa kuba Perezida wa komite nshingwabikorwa mu ishyirahamwe ry’amashyaka aharanira kubungabunga ibidukikije muri Afurika.

Muri uwo mwaka wa 2010 kandi, uyu mugabo yaje kujya mu gihugu cya Suede aho yabaye nk’umunyapolitiki utavuga rumwe n’ubutegetsi bw’u Rwanda cyane ko ishyaka rye ryari ritaremerwa, nyuma aza kugaruka akurikiza ibyo yasabwaga ishyaka ryandikwa mu mashyaka yemerewe gukorera mu Rwanda. Iki gihugu cya Suede yari yaramaze no kukibonera ubwenegihugu ariko yaje kubutakaza mu mwaka ushize wa 2017, dore ko kugirango yemererwe kuba umukandida ku mwanya wa Perezida byasabaga ko yabanza kureka ubundi bwenegihugu agasigarana ubwenegihugu nyarwanda gusa.

Dr Frank Habineza afite impamyabumenyi y’ikirenga mu bijyanye na Demukarasi mpuzamahanga yaherewe muri Leta zunze ubumwe za Amerika. Dr Frank Habineza, avuga ko mu izina ry’ishyaka ayoboye, bashyize imbere Politiki igamije guha uburenganzira abaturage mu gukoresha ubutaka bwabo ku bijyanye n’ibyo bahingamo,akemeza kandi ko mu migabo n’imigambi y’ishyaka ayobora harimo gukuraho imisoro ku butaka, kongerera abaturage ubushobozi mu kugira uruhare mu bibakorerwa n’indi mirongo migari y’ibyo yumva abazatorerwa kuba abadepite muri iri shyaka bazaharanira kuvuganiramo abaturage nibagera mu nteko ishinga amategeko y’u Rwanda.

JPEG - 359.5 kb

N’ubwo Dr Frank Habineza yatsinzwe amatora ya Perezida, ngo ubunararibonye n’icyizere babonye mu baturage birabizeza kuzabona imyanya myinshi y’abadepite

Dr Frank Habineza ni umugabo wubatse ufite umugore witwa Kabarira Edith bafitanye abana babiri b’abahungu n’umukobwa umwe. Asobanura ko ubu we n’abandi benshi bari ku rutonde rw’abazahatana mu matora y’abadepite bahagarariye ishyaka rye, hari icyizere gituma biyumva nk’abamaze kuba abadepite kandi bakaba bazishimira kuvuganira rubanda mu gihe bazaba bicaye mu nteko ishinga amategeko y’u Rwanda.

Iyo muganira, Dr Frank Habineza asobanura ko atarwanya ubutegetsi buriho mu Rwanda, ahubwo avuga ko kutavuga rumwe n’ubutegetsi bikwiye gusobanuka nko guhangana na Leta mu bitekerezo. Ati: "Kutavuga rumwe n’ubutegetsi buriho ntibisobanura kurwanya Leta. Twebwe ntituvuga rumwe n’ubutegetsi buriho (turi opposition) ariko ntabwo turwanya Leta ( armed groups) kuko abarwanya bakoresha intwaro. Twebwe duhangana na Leta mubitekerezo"

Dr Frank Habineza ashimangira ko igihugu kidashobora gutera imbere kidafite abatavuga rumwe n’ubutegetsi bahora bacunga ibitagenda neza kugirango babyereke Leta nayo yikosore, ari naho ahera asobanura ko abaturage bakwiye kumva ishyaka rye nk’aho n’ubusanzwe ari intumwa zivugira abaturage mu bibazo bitandukanye baba bafite, aho kuba abahanganye n’ubutegetsi nk’uko bamwe baba bashobora kubyibwira. Yumva yizeye ko abaturage bazabashyigikira, bakabona imyanya myinshi mu nteko kugirango bazarusheho gukomeza kubavuganira no kugaragaza ibitagenda ngo bikosoke.

JPEG - 36.7 kb

Aha Frank Habineza yari kumwe na Me Antoinette Mukamusoni wamwunganiraga ubwo ishyaka rye ryarwanyaga ko Itegeko Nshinga ryahindurwa

Dr Frank Habineza n’umuryango we


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...