konka coffee
KONKA

AMAKURU

UKWEZI

Ibyabaye muri cyamunara ya ECOBANK byarijije benshi, Mafia yabaye agatereranzamba

Ibyabaye muri cyamunara ya ECOBANK byarijije benshi, Mafia yabaye agatereranzamba
9-02-2018 saa 11:25' | By Chief Editor | Yasomwe n'abantu 12102 | Ibitekerezo 2

Abaturage, abayobozi mu by’imari, abashoramari n’inzego z’ubutabera, bakunze kugaragaza kenshi icyo bamwe bakunda kwita “Mafia” mu guteza cyamunara imitungo, aho benshi bagaragaza ko ruswa n’amanyanga bikorwamo bimaze gufata indi ntera. Ibyabaye muri cyamunara hishyuzwa umwenda wa umuryango witwa SINAPISI Rwanda ufitiye ECOBANK nabyo byarijije benshi.

Tariki 3 Mutarama 2018, nibwo habaye icyamunara hagurishwa umutungo urimo inzu n’ikibanza by’umuryango utegamiye kuri Leta witwa SINAPISI Rwanda. Igenagaciro ryakozwe n’umuhanga wemewe na Banki nkuru y’igihugu, rigaragaza ko uyu mutungo ufite agaciro k’amafaranga y’u Rwanda asaga miliyoni 74, nyamara uwo mutungo waguzwe amafaranga y’u Rwanda miliyoni 24, nyamara hari abavuga ko bababajwe cyane no kwimwa uyu mutungo mu gihe batangaga amafaranga arenga ayo.

Bijya gutangira byose, muri 2012 Ecobank Rwanda yahaye inguzanyo umuryango SINAPISI Rwanda, ungana n’amafaranga y’u Rwanda miliyoni 500. Uyu muryango ntiwabashije kwishyura uyu mwenda uko bikwiye, ndetse umuyobozi wawo wanawushinze, Jean Baptiste Sengayire, avuga ko Ecobank yari ifite uburenganzira bwo guteza cyamunara, ariko hakaba harabayemo iteshagaciro rikabije, ndetse n’icyo yita amanyanga na ruswa. Avuga ko nyuma yo kubona bananiwe kwishyura, basabye Ecobank ko bakumvikana uko bazishyura uwo mwenda, bakanemera guha Banki umutungo wabo ufite agaciro karenga miliyari ngo iwucunge hajye havamo ubwishyu, ariko banki ikabananiza kuko ngo banayisabye ko yabaha igihe bakagurisha uwo mutungo ikabangira.

Nyuma yo kwemeza ko imitungo itandukanye ya SINAPISI Rwanda igomba gutezwa cyamunara, ubuyobozi bw’uyu muryango bwagaragaje ko cyamunara itarimo kugenda neza, ndetse batanga ikirego mu rukiko rw’ubucuruzi, bavuga ko harimo kuba iteshagaciro rikabije, batambamira iyo cyamunara, ndetse kuri uyu wa Gatanu tariki 9 Gashyantare nibwo habaye urubanza, hategerejwe ikizava mu myanzuro y’urukiko.

Sengayire Jean Baptiste, umuyobozi wa SINAPISI Rwanda ifitanye ibibazo na Ecobank

Hagati aho ariko, umutungo wa mbere wa SINAPISI Rwanda wamaze gutezwa cyamunara ugurwa miliyoni 24, nyamara hari abavuga ko batanze arenga ayo kure bakabima uwo mutungo. Muri abo harimo uwo twaganiriye wanze ko amazina ye atangazwa, ariko yemera ko amajwi ye twayakoresha mu nkuru. Avuga ko yatanze miliyoni 28 bakanga kuyandika, ndetse ngo uwaguze ntiyigeze agaragara ahaterejwe cyamunara, ngo hari amanyanga yakorwaga n’abo yita abakomisiyoneri bica cyamunara. Hari undi uvuga ko yatanze miliyoni 30 ariko nawe zikanga kwandikwa. Hari kandi amashusho yafashwe uwo munsi ahabereye cyamunara, yumvikanamo amarira no kwitotomba kw’abaturage bagaragazaga ko hari amanyanga yakozwe na Ecobank ifatanyije n’umunyamategeko warangije urwo rubanza ndetse n’abitwa abakomisiyoneri bagena uzagura, ayo azatanga n’icyo abo bose bazungukamo.

UMVA HANO UKO ASOBANURA UKO BYAGENZE:

Ba nyiri iyo mitungo bavuga ko umunyamategeko yagiye agera ahaterezwa cyamunara mbere y’amasaha yatangaje akahagera ari kumwe n’abakomisiyoneri, ndetse Sengayire uyobora SINAPISI Rwanda avuga ko hari abakomisiyoneri bababwiye ko nibabaha miliyoni eshatu bazica cyamunara, kuko ngo hari miliyoni 11 abumvikanye gukora amanyanga muri iyo cyamunara bagabanye.

REBA AMASHUSHO YAFATIWE MURI ICYO CYAMUNARA:

Me MUKAKABANDA Athanasie, umuhesha umunyamategeko wari wahawe akazi na RDB ngo akoresheje icyo cyamunara, ahakana iby’uko icyo cyamunara cyaba cyarabayemo amanyanga na ruswa, kandi agashimangira ko ibyakozwe byakurikije amategeko.

Twabajije Perezida w’urugaga rw’Abahesha b’inkiko b’umwuga niba umuhesha w’inkiko ugaragaweho amakosa akurikiranwa, adutangariza ko ibyo batabijenjekera ndetse aboneraho gutangaza ko uyu Me Mukakabanda Athanasie atari umuhesha w’inkiko w’umwuga, ahubwo ngo ni umunyamategeko wunganira abaregwa (avocat) wahawe izo nshingano na RDB zo kurangiza urwo rubanza. Yanavuze ko abanyamategeko bakoze amakosa nk’aho usanga byitirirwa abahesha b’inkiko kuko bimenyerewe ko ari bo barangiza imanza.

Hashize igihe dushakisha uwitwa Manzi Don Yusuf ushinzwe iyamamazabikorwa muri Ecobank ariko inshuro zose twashatse amakuru y’icyo iyi banki ibivugaho ntibyadukundiye, icyakoze umukozi wa Flash TV bavuganye kuri telephone yamubwiye ko yumva ibyo nta nkuru ibirimo.

Mu kwezi k’Ukwakira 2017, Guverineri Wungirije wa Banki Nkuru y’u Rwanda, Dr Monique Nsanzabaganwa, yavuze ko uburyo cyamunara zikorwa bigaragaza ko harimo ibibazo bya ruswa n’akarengane bikaba bikwiye guhagurukirwa.

Yagize ati: “Harimo akarengane tubona, harimo ruswa[…], hari igihe witegereza ukuntu byagenze ugahita ubona ko atari gusa. Ni ikibazo gifite uburemere, kibangamiye ubusugire bw’urwego rw’imari ku buryo dukeneye ko inzego zose zigihagurukira.”

Dr Nsanzabaganwa yavuze ko abakozi b’amabanki bagira uruhare mu kugena uko cyamunara igenda bakabyungukiramo, icyo kibazo kikaba kitagomba kurenzwa amaso hagamijwe kugarura imyitwarire ikwiye muri uru rwego.

Guverineri wa Banki Nkuru y’u Rwanda (BNR), John Rwangombwa aherutse gutangaza ko azakorana n’inzego z’ubutabera bagahangana n’ubujura nk’ubu bukorwa mu cyamunara. Icyo gihe uyu muyobozi we yabwise Mafia.


INKURU ZA :
Tanga Igitekerezo
Ibitekerezo 2
Iraknunda Christophe Kuya 12-02-2018

Bazabishyura Mbere

RUTO Kuya 11-02-2018

ARIKO UBUNDI BAGIYE BISHYURA .

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...