AMAKURU

UKWEZI

Impamvu Perezida yakuyeho Mureshyankwano n’icyatumye amusimbuza uwayoboraga Polisi

Impamvu Perezida yakuyeho Mureshyankwano n’icyatumye amusimbuza uwayoboraga Polisi
19-10-2018 saa 14:36' | By Chief Editor | Yasomwe n'abantu 25158 | Ibitekerezo 7

Perezida Kagame afite ububasha ahabwa n’amategeko bwo kuvugurura Guverinoma no gukora impinduka mu bandi bayobozi batandukanye, ashingiye ku biteganywa n’Itegeko Nshinga rya Repubulika y’u Rwanda ryo mu 2003 ryavuguruwe muri 2015, cyane cyane mu ngingo yaryo ya 116.

Perezida ni we uzi impamvu umuyobozi uyu n’uyu yasimbujwe undi akanamenya impamvu agena umuntu runaka ngo abe umusimbura w’uwo muyobozi yakuyeho. Buri wese ariko ashobora no gusesengura akabona impamvu yaba yabimuteye kuko nk’uko akunda kubyivugira, ibyo abayobozi bakora ubwabyo bigaragarira mu musaruro batanga.

Ibikubiye muri iyi nkuru ni isesengura ry’umwanditsi ku giti cye ashingiye ku bigaragarira amaso no ku bimenyetso bifatika bigaragaza umusaruro wa Mureshyankwano Marie Rose wasimbuwe ku mwanya wa Guverineri w’Intara y’Amajyepfo, inshingano zitoroshye zo kuyobora iyi ntara zigahabwa CG Emmanuel Gasana wari umaze igihe kirekire ayobora Polisi y’u Rwanda.

JPEG - 271.8 kb

Aha Mureshyankwano na CG Gasana Emmanuel bari kumwe na Minisitiri muri Perezidansi, Madamu Uwizeye Judith

Mureshyankwano Marie Rose yagiye ku mwanya wa Guverineri w’Intara y’Amajyepfo tariki 4 Ukwakira 2016, bivuga ko yari awumazeho imyaka ibiri. Mbere yaho yari umudepite mu Nteko Ishinga amategeko y’u Rwanda. Igihe yari amaze ayobora iyi ntara, ntawabura kuvuga ko yasubiye inyuma mu buryo bugaragara ndetse ibi binashimangirwa no kuba muri rusange yarabaye iyanyuma mu mihigo urebye uturere twayo uko twitwaye mu mwaka wa 2017/2018.

Mu turere 30 tugize u Rwanda, nta karere na kamwe ko mu Ntara y’Amajyepfo kaje mu myanya 15 ya mbere. Akarere ka Muhanga niko kagerageje muri iyi ntara, kaza ku mwanya wa 16. Akandi kaje hafi ni Huye yabaye iya 19, Nyaruguru iba iya 24, Gisagara iya 25, Kamonyi iba iya 26, Nyamagabe iba iya 28, Ruhango iba iya 29 naho Nyanza yo yaherutse utundi iba iya 30. Byonyine imyanya itatu ya nyuma yihariwe n’uturere two mu Ntara y’Amajyepfo, akarere ka Nyanza karimo icyicaro cy’iyi ntara gaheruka utundi twose.

JPEG - 188.5 kb

Ibi uwabishingiraho ubwabyo yavuga ko Intara yayoborwaga na Mureshyankwano Marie Rose yazahaye, kuburyo yari ikeneye uwayifasha gusubira ku murongo. Ibikwiye kuranga uwagombaga kumusimbura nabyo umuntu yabibonera ishusho byoroshye bitewe n’ibibazo bikomeye byagiye bizahaza iyi ntara.

1. Ikibazo cy’umutekano cyazahaje cyane Intara y’Amajyepfo

Mu turere dutandukanye tw’Intara y’Amajyepfo, ikibazo cy’umutekano cyagiye kigaragara cyane aho ibikorwa by’ubugizi bwa nabi byagiye binahitana ubuzima bw’abantu.

Urugero ni nk’aho mu masaha y’umugoroba wo kuwa Kabiri tariki 24 Ukwakira 2017, abajura bitwaje intwaro bateye Banki ya Kigali, ishami rya Buhanda riherereye mu karere ka Ruhango mu Ntara y’Amajyepfo, biba amafaranga menshi hanyuma banarasa abakozi ba banki barimo n’umwe wahise ahasiga ubuzima. Ubu bujura bwabaye ahagana saa kumi n’ebyiri n’igice z’umugoroba.

Muhawenimana Quesie wari umukozi ushinzwe kwakira no gutanga amafaranga muri BK ya Buhanda (Cashier), niwe warashwe n’abo bagizi ba nabi ahita ahasiga ubuzima, naho Umuyobozi w’iryo shami Sylvain Rubayita; Alphonse Muhayimana umwungirije na Evariste Kagama wari umurinzi barakomereka bajyanwa mu bitaro.

Urundi rugero rwanavugishije benshi, ni urwo mu ijoro ryo kuwa Kabiri rishyira kuwa Gatatu tariki 20 Kamena 2018, ubwo abajura bitwaje intwaro bagabye igitero mu murenge wa Nyabimata wo mu karere ka Nyaruguru mu Ntara y’Amajyepfo, barasa abantu babiri barapfa bakomeretsa Umuyobozi w’Umurenge n’abandi benshi banashimuta abandi bantu benshi barimo abanyerondo. Ibi nabyo byari ishyano mu majyepfo. Aha barahasubiriye tariki 1 Nyakanga 2018 barasa amasasu menshi ariko ntibagira uwo bica ariko basahura abaturage amatungo, imyenda n’ibindi bitandukanye.

Ntawakwirengagiza kandi ibibazo byabaye muri Huye mu mpera za Nyakanga aho abajura bane bashakaga kurwanya inzego z’umutekano barashwe bagapfa, ibyo bikaba byarabaye inshuro ebyiri mu bihe bitandukanye.

Ibibazo by’umutekano muri iyi Ntara byaniyongeramo iby’ubwicanyi butandukanye bwagaragaye cyane nko mu turere twa Kamonyi, Muhanga, Huye, Gisagara na Nyaruguru, aho abaturage benshi bagiye bicana cyane hagati yabo muri iyi myaka ibiri ishize.

2. Itekinika, kunyereza umutungo no guhombya ibya rubanda nabyo byaranze iyi ntara.

Mu gihe gito gishize, Intara y’Amajyepfo yagiye ivugwamo kenshi kweguzwa kw’abayobozi batandukanye ndetse ahenshi bahahita batabwa muri yombi kubera ibyaha bishingiye ku mutungo wa Leta, kubeshya mu mibare bisanzwe bizwi nko gutekinika cyangwa indi myitwarire idahwitse. Ibyo byabaye mu turere twa Ruhango, Huye, Kamonyi n’ahandi.

3. Umubare w’inzu z’akajagari zubatse mu gihe cy’amatora ya Perezida werekanye akavuyo no guhuzagurika k’ubuyobozi

Mu bice bitandukanye by’Intara y’Amajyepfo, mu gihe cy’amatora ya Perezida wa Repubulika hubatswe amazu menshi cyane cyane mu karere ka Kamonyi hagana imbibi n’umujyi wa Kigali kakanagira igice cy’umujyi kimaze gutera imbere cyane.

Inzu 102 ni zo zabaruwe ko zubatswe mu Karere ka Kamonyi mu gihe cy’amatora, abayobozi bakitwaza ko bari bahugiye mu gutegura amatora mu gihe hari abaturage bemeza ko hagiye habaho ubwumvikane hagati y’abubakaga na bamwe mu bayobozi. Mureshyankwano ibi yarabinenze anashimangira ubwe ko bidashoboka ko inzu yakubakwa ngo yuzure abayobozi batabizi, nyamara ikibazo cy’imyubakire y’akajagari muri Kamonyi cyarakomeje kugeza n’ubu cyabaye agateranzamba.

Muri icyo gihe cy’amatora kandi, nko mu karere ka Ruhango hubatswe inzu nyinshi zirimo n’iy’Umunyamabanga Nshingwabikorwa w’akagari, izigera kuri 18 zikaba zarasenywe mu kwezi kwa Kanama 2017. Aha muri utu turere, zimwe mu nzu zubatswe nta byangombwa zarasenywe ariko hari izindi ubuyobozi bwaretse kuko byagaragaye ko amakosa yakozwe n’abayobozi bagiye bashuka abaturage bakanabaha amafaranga ya ruswa ngo bakunde biyubakire nta byangombwa.

Kuki CG Emmanuel Gasana yaba yari akwiye guhabwa kuyobora iyi ntara?

CG Emmanuel Gasana, yari amaze igihe kirekire ayobora Polisi y’u Rwanda. Mu gihe cyose yamaze ayiyobora, yageze kuri byinshi haba mu bikorwa byo gucunga umutekano mu Rwanda no mu mahanga, haba no mu bikorwa by’iterambere n’imibereho myiza y’abaturage. Kuba Gasana yasimbuwe n’uwari umwungirije ku buyobozi bwa Polisi, nabyo byagaragaza ko imiyoborere yayo isanzwe yifashe neza.

JPEG - 35 kb

Ibibazo by’umutekano muri rusange, ibyo kunyereza ibya rubanda n’iby’itekinika, byakemurwa n’umuntu ufite ubuhanga n’uburambe mu buyobozi bw’inzego z’umutekano, uzi uko yakorana na zo mu guhashya iyo mungu yamunze iyi ntara igatuma abaturage bakomeza kururirwa no kuza mu myanya ya nyuma mu mihigo ari nabyo bishimangira ko ubuyobozi buba bubadindiza mu iterambere no mu mibereho y’abaturage.

Emmanuel Gasana afite akazi gakomeye ko gusubiza ku murongo iyi ntara ariko ubuhanga n’ubunararibonye yagaragaje mu gihe yayoboraga Polisi y’igihugu byatanga icyizere ko azabasha gukorana n’izindi nzego hamwe n’abaturage maze iyi ntara nini ikongera kuza mu zihagaze neza mu iterambere no mu miyoborere myiza.


INKURU ZA :
Tanga Igitekerezo
Ibitekerezo 7
kabayiza Fidele Kuya 23-10-2018

Ntawamenya neza usibye nyir’ubwite Perezida Kagame gusa ntekereza ko ari amahitamo meza no guha inshingano zikomeye umugabo w’umukozi nka CG Gasana kuko yamubonyemo igisubizo cy’ibibazo byose biri mu majyeofo y’u Rwanda nk’uko yanabigenje muri Polisi y’u Rwanda igihe yahabwaga kuyiyobora kandi akayigeza kuri byinshi bikomeye. Tumuhaye ikaze kandi tumwifurije imirimo mishya myiza kuk tumwizeyeho ubushobozi bwo gutanga icyo afite cyose kugira ngo ibyo ashinzwe bigerweho neza Kandi ku gihe.

Firimini Kuya 21-10-2018

Gavana Emmanuel Gasana nikaze nakaribu kuko aje guhindura ibitashobokaga abaturage bamube inyuma mugufatanya gutezimbere intara imihigo irakomeye kandi irakomeje

Firimini Kuya 21-10-2018

Gavana Emmanuel Gasana nikaze nakaribu kuko aje guhindura ibitashobokaga abaturage bamube inyuma mugufatanya gutezimbere intara imihigo irakomeye kandi irakomeje

Gruec Kuya 20-10-2018

Ariko ubu koko Intara y’Amajyepfo muranze muyinduye "IWAWA" kweli.

Gruec Kuya 20-10-2018

Ariko ubu koko Intara y’Amajyepfo muranze muyinduye "IWAWA" kweli.

Ephrem Kuya 19-10-2018

Ikaze Muyobozi, kandi twanyije namwe mw’ururugamba rw’iterambere ry’intara y’a.ajyepfo turushaho kuba ba Ndabizi, ndabikora ndetse na ndabiharanira.

Dukorane umurava dutere imbere.

Ephrem Kuya 19-10-2018

Ikaze Muyobozi, kandi twanyije namwe mw’ururugamba rw’iterambere ry’intara y’a.ajyepfo turushaho kuba ba Ndabizi, ndabikora ndetse na ndabiharanira.

Dukorane umurava dutere imbere.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...