konka coffee
KONKA

AMAKURU

UKWEZI

Kayumba Nyamwasa na bagenzi be bashwishurijwe n’urukiko barezemo Leta y’u Rwanda

Kayumba Nyamwasa na bagenzi be bashwishurijwe n’urukiko barezemo Leta y’u Rwanda
25-03-2017 saa 10:30' | By Chief Editor | Yasomwe n'abantu 16689 | Ibitekerezo 3

Kayumba Nyamwasa urwanya ubutegetsi bw’u Rwanda akaba yarahunze igihugu ndetse yarakatiwe n’inkiko igihano cy’igifungo, we na bagenzi be batandatu bashwishurijwe n’Urukiko rwa Afurika rw’Uburenganzira bwa muntu nyuma y’uko bari bareze Leta y’u Rwanda mu gihe cyashize basaba ko hahagarikwa umugambi wo guhindura Itegeko Nshinga mu Rwanda. Basubijwe ko ibyo basaba byataye igihe.

Umwanzuro w’urubanza rwasomwe kuri uyu wa Gatanu tariki 24 Werurwe 2017, wagaragaje ko abantu 7 barangajwe imbere na Faustin Kayumba Nyamwasa bari bareze Leta y’u Rwanda, ibyo baregera byabaye impfabusa kuko byataye igihe. Ni umwanzuro wasomwe nta ruhande rw’abarega cyangwa urwa Leta y’u Rwanda ruhari.

Faustin Kayumba Nyamwasa na bagenzi be batandatu batanze ikirego tariki 22 Nyakanga 2015 barega Leta y’u Rwanda aho basabaga ko urukiko nyafurika bw’Uburenganzira bwa muntu rwahagarika umugambi wo guhindura Itegeko Nshinga ry’u Rwanda cyane cyane mu ngingo y’101. Bagaragazaga ko batifuza ko Perezida Kagame yakongererwa kwiyamamariza indi manda.

Urukiko rwavuze ko rwakiriye ibirego kandi ko na Leta y’u Rwanda yarezwe yagize icyo ibivugaho. Urukiko rwatangaje ko u Rwanda rwasabye ko ibyo birego bitakwakirwa kuko ababitanze harimo abakurikiranyweho ibyaha bikomeye birimo ibya Jenoside yakorewe abatutsi, hakabamo abahamijwe ibyaha n’urukiko rwa gisirikare ndetse n’abandi bahamijwe ibyaha n’inkiko Gacaca.

Nyuma abari batanze ibirego basabye urukiko ko urubanza rwaba rusubitswe kuko bamwe muri bo bari batarabona ibyangombwa bibajyana i Arusha muri Tanzania aho uru rukiko rukorera, nyuma itariki yo guhindura Itegeko Nshinga irinda igera nta kindi gihe basabye ko urubanza rwabera, ubu ibyo basaba bikaba bimaze igihe byararangiye kuko Itegeko Nshinga ryahinduwe mu kwezi k’Ukuboza 2015.

Kayumba Nyamwasa yari kumwe muri uru rubanza n’uwitwa Alfred Kennedy Gihana, Frank Ntwali, Safari Stanley, Dr Etienne Mutabazi, Epimaque Ntamushobora na Bamporiki Abdallah.

Lt Gen Kayumba Faustin Nyamasa yigeze kuba umugaba mukuru w’ingabo z’u Rwanda, nyuma aza guhagararira u Rwanda mu Buhinde ku mwanya wa ambasaderi, aho yavuye afata iy’ubuhungiro akerekeza muri Afurika y’Epfo.

Muri 2011, Lieutenant General Kayumba Nyamwasa yahamwe n’ibyaha byo kurema umutwe w’abagizi ba nabi, gukurura amacakubiri n’ivangura; ibyaha bivutsa igihugu na Leta umudendezo no gusebanya. Yahamwe kandi n’icyaha cyo gutoroka igisirikare. Yaburanishijwe adahari, akatirwa imyaka 24 y’igifungo. Afatanyije na bagenzi be barwanya Perezida Kagame n’ubutegetsi bwe, bashinze ishyaka RNC rirwanya byeruye ubutegetsi bw’u Rwanda n’ubwo nyuma ryacitsemo ibice.


INKURU ZA :
Tanga Igitekerezo
Ibitekerezo 3
Nkunda adeodatus Kuya 21-06-2017

Dushyigikiye Paul kagame ni bikorwa bye byiza adukorera,abandi nabamagambo gusa,Mandi tumurinyuma%

Nkunda adeodatus Kuya 21-06-2017

Dushyigikiye Paul kagame ni bikorwa bye byiza adukorera,abandi nabamagambo gusa,Mandi tumurinyuma%

hakorimana Kuya 26-03-2017

Mubareke barabashuka twewe abanyarwanda twahisemo neza.

IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...