konka coffee
KONKA

AMAKURU

UKWEZI

Minisitiri Ngirente yagaragaje uruhare Ubuhinzi n’ubworozi bifite mu bukungu bw’ibihugu

Minisitiri Ngirente yagaragaje uruhare Ubuhinzi n’ubworozi bifite mu bukungu bw’ibihugu
3-04-2018 saa 09:43' | By Akayezu Jean de Dieu | Yasomwe n'abantu 1087 | Ibitekerezo 1

Minisitiri w’Intebe w’u Rwanda Dr Edouard Ngirente yagaragaje ko kugeza ubu ubuhinzi n’ubworozi bigifatiye runini ubukungu bw’igihugu, ibintu ahuza na raporo ya Banki y’Isi yo muri 2016 igaragaza ko uru rwego rw’ubuhinzi n’ubworozi rukomeje kuza imbere mu bibumbatiye ubukungu bw’ibihugu byinshi

Ibi Minisitiri Ngirente yabigarutseho kuri uyu wa Kabiri tariki 3 Mata 2018, ubwo yagezaga ku Nteko Ishinga Amategeko y’u Rwanda ikiganiro kibanze ku miterere, politiki n’amategeko bigenga urwego rw’ubuhinzi n’ubworozi; uko ubuhinzi n’ubworozi bihagaze muri iki gihe mu Rwanda n’uruhare rw’ubuhinzi n’ubworozi mu bukungu bw’igihugu, ahagarutswe ku mbogamizi urwego rw’ubuhinzi n’ubworozi ruhura nazo ndetse n’ ingamba zo kuzamura umusaruro w’ibikomoka ku buhinzi n’ubworozi.

Minisitiri Ngirente yongeye gushimangira ko ubuhinzi n’ubworozi bugifatiye runini ubukungu bw’igihugu anashimangira ko iyo urebye uburyo ingengo y’imari igenda izamuka bitanga icyizere

Yagize ati “Nkuko Raporo ya Banki y’Isi yo mu 2016 yongeye kubigaragaza, kandi nkuko twese tubizi, ubuhinzi n’ubworozi buracyafite uruhare rugaragara mu bukungu bw’ibihugu (Contribution of agriculture sector to GDP). Ku bijyanye n’uko ingengo y’imari igenda izamuka, kuva mu 2011/12 kugera mu 2017/18 ingengo y’imari yo mu buhinzi n’ubworozi yazamutse ku mpuzandengo ya 9%. Mu 2011/12 yari 80,909,259,511 Frw naho mu 2017/18 ni 118,633,246,429 Frw (uku kwiyongera kungana na 47%).

Yakomeje agira ati “Ku birebana n’uruhare rw’ubuhinzi n’ubworozi mu bukungu bw’igihugu cyacu, ubuhinzi n’ubworozi byari bifite uruhare rungana na 31% mu 2017 by’umusaruro mbumbe w’igihugu cyacu (GDP), bivuye kuri 28% mu 2010. By’umwihariko, mu 2017, umusaruro uturutse ku buhinzi n’ubworozi, wiyongereye ku kigereranyo cya 7% (Annual agriculture growth) mu gihe wari kuri4% muri 2016.

Mu bworozi (livestock and livestock products), umusaruro wiyongereye ku kigero cya 11%; - Mu bihingwa ngandurarugo (food crops) wiyongereyeho 7%; Mu bihingwa byoherezwa hanze (export crops) wiyongereyeho 2% - Mu bworozi bw’amafi (fishing) wiyongereyeho 5%.

Minisitiri Ngirente kandi yavuze ko kugira ngo abahinzi barusheho kubona umusaruro uhagije n’inyungu igaragara, ndetse n’igihugu kihaze mu biribwa, Guverinoma y’u Rwanda yashyizeho gahunda yo kwihutisha iterambere ry’ubuhinzi (Crop Intensification Programme/CIP) yatangiye mu 2007.

Yagaragaje ko mu bijyanye no kwihaza mu biribwa, hagati ya 2015 na 2017, hongerewe umusaruro w’ibikomoka k’ubuhinzi n’ubworozi: • Umuceri wiyongereyeho 33%, uva kuri toni 97,437 ugera kuri toni 130,055; . Ibirayi byiyongereyeho 17%, biva kuri toni 662,018 bigera kuri toni 776,722. Ibishyimbo byiyongereyeho 7%, byavuye kuri toni 431,882 bigera kuri toni 460,239.

Imyumbati yiyongereyeho 13%, yavuye kuri toni 924,539 ikagera kuri toni 1,041,986. Soya yiyongereyeho 12%, iva kuri toni 21,250 igera kuri toni 23,742.

Ingano ziyongereyeho 37%, zivuye kuri toni 7,996 zigera kuri toni 10,926; Amata yiyongereyeho 17%, yavuye kuri toni 700,267 agera kuri toni 816,791; Inyama ziyongereyeho 47%, zavuye kuri toni 103,281 zigera kuri toni 152,029.

Amafi yiyongereyeho 13%, avuye kuri toni 25,405 agera kuri toni 28,705; Amagi yiyongereyeho 7%, yavuye kuri toni 6,973 agera kuri 7,475; Naho ibigori byagabanutseho 3%, ni ukuvuga ko byavuye kuri toni 370,124 bikagera kuri toni 358,417. Byatewe n’icyorezo cya nkongwa

Minisitiri w’Intebe kandi yavuze ko imibare igaragazwa n’Ikigo k’Igihugu Gishinzwe Guteza imbere Iyoherezwa mu Mahanga by’Ibikomoka k’Ubuhinzi n’Ubworozi (NAEB) na Banki Nkuru y’Igihugu, iragaragaza ko agaciro k’ibyo u Rwanda rwohereza mu mahanga kiyongereye mu 2017.

Ku ruhare rw’ubuhinzi mw’iterambere ry’inganda, mu myaka 10 ishize, ubuhinzi n’ubworozi byagize uruhare mu iterambere ry’inganda. Ibi biri mu byatumye mu 2017 umusaruro mbumbe (GDP) uturuka mu rwego rw’inganda ugera kuri miliyari 1,198 Frw.

Ku birebana n’uruhare rw’ubuhinzi mu gutanga akazi, mu Rwanda hari amakoperative 8,829 akora ibikorwa by’ubuhinzi n’ubworozi, atanga imirimo ku bantu 1,360,562.

Abanyarwanda bakoraga mu rwego rw’ubuhinzi n’ubworozi bari 65.8% by’Abanyarwanda bose bari bafite umurimo mu 2017 (5,084,011).

Itegeko Nshinga rya Repubulika y’u Rwanda riteganya ko ‘Rimwe mu gihembwe cy’Inteko Ishinga Amategeko, Minisitiri w’Intebe aza gusobanurira ibikorwa bya Guverinoma’ Inteko Ishinga Amategeko, Imitwe yombi iteranye.

Muri gahunda y’imyaka 7 ya guverinoma y’u Rwanda, harimo ingamba z’uko ubutaka bwuhirwa buzava ku buso bungana na hegitari 48.508 zo muri uyu mwaka (2016/2017) bugere kuri hegitari 102.284 muri 2024. Umwihariko uzahabwa ubuhinzi bukorerwa mu bishanga n’ubukorerwa ku buso buto hakoreshejwe ikoranabuhanga ridahenze cyane (Small-scale irrigation).

Hazongerwa ikoreshwa ry’imashini mu mirimo y’ubuhinzi rive kuri 25% (2017) rigere kuri 50%; ndetse ubuso bw’ubutaka buhingwa nyuma yo guhuzwa buzazamuke bugere kuri hegitari 980.000 buvuye kuri hegitari 635.603.


INKURU ZA :
Tanga Igitekerezo
Ibitekerezo 1
Mugisha Kuya 3-04-2018

Big Up Honorable PM urashoboye turabyizeye!! Tu as toujour été intelligent!

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...