konka coffee
KONKA

AMAKURU

UKWEZI

Perezida Kagame yagaye umuco w’abayobozi bahora birata ko amahanga aza kubigiraho

Perezida Kagame yagaye umuco w’abayobozi bahora birata ko amahanga aza kubigiraho
14-12-2017 saa 13:47' | By Akayezu Jean de Dieu | Yasomwe n'abantu 1909 | Ibitekerezo

Perezida Kagame yavuze ko kuba RPF Inkotanyi yizihiza isabukuru y’imyaka 30 imaze ibayeho ari intambwe ikomeye, ariko bitari imyaka myinshi RPF imaze gusa ndetse atari aho bigarukira, ahubwo ari intambwe ijyanye n’imbaraga, ubushake n’ubwitange byose byakoreshejwe kugirango uyu muryango uhindure amateka, imyumvire n’imibereho by’u Rwanda, ndetse bikanahindura abanyarwanda. Mu ijambo rye, Perezida Kagame yagaye cyane imyitwarire irimo kwiyemera ya bamwe mu bayobozi bavuga ko amahanga aza kwigira ku Rwanda.

Mu butumwa yageneye abasaga ibihumbi bibiri bitabiriye inama nkuru y’Umuryango RPF Inkotanyi iteraniye i Rusororo ku cyicaro cy’uyu muryango, Umuyobozi mukuru w’uyu muryango, Paul Kagame, yavuze ko uyu muryango wavutse kubera impamvu z’ibibazo bikomeye u Rwanda rwari rufite ndetse z’ibibazo bituruka kuri politiki mbi, ibyo bibazo byarimo igihugu kirangwa n’amacakubiri kandi kitagira aho kigana habereye ba nyiracyo cyangwa abagituye aho abaturage batahabwaga uburenganzira bakwiye, nta gaciro bahabwa nta n’umutekano Abanyarwanda bafite, aho ntawabaga azi ko izuba riri burenge cyangwa ijoro riri bucye.

Kagame kandi yavuze ko kugira ngo ibi bihinduke byasabye umuhate n’ubwitange bya benshi kandi bamwe bari muri iyi nama. Yakomeje avuga ko imyitwarire ikwiye ari indangagaciro zari zikenewe kandi zikenewe n’uyu munsi ndetse zizaba zikenewe ejo hazaza mu Banyarwanda bose mu nzego bakoreramo zitandukanye.

Kagame kandi yakomoje ku rugamba rwo kwibohora avuga ko FPR Inkotanyi yabohoye u Rwanda n’abanyarwanda ari na kimwe mu byo kwishimira muri iyi myaka 30 ishize ariko ko kwibohora bitararangira kandi hari indangagaciro RPF Inkotanyi yigisha abanyamuryango n’abanyarwanda muri rusange zirimo kumenya ko buri wese akwiye guharanira inyungu rusange mu guteza imbere u Rwanda.

Yagize ati “Ukwibohora ntibisobanura ko ibibazo byarangiye, byanasabye no guhangana n’ibibazo byavutse nyuma, kwibohora birirangira, cya gihe cyararangiye dutangira ikindi cy’ibibazo bishya bijyana n’iki gihe. Ibi bibazo birimo kwanga guhindura imyumvire ku bantu bamwe, kwanga kwiga no kumenya no kugira ngo ibyo bituyobore, harimo kumva ko hari ibintu bitandukanye igihugu kitugomba kugira ngo ibi byose bishoboke, akenshi ibyo abantu banyuranije nabyo (…..) hariho abanyuranije nabo, hari abanyuranije n’uko dukwiye kuba dukorera inyungu rusange”

Yakomeje agira ati “Ariko akenshi iyo ugiye kureba ibyo byose navugaga uzabisanga byombi ari ukubaka imiyoborere myiza ari ukubaka ubushobozi, ushobora gusanga muri twe, uku twicaye gutya harimo abo usanga basenya ibyo twubaka ariko abaturage dukorera, abaturage tuyobora bo barumva, bo bafite ubushake, bafite umuco, bazi icyo bashaka muri abo bajya gushukwa ntabwo barimo bo bahora bategereje icyo twababwira, icyo twabagezaho, icyo twakorana nabo, barumva barashaka ubuzima bwiza, barashaka amashuri y’abana babo, barashaka umutekano, barashaka gukora bakihaza mu byo bakeneye, nibyo badusaba ninabyo baduhera izi nshingano dufite uko twicaye hano, nta kuntu rero twakwihanganira kunyuranya nabo, n’ibyo badutezeho, ninaho haturuka ko muri izi nshingano zacu tugomba kubibazwa, kubazwa inshingano zacu.

Kagame kandi yavuze ko abakuze by’umwihariko abayobozi bakwiye kureba niba koko urubyiruko ruhabwa ubutumwa bwiza bakamenya ibyo babigisha kuko urubyiruko rushaka kubareberaho imyifatire, imico yo kubaka igihugu, kubaka u Rwanda, kandi avuga ko atari ibintu bishobora kubaho gutyo gusa bidafite aho bikomoka.

Perezida Kagame kandi yakomoje ku muco yise ururimi rutari rwiza rwo kuba Abanyarwanda bakunze kuvuga ngo bageze kuri byinshi n’amahanga aza kubyigiraho.

Yagize ati “Reka nongere mbone umwanya iki kintu cy’umuco cy’ibyo abantu tubona, ibyo dushobora kuba twiga, reka nongere ntange ingero. Ejo bundi ntabwo nari mpari mu nama mwari mufite hano, byose narabikurikiranye, icyo kanaka bamubajije, icyo yasubije, n’abavugaga bakarondogora (……… ) Reka nongere nsubiremo ikintu kimwe nizere ko bibaye ubwa nyuma"

Yunzemo ati “Nakomeje numva imvugo abantu bakavuga ngire ngo si ukuvuga ni ukwivuga mukavuga ko amahanga afite ibyo aza kutwigiraho, iyo mbyumvishe bintera ikintu….. iyo mvugo ni imvugo ki y’abanyamuryango? Muriratana iki ko hari ibibazo byinshi byo gukemura mwaretse akaba aribyo dukemura niba hari ibyo abantu baza kwiga wabaretse bakaza wowe urajya kuvuga ibiki? Wabaretse abantu bakaza wowe uravuga iki?"

Yakomeje agira ati “Kuvuga ngo amahanga akwiye kuzaza kutwigiraho, amahanga araje urwo ni ururimi ki? Ni ururimi rw’uwuhe muco? Dore n’abo bayobozi bose, ejobundi nabonye byaragiye no mu bato, aho bibera bibi ni muri aba bantu bamwe bahaguruka ngo abantu baza kutwigiraho, n’iyo wamubaza uti baza kukwigiraho iki... Ubu bibaye ubwa gatatu mbibabwira urwo si ururimi abantu bakora, mu birekere aho izo mbaraga muzikoreshe mukemura ibibazo, mwiyubaka rwose ndabasabye nizere ko ari bwo bwa nyuma mbivuze rwose ntabwo ari umuco”

Asoza izi mpanuro Perezida Kagame akaba n’umuyobozi mukuru wa RPF Inkotanyi yavuze ko imyaka 30 y’isabukuru isobanuye byinshi kandi avuga ko iyi myaka idahagije ahubwo buri wese yaba umunyamuryango cyangwa umunyarwanda muri rusange yagakwiye kuba atekereza indi myaka myinshi iri imbere.

Ati “Imyaka 30 tumaze rero ni ibintu byinshi tumaze gukora, ariko iyi ni imyaka 30 itubwira ngo ntabwo ubizima bwacu bumara imyaka 30 gusa ahubwo hari ibintu byinshi tubereyeho kugera imyaka myinshi... Hari abana benshi bavutse muri iyo myaka bagomba kuba batekereza imyaka 30 iri imbere n’indi iri mbere natwe abakuru kandi icyo bivuze ni ugutekereza gutyo kuko n’ubwo tuzaba tukiriho muri iyo myaka yose ariko hari abazaba bakiriho, ntabwo dukorera iyo myaka 30 ngo nirangira tuvuge ngo ni aho tugarukira ntabwo ariko abantu babaho, birumbikana rero ni ugukomeza kwiha agaciro, kugaha abandi no kugaha igihugu cyacu”


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
  • uwayo https://umuseke.rw/amp/turarakaye-twabuze-epfo-na-ruguru-abagore-babwira-paapa.html

    ">nsubize#Igiraneza https://umuseke.rw/amp/turarakaye-twabuze-epfo-na-ruguru-abagore-babwira-paap
  • IZINDI NKURU WASOMA
    Loading...