AMAKURU

UKWEZI

Umunyamakuru Shyaka Kanuma yafunguwe nyuma y’umwaka muri gereza

Umunyamakuru Shyaka Kanuma yafunguwe nyuma y’umwaka muri gereza
5-01-2018 saa 10:32' | By Akayezu Jean de Dieu | Yasomwe n'abantu 3267 | Ibitekerezo

Umunyamakuru Shyaka Kanuma, washinze Ikinyamakuru Rwanda Focus ndetse akaba yari n’umuyobozi mukuru wacyo, yafunguwe nyuma y’umwaka yari amaze ari muri gereza aho yari yarahamwe n’ibyaha birimo kunyereza imisoro.

Shyaka Kanuma wamenyekanye cyane mu itangazamakuru ryandika hano mu Rwanda yatawe muri yombi kuwa 31 Ukuboza 2016 aho yari akurikiranyweho ibyaha byo gukoresha impapuro mpimbano no kunyereza imisoro ndetse ibi byaha bikaba byaraje kumuhama ahita akatirwa igifungo cy’umwaka.

Ubushinjacyaha bwavuze ko Kanuma yanditse sheki akagenda ashyiraho amafaranga menshi atandukanye n’ayo asanzwe ahemba abakozi, akazishyira mu idosiye yahataniraga isoko muri Komisiyo y’Igihugu yo Gusezerera no Gusubiza mu buzima busanzwe ingabo zavuye ku rugerero, (RDRC), agira ngo ahuze n’ibyo iyo komisiyo yasabaga.

Iri soko yaje kuritsindira, bikavugwa ko ryari rifite miliyoni 44 z’amafaranga y’u Rwanda, byose ngo abikora abakozi batabizi.

Mu nyandiko mvugo bakoreshejwe n’Ubugenzacyaha, abatangabuhamya barimo Bamurange Annet wari umucungamutungo w’ikigo Focus Media Ltd cya Shyaka Kanuma, yavuze ko higanywe umukono we, bikorwa na Kanuma ngo washakaga amasoko mu buryo bw’ibanga.

Theophille Harushyamagara wari umunyamakuru ngo yasanze Kanuma yaramutanzeho sheki iriho ibinyoma, kuko yahembwaga 200 000 Frw, ariko kuri sheki asanga handitseho ko ahembwa 500 000 Frw. Undi witwa Mugisha Stevenson nawe ngo yemeje ko Kanuma yatanze sheki yanditseho ko amuhemba 500 000 Frw kandi yarakiraga 300 000 Frw.

Nyuma abakozi ngo baje kumenya ko Kanuma yasabishije isoko imishahara itari yo, bigera kuri komisiyo nayo ihita yitabaza ubushinjacyaha.

Ku cyaha cyo kutishyura umusoro, Ubushinjacyaha bwari bwavuze ko Kanuma yemera ko hari 65 256 589 Frw atishyuye, ariko agasobanura ko byatewe n’intege nke ziri mu mwuga w’itangazamakuru.

Nyuma Ikigo cy’Igihugu Gishinzwe Imisoro n’Amahoro, RRA, cyandikiye ishami rya Polisi rishinzwe ubugenzacyaha, CID, gisaba ko bakurikirana Kanuma ‘wari utangiye kwikuraho imitungo imwe n’imwe’, havuka impungenge ko atazishyura iyo misoro.

Mu iburanisha, Ubushinjacyaha bwamusabiye kuburana afunzwe kugira ngo akurikiranwe nta mpungenge ko yazabangamira ubutabera, cyangwa ngo abe yatoroka nk’uko ubwo yafatwaga bivugwa ko yari agiye kubikora.

Ubushinjacyaha bwavuze ko Kanuma yafatiwe i Kayonza acitse nyuma yo kwirindiriza ijoro, aho yari yabanje gusaba umushoferi ngo bagende bwije, bamaze kureba umupira. Kanuma we yasobanuye ko yari agiye i Nyagatare, akabanza kureba umupira wahuzaga Liverpool na Manchester City, ngo arebe ko Chelsea afana ikomeza kuzanikira zombi.

Umunyamakuru Shyaka Kanuma, washinze Ikinyamakuru Rwanda Focus

Ku wa 26 Ukuboza 2017 nibwo uyu mugabo yafunguwe ndetse kuri ubu akaba ari mu buzima busanzwe nk’uko byemejwe n’umuvugizi w’Urwego rw’igihugu rushinzwe Imfungwa n’abagororwa, CIP Sengabo Hillary.

Yagize ati “Kanuma yarekuwe kuwa 26 Ukuboza 2017 arangije igifungo cy’umwaka. Ni igifungo yakatiwe n’Urukiko Rwisumbuye rwa Gasabo, “ku cyaha yari akurikiranweho cyo gukoresha inyandiko irimo ibinyoma.”


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...