konka coffee
KONKA

AMAKURU

UKWEZI

Haracyari abataremera amateka mabi twanyuzemo bakiyagoreka - Minisitiri Uwacu

Haracyari abataremera amateka mabi twanyuzemo bakiyagoreka - Minisitiri Uwacu
5-04-2017 saa 06:09' | By Vincent Nsengiyumva | Yasomwe n'abantu 1831 | Ibitekerezo

Minisitiri w’Urubyiruko, umuco na Siporo Madamu Uwacu Julienne, yavuze ko hari abantu bagifite imyumvire yo kugoreka amateka, bahakana Jenocide yakorewe abatutsi mu Rwanda mu 1994, aho bahora barekereje bashaka kurusubiza mu icuraburindi.

Ibi Minisitiri Uwacu Julienne yabigarutseho kuwa Gatandatu tariki ya 01 Mata 2017, mu karere ka Nyagatare, umurenge wa Karangazi, ubwo yari yitabiriye umuganda wabereye mu rwuri rw’urubyiruko rwibumbiye mu muryango wa AERG/GAERG, akaba ari naho basozaga ibi bikorwa by’imiganda bamazemo ukwezi aho bazengurutse mu turere dutandukanye bakora ibikorwa birimo kubakira incike zitagiraga aho kuba, kubaka uturima tw’igikoni, gusanira abaturage amazu n’ibindi.

Minisitiri Uwacu yavuze ko hakiri abantu bifuza gusubiza u Rwanda mu mateka mabi rwanyuzemo, kandi ko abenshi babigaragaza cyane mu bihe nk’ibi byo kwibuka tugiye kwinjiramo.

Yagize ati “ Abifuza kudusubiza mu mateka ya Jenocide baracyahari, kandi bahaguruka iyo turi mu bihe byo kwibuka kugira ngo badufatiranye baduce intege. Ibi ntibikwiye kuduca intege ngo tureke gahunda yacu kwibuka ahubwo bikwiye kudutera imbaraga tugafatana urunaana tukabahagurukira tukabarwanya twivuye inyuma.”

Minisitiri Uwacu kandi yanakomeje ashimira uru rubyiruko rwa AERG na GAERG rudahwema gutanga umusanzu warwo mu kwiyubakira igihugu aho yavuze ko bari kugaragaza ishusho y’ubuzima bwiza bw’igihugu bw’ejo hazaza.

Perezida wa Ibuka Prof. Jean Pierre Dusingizemungu nawe wari waje kwifatanya nr’uru rubyiruko muri uyu muganda yashimiye cyane ibi bikorwa rumaze kugeraho anabasaba gukomeza gukora cyane

Prof. Dusingzemungu kandi yaboneyeho gusaba Minisiteri y’Uburezi kugira ibyo yakongera mu myigishirize y’amateka y’igihugu aho yasabye ko hakigwa uburyo amasomo yose yigishwa mu mashuri hashyirwamo n’irijyanye n’amateka ya Jenocide yakorewe abatutsi maze abana bakarushaho kubisobanukirwa aho kugira ngo bazajye babyigira ku ishyiga aho bamwe mu babyeyi bagoreka amateka bakababibamo inzangano.

Ku bwa Prof. Dusingizemungu yifuza ko aya mateka atagakwiye kwigishwa n’abarimu gusa, ko ahubwo hakagombye kujya hatumirwa n’inararibonye ndetse n’abasaza bafite ubumenyi kuri yo maze bakagera mu mashuri kunganira abarimu basanzwe bayigisha.

Guverineri w’Intara y’Uburasirazuba Madamu Judith Kazayire,nawe yashimiye uru rubyiruko rudahwema kugaragaza ibikorwa by’iterambere anarusaba kurushaho gukoresha imbaraga zarwo neza cyane ko u Rwanda ruzubakwa n’amaboko y’abana barwo kabone n’iyo amateka rwanyuzemo yatubabaza.

Yanasabye kandi uru rubyiruko kudapfusha ubusa amahirwe ruhabwa n’ubuyobozi bwiza bw’igihugu kuko ariyo bagomba kubakiraho igihugu.

Umuyobozi wa GAERG, Mazimpaka Olivier yavuze ko batazahwema gufatikanya n’igihugu mu bikorwa by’iterambere kuko nta mpamvu n’imwe yazabatera kwicara ngo bibagrwe imbaraga igihugu cyatakaje kugira ngo babeho.

Yagize ati “Ntitwadamarara ngo twibagirwe, ninayo mpamvu duhora dutekereza ku kurokoka kwacu maze bikadutera gushima.Twarirokokeye ariko twarokokeye n’igihugu cyacu.Ntituzahwema rero kugikorera.”

Uyu muganda wabereye mu Karere ka Nyagatare umurenge wa Karangazi mu rwuri rwa AERG na GAERG bahawe na Perezida wa Repubulika Paul Kagame, rukaba rufite ubuso bwa hegitari 130, rugizwe n’igiice cyororewemo amatungo agizwe n’inka 120, ihene 253ndetse hakaba hari n’igice cy’ubuhinzi aho bafte urutoki ruri kuri Hegitari 4 rw’insina zera ndetse na hegitari 3 ziteyeho insina zikiri kuzamuka, hakaba n’igice bahingamo imyaka yiganjemo ibigori.

Muri uru rwuri hakozwe umuganda wo gutema ibihuru ndetse no gutwara ifumbire ijyanwa mu rutoki.

Mu bikorwa uru rubyiruko rwakoze muri iki uku kwezi, harimo inzu 4 zubakiwe abatishoboye batari bafite aho kuba, uturima tw’igikoni 25 natwo twubakiwe abaturage batandukanye, boroje inka imiryango itandukanye, basaniye abatishoboye amazu n’ibindi.

Guverineri Judith Kazayire ashimira urubyiruko rwibumbye muri AERG/GEARG

Perezida wa Ibuka Prof. Dusingizemungu arasaba kongera imbaraga mu myigishirze y’Amateka ya Jenocide yakorewe abatutsi mu mashuri

Umuyobozi w’ingabo mu mujyi wa Kigali n’Intara y’Uburasrazuba Gen Mubaraka Muganga nawe yitabiriye uyu muganda

Umuyobozi wa GAERG,Mazimpaka Olivier yavuze ko batazahwema gutanga umusanzu mu kubaga u Rwanda


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...