konka coffee
KONKA

AMAKURU

UKWEZI

Perezida Kagame yashyikirijwe ububasha nk’umuyobozi wa AU, agaragaza ibyo azibandaho

Perezida Kagame yashyikirijwe ububasha nk’umuyobozi wa AU, agaragaza ibyo azibandaho
29-01-2018 saa 00:04' | By Akayezu Jean de Dieu | Yasomwe n'abantu 2743 | Ibitekerezo 1

Kuri iki Cyumweru tariki 28 Mutarama 2018, Perezida wa Repubulika y’u Rwanda, Paul Kagame yashyikirijwe ububasha bwo kuba umuyobozi w’Umuryango wa Africa Yunze Ubumwe mu gihe cy’umwaka umwe, aho yahise yizeza Afurika ko uyu mwaka uzarangira ikibazo cy’isoko rimwe no kwishyira ukizana kw’urujya n’uruza rw’abanyafurika ku mugabane wabo gikemutse.

Perezida Kagame asimbuye kuri uyu mwanya Perezida wa Guinea Alpha Condé wayoboye Africa yunze ubumwe mu mwaka ushize wa 2017.

Perezida Kagame agiye kuyobora Africa mu gihe itangiye gushyira mu bikorwa amavugurura ubwe yateguye, aya mavugurura agamije kuvugurura imikorere y’umuryango wa Africa yunze ubumwe ikaba umuryango ufite uruhare mu mibereho n’iterambere rya africa aho kubitega imuhana.

Alfred Ndoumbe wavuze mu izina rya ba Ambasaderi b’abanyafrika i Addis Ababa yavuze ko aba bayobozi bashya bagiye kuyobora africa mu gihe kigoye, kandi bategerejweho gushyira mu bikorwa amavugurura y’umuryango wa Africa yunze ubumwe nk’inkingi y’ejo hazaza ha Africa. Akazi bazakora ngo niko kazasubiza agaciro africa ubu isuzuguritse kubera ibibazo bitandukanye iri guhura nabyo ariko nta kinini yabikoraho.

Mu ijambo yagejeje ku bitabiriye inama ya 30 y’umuryango wa Africa yunze ubumwe, Perezida Paul Kagame yashimiye ikizere akomeje kugirirwa na Africa.

Ati “Mwarakoze kunyizera mbere mumpa kuyobora amavugurura y’umuryango wa Africa yunze ubumwe, none n’ubu mu mpaye kuyobora umuryango wacu. Ndabasezeranya kuzafatanya namwe, no gukora akazi keza gashoboka, kandi nzakenera ubufasha bwanyu.”

Kagame yavuze ko imbogamizi ikomeye africa ifite ari ugushyiraho ikerekezo kiganisha abaturage ku iterambere rirambye, by’umwihariko abakiri bato.
Yavuze ko mu bindi bice by’isi iri terambere ryagezweho binyuze mu rwego rw’inganda, ariko ngo bene izi nzira z’iterambera nk’izahinduye Asia ntizigishoboka kuri africa ku kubera yamaze igihe kinini ntacyo ikora.

Ati “Twarakererewe cyane, tugomba gukora byihuse kugira ngo dukure Africa mu bukene bw’akarande. Kwaguka ni nombwa, tugomba gushyiraho isoko rimwe rya Africa, tugahuza ibikorwaremezo, kandi tukinjiza ikoranabuhanga mu bukungu bwacu. Nta gihugu cyangwa akarere kagira icyo kageraho konyine, tugomba gukorera hamwe.”

Kagame yavuze ko africa ifite imitungo n’imbaraga byo kubakiraho, ati “duhereye kuri uyu muryango, n’intego zawo zikomeye z’ubumwe. Aya ni amahirwe utundi duce tw’isi tudafite cyane.”

Aha, yavuze ko ubumwe bugomba kuba intangiriro ya byose mu kongera gusobanura imigambi na gahunda za Africa ku rwego rw’umugabane. Kandi ngo izi mpinduka zirakenewe kuko nta gihugu na kimwe kuri uyu mugabane wacu kidakeneye kuba muri Africa ifite ijambo.

Ati “Hari agaciro gakomeye muri gahunda zitandukanye z’umuryango wa Africa yunze ubumwe nk’ikerekezo ‘Agenda2063’. Kubera kureba kure kwabo (abayobozi bamubanjirije), tugiye kumvikana ku masezerano atatu azasigara akomeye, afite agaciro gakomeye kuko azafasha africa kuba ubukungu buyiturutsemo.”

Perezida Kagame yahise atangaza ko uyu munsi batangiza isoko rimwe ry’ubwikorezi bwo mu kirere “Single African Air transport market”; kubwe, ngo iyi ni intambwe ikomeye ku bwikorezi.

Ati “Turi hafi gushyiraho isoko rimwe (continental free trade area) kandi bikeneye gukorwa uyu mwaka. Korohereza urujya n’uruza rw’abantu (freedom of movement of people) muri africa nabyo ni ngombwa kandi bizagerwaho muri 2018.”

Perezida Kagame kandi yasabye urubyiruko kwigira ku babyeyi babo bagakora cyane kugira ngo batazabaho ubuzima nk’ubwo babayemo, ndetse abwira abayobozi ba Africa ko akazi kabo ari ugukora uko bashoboye abanyafurika b’ubu n’ab’ahazaza bakabaho mu buzima bwiza kuruta ubw’abababanjirije.

Ati “Rubyiruko rw’abanyafurika mufite inshingano namwe, ntabwo twakubaka africa twenyine tutabafite. Dukwiye guha kandi n’abagore uburenganzira bwabo bakwiye.”

Muri iki gihe cy’umwaka umwe, Perezida Kagame azaba yungirijwe n’abandi ba
Perezida barimo umuyobozi wa Libya Fayez Mustafa al-Sarraj, Jacob Zuma wa Africa y’Epfo, Denis Sassou Nguesso wa Congo Brazzaville, Idriss Déby Itno wa Tchad, na Alpha Condé wa Guinea.


INKURU ZA :
Tanga Igitekerezo
Ibitekerezo 1
Etienne Kuya 29-01-2018

Ni byiza cyane kdi ni ibyagaciro kuko intumbero y’Africa igezweho.Kuko ibonye umuyobozi w’umushishozi muri byose .

IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...