konka coffee
KONKA

AMAKURU

UKWEZI

Abanyamuryango ba RPF muri Giheka basuye urwibutso rwa Jenoside rwa Nyamata- Amafoto

Abanyamuryango ba RPF muri Giheka basuye urwibutso rwa Jenoside rwa Nyamata- Amafoto
18-06-2018 saa 11:14' | By Akayezu Jean de Dieu | Yasomwe n'abantu 1497 | Ibitekerezo 1

Abanyamuryango ba RPF Inkotanyi bo mu mudugudu wa Giheka biganjemo urubyiruko basuye urwibutso rwa Jenoside rwa Nyamata basobanurirwa amateka yihariye yaranze Jenoside muri aka gace n’uburyo imbaga y’abatutsi bari bahungiye muri Kiliziya ya Nyamata bishwe urw’agashinyaguro n’interahamwe zabateyemo za gerenade zigasubira inyuma zigahorahoza abanze gushiramo umwuka zikoresheje intawo gakondo zirimo ubuhiri n’imihoro.

Aba banyamuryango ba RPF Inkotanyi bo mu mudugudu wa Giheka wo mu kagari ka Kagugu, Umurenge wa Kinyinya, mu karere ka Gasabo, Umujyi wa Kigali, biganjemo urubyiruko rushamikiye ku rugaga rw’Umuryango RPF Inkotanyi basuye uru rwibutso rwa Nyamata kuri iki Cyumweru tariki 17 Kamena 2018.

Umukozi wa Komisiyo y’Igihugu yo Kurwanya Jenoside (CNLG) , wabakiriye ku rwibutso, yabasobanuriye amateka ya Jenoside yakorewe Abatutsi, by’umwihariko kuri iyi kiliziya ya Nyamata. Yanabatambagije kandi abasobanurira ibice bitandukanye bigizwe uru rwibutso rwa Nyamata.

Nyuma yo gusobanurirwa ibyaranze Jenoside yakorewe Abatutsi by’umwihariko abiciwe aha kuri kiliziya ya Nyamata, bamwe mu rubyiruko bitabiriye iki gikorwa bavuze ko bungutse byinshi ku mateka ya Jenoside ndetse bamwe bahamya ko babonye gihamya y’uko Jenoside yakorewe abatutsi yabaye kandi yari yateguwe.

Shimwamana Juventine w’imyaka 16 y’amavuko, yagize ati “Hari ibyo mbonye hano nabonaga kuri televiziyo gusa nk’imibiri, imyenda, n’ibindi. Icyo nungutse hano ni amateka yandi mashya ntari nzi nungutse wenda n’ukuntu ntazakora Jenoside nkarwanya abantu bandi baba bashaka kuyikora”

Iradukunda Josiane w’imyaka 20 y’amavuko we yagize ati “Nkanjye icyo binsigiye bitumye numva ko hari abantu bazize Jenoside kandi bari bagikeneye ubuzima bari bafite na byinshi byo gukora rero icyo binyigishije ngiye gukoresha amahirwe mfite kugira ngo ngere kubyo nifuza” Iradukunda Josiane w’imyaka 20 y’amavuko yavuze ko yungukiye byinshi kuri uru rwibutso rwa Jenoside rwa Nyamata

Umuyobozi w’urugaga rw’urubyiruko rushamikiye ku muryango RPF Inkotanyi muri uyu mudugudu wa Giheka, Sibomana Athanase yavuze ko batahanye byinshi aho bagiye kwigisha urundi rubyiruko rutagize amateka yo kugera aha.

Nayihayiki Francois, Chairman w’Umuryango RPF Inkotanyi muri uyu mudugudu wa Giheka yavuze ko bateguye iki gikorwa bagamije kwigisha urubyiruko amateka y’igihugu cyabo bakamenya iby’amahano yabaye mu gihugu ndetse bakabarema umutima babereka ko ibyabaye bitazongera kubaho ukundi kuko igihugu kiyobowe neza kirangajwe imbere n’Umuryango RPF Inkotanyi.

Madamu Niwemugeni Chantal, waje ahagarariye Umuryango RPF Inkotanyi mu murenge wa Kinyinya yavuze ko uburyo bwiza bwo kwigisha urubyiruko amateka ari ukubazana nk’uku bagasura inzibutso ndetse bakanaganira n’abarinzi b’ibihango dore ko muri uyu mudugudu wa Giheka barimo cyane ko hari amateka y’uko uyu mudugudu mu gihe cya Jenoside wabashije kunga ubumwe abahigwaga bakishyira hamwe n’abahigaga.

Yagize “Umudugudu wa Giheka wagerageje kwirwanaho ukumira n’ibitero byabashaka kuza biwinjiramo ngo bikore ibara, umudugudu ku bumwe bw’abari bawutuye bishyira hamwe bashyiraho bariyeri ikumira kugira ngo hatagira uwinjira iwabo, ibyo rero kugira ngo urubyiruko rubimenye kuko abenshi ni abana bavutse nyuma ya Jenoside ni uko bagenda baganira n’ababyeyi babo bakababwira amateka y’igihugu cyabo”

Yakomeje agira ati “Bakanareba hirya no hino uko mu yindi midugudu amateka yo muri Jenoside yagiye aharanga bakanasuza inzibutso ariko by’umwihariko Leta igira gahunda nziza aho igira abarinzi b’igihango, batanze urugero rwiza bakoze ibikorwa by’indashyikirwa mu gihe cya Jenoside no mu mudugudu wa Giheka abarinzi b’igihango barimo bagomba gukumbuza urubyiruko gukora ibikorwa by’ubutwari” Madamu Niwemugeni Chantal,usanzwe ari n’umucungamutungo wa koperative Sacco ya Kinyinya yavuze ko kwigisha urubyiruko amateka bizafasha mu kugira u Rwanda rw’ejo ruziririza Jenoside n’ingengabitekerezo yayo


Urwibutso rwa Jenoside rwa Nyamata

Mu 1959 na 1960, Abatutsi bavanywe mu duce dutandukanye tw’igihugu bajyanwa gutura i Nyamata ku ngufu, agace karangwaga n’ishyamba ry’inzitane ndetse n’isazi ya Tsetse. Impamvu yatumye bazanwa hano ntabwo zari impuhwe ahubwo kwari ukugira ngo baribwe n’uyu mubu wa Tsese. Mu 1980, bamaze kuhatunganya no kuhagira heza, hubatswe Kiliziya.

Mu 1994, Abatutsi baje guhungira muri iyo kiliziya ari naho Interahamwe zabasanze zibaminshamo amagerenade, abandi zibabaga n’imihoro, bicishwa amahiri.

Nk’uko mu myaka yabanje muri za 1959, Kilziya na za Misiyone byafatwaga nk’ahantu hera ari nayo mpamvu mu gihe cya Jenoside abatutsi benshi bakundaga guhungira muri za kiliziya kuko bahafataga nk’ahantu hera ntawabahasanga ngo abice.

Abatutsi ba mbere bageze muri iyi kiliziya ya Nyamata ku itariki 7, ariko ku itariki ya 13 Mata nibwo haje igitero cy’interahamwe n’abasirikare bari aba leta ya Habyarimana, baje bafite imbunda, za gerenade, n’izindi ntwaro gakondo zirimo amahiri n’imihoro.

Abicanyi bageze aha kuri kiliziya ya Nyamata basanga imbaga y’abatutsi bari bahungiye muri kiliziya n’abandi bari bari hanze mu mazu y’abapadiri. Icyo gihe abicanyi babanje gutera amagerenade mu kiliziya, zica abari bari hanze zirangije zinjira mu kiliziya zijya guhorahoza abari bagihumeka (Abo gerenade zitari zishe neza).

Nyuma y’imishyikirano hagati ya Kiliziya Gatolika na Leta y’u Rwanda , iyo kiliziya n’aho yubatswe habaye urwibutso rwa Jenoside yakorewe Abatutsi. Urwo rwibutso rugizwe n’aho abakirisitu bicaraga ubu hakaba hari imyenda abishwe bari bambaye ,ibikoresho abicanyi bakoresheje birimo imihoro, amacumu, ibyuma n’ibindi. Uhasanga n’amashapule abishwe bari bambaye. Muri “cave” hari imibiri y’abishwe muri Jenoside yakorewe Abatutsi ikaba iri mu birahure biyikingiye ariko bitayibuza kugaragara.

Iruhande rw’iyi kiliziya kandi hari imva ya Antonia Locateli, umubikira w’umutaliyani kazi wishwe arashwe ku itariki ya 9 Werurwe 1992, nyuma yo gutanga amakuru kuri Radiyo mpuzamahanga y’Abafaransa (RFI) ndetse n’iy’Abongereza (BBC) yamagana iyicwa ry’Abatutsi ryari rimaze guhitana abasaga 500 mu cyumweru kimwe . Umuyobozi w’urugaga rw’urubyiruko rushamikiye ku muryango RPF Inkotanyi muri uyu mudugudu wa Giheka, Sibomana Athana
Nayihayiki Francois, Chairman w’Umuryango RPF Inkotanyi muri uyu mudugudu wa Giheka
Madamu Niwemugeni Chantal, waje ahagarariye Umuryango RPF Inkotanyi mu murenge wa Kinyinya
Abiganjemo urubyiruko rushamikiye ku rugaga rw’umuryango RPF Inkotanyi nibo bitabiriye iki gikorwa bataha umukoro nyuma yo gusobanurirwa ibyaranze Jenoside muri iyi kiliziya ya Nyamata

Basobanuriwe ubwicanyi ndengakamere bwabereye muri iyi kiliziya benshi mu rubyiruko bamenya uburemere Jenoside yakoranywe ndetse n’uburyo yari yarateguwe
Banasobanuriwe uburyo Antonia Locateli, umubikira w’umutaliyani yihswe arashwe azira gutabariza Abatutsi bari barimo gukorerwa iyicarubozo
Bashyize indabo ndetse bunamira imva ziruhukiyemo imibiri y’inzirakarengane zishwe muri Jenoside


INKURU ZA :
Tanga Igitekerezo
Ibitekerezo 1
nayihayiki François Kuya 20-06-2018

ibibikowa nibyingenzi kugirango urubyiruko rusobanukirwe aho twavuye.banamenye ahotujya ko ariheza kandi babigizemo uruhare.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...