AMAKURU

UKWEZI

Abo muri UR ishami rya Rukara bakozwe ku mitima n’ibyo bumviye ku rwibutso rwa Kiziguro

Abo muri UR ishami rya Rukara bakozwe ku mitima n’ibyo bumviye ku rwibutso rwa Kiziguro
11-04-2018 saa 11:04' | By Muhire Aime Placide | Yasomwe n'abantu 1603 | Ibitekerezo 3

Abayobozi n’abanyeshuri ba Kaminuza y’u Rwanda Ishami ry’Uburezi riri i Rukara mu karere ka Kayonza Intara y’Uburasirazuba, basuye urwibutso rwa Jenoside yakorewe Abatutsi muri Mata 1994, ruherereye mu Karere ka Gatsibo, mu murenge wa Kiziguro ahahoze ari muri Komini Murambi, bunamira imibiri y’inzirakarengane ziruhukiye muri uru rwibutso ,bumva ubuhamya bwa bamwe mu baharokokeye bwakoze ku mitima y’aba banyeshuri.

Iki gikorwa cyabaye kuri uyu 10 Mata 2018, aho abayobozi ndetse n’abanyeshuli bahagarariye abandi muri Kaminuza y’u Rwanda, Koleji y’Uburezi; Ishami rya Rukara basuye urwibutso rwa Jenoside yakorewe Abatutsi ruherereye mu Karere ka Gatsibo, mu murenge wa Kiziguro ahahoze ari muri Komini Murambi cyangwa se mu Buganza bwa cyera.

Uru rwibutso, ni rumwe muri nyinshi zibitse amateka ateye ubwoba y’u Rwanda bitewe n’ubwicanyi bw’indengakamere bwakorewe inzirakarengane muri Jenoside yakorewe abatutsi muri Mata 1994.

Iki gikorwa cyatangijwe n’isengesho rishimira Imana ku ntambwe u Rwanda rumaze gutera ndetse banasabira imibiri y’Abatutsi bazize Jenoside ishyinguye muri uru rwibutso.

Aba Banyeshuli n’Abayobozi muri Kaminuza y’ u Rwanda basobanuriwe amateka yaranze U Rwanda uhereye mbere y’Ubukoloni ukagera igihe Jenoside yakorewe Abatutsi yabereye. Nk’uko byasobanuwe, mbere y’umwaduko w’Abakoroni imibanire y’Abanyarwanda yari nta makemwa. Ni amateka maremare; uhereye mu w’1959 Abatutsi bicwa kugera 1994 ubwo Jenoside yari yarateguwe n’Ubuyobozi bubi bwariho icyo gihe yashyirwaga mu bikorwa.

Nyuma yo kunamira inzirakarengane za Jenoside yakorewe Abatutsi zishyinguwe mu Rwibutso rwa Kiziguro no gushyira indabyo ku mva, abanyeshuli n’abakozi ba Kaminuza y’u Rwanda beretswe imva ishyinguwemo imibiri y’inzirakarengane yagiye yimurwa ikuwe ahantu hatandukanye maze ishyingurwa mu cyubahiro muri uru rwibutso rushyinguyemo imibiri isaga 1000.

Bamaze gusura ndetse no gushyira indabyo ku mva bakomeje gutemberezwa ibice bitandukanye bigize Urwibutso berekwa urwobo rufite metero 30 z’ubujyakuzimu rwajugunywagamo imibiri y’Abatutsi babaga bamaze kwicwa. Uru rwobo rwari rwaracukuwe ahagana mu w’1985, ku itegeko ry’Abapadiri bashakaga amazi kuko yari yarabuze muri kariya gace nk’uko twabitangarijwe n’ubuyobozi bw’umurenge wa Kiziguro.

Patricie, umwe mu barokokeye muri uyu murenge wa Kiziguro nawe wajugunywe muri urwo rwobo mu buhamya bwe bwakoze ku mitima ya benshi yavuzemo inzira y’umusaraba yanyuzemo muri biriya bihe.

Yagize ati “ Ubwo Jenoside yatangiraga, abantu benshi bahungiye ku Kiliziya kuko ariho bari bizeye amakiriro cyane ko batekerezaga ko mu nzu y’Imana nta nabi yahagirirwa nyamara siko byaje kugenda. Interahamwe zarazaga zikica abantu umwe kuri umwe maze bakabwira undi bati ‘kurura iyo ntumbi uyijyane ku rwobo’, maze wahagera nawe bagahita bakwica bakabajugunyamo mwembi.”

Yakomeje agira ati “Wamanukaga haruguru upfutswe igitambaro mu maso ku buryo utari kumenya bamwe muri zo Nterahamwe. Byakomeje bityo, gusa ngo hari uwazana umurambo maze agahita asimbukira mu rwobo akiri muzima cyangwa se yakomeretse ariko atarashiramo umwuka, umuhoro akaba awurokotse atyo.”

Patricie avuga ko yagize amahirwe yo kugera muri urwo rwobo rwajugunywagamo imirambo y’abatutsi ari muzima maze arumaramo icyumweru cyose ibintu avuga ko bikimushegesha umutima kugeza magingo aya.

Yavuze ko kubera inzara n’inyota bahuriye nayo muri urwo rwobo ku bari bakirimo akuka, ngo bageragezaga gufata itaka akaba ariryo barya kugira ngo igifu gikomeze gikore barebe ko iminsi yakomeza kwicuma.

Ubwo Ingabo zari iza RPA zamaraga guhagarika Jenoside, icyobo cya metero 30 cyari cyimaze kuzura imibiri y’Abatutsi gusa ku bw’amahirwe abantu 11 barokokeye aho.

Bamwe bavuyemo batabona kubera kumara iminsi myinshi nta rumuri, abandi ntibavugaga n’aho abandi bafite ibibazo bitandukanye byakomeje no kugira ingaruka mbi ku buzima bwabo kuko ubu 6 muri 11 bamaze kwitaba Imana bazira zimwe mu ngaruka bakuye muri urwo rwobo zakurikiranye ubuzima bwabo nk’uko Patricie yakomeje kubigarukaho mu buhamya bwe.

Tharcisse Rutayisire w’imyaka 63 nawe warokokeye kuri urwo rwobo yavuze ko ubuzima bugoye baciyemo bakamara iminsi igera kuri irindwi mu rwobo bajugunyagamo imirambo y’abatutsi ku buvuga bitoroheye uwabubayemo.

Yagize ati “Ni ubuzima burebure, mbivuze n’iminsi 2 yashira. Ubwo imibiri yamaraga kubora, Interahamwe zamanukanaga ibitiyo zikagaragura ariko uko narokotse ni igitangaza. Kuwa 10 Mata nibwo Inkotanyi zatabaye abarokotse uru rwobo.”

Rutayisire yaboneyeho gusaba ababyeyi gukangurira kumenya amateka yaranze U Rwanda ndetse afatanya n’Abanyarwanda muri rusange gushimira Ingabo za RPF Inkotanyi zahagaritse Jenoside.

Dr Karangwa wari waje ahagarariye Ubuyobozi bwa Kaminuza y’ U Rwanda yibukije Abanyeshuli ko abantu bitwaga ko bajijutse aribo bagize uruhare runini mu gutegura Jenoside no gushyira mu bikorwa Jenoside yakorewe Abatutsi aboneraho kubasaba kugira amahitamo meza agamije kubaka igihugu no kukigarurira isura nziza cyane ko aribo mbaraga zacyo nk’urubyiruko.

Yanashimangiye ko Kwibuka Jenoside yakorewe Abatutsi ari igikorwa kizahoraho kugera ku mpera y’isi nk’uko Nyakubahwa Perezida wa Repubulika yabivuze ubwo hatangizwaga icyumeru cyahariwe Kwibuka Jenoside yakorewe Abatutsi. Abayobozi n’abanyeshuri ba Kaminuza y’u Rwanda ishami ry’Uburezi riri i Rukara muri Kayonza basuye Urwibutso rwa Kiziguro basobanurirwa byinshi ku nzirakarengane zihashyinguye
Basobanuriwe iby’ubwicanyi ndengakamere bwabereye muri Gatsibo, bahava biyemeje kurwanya ingengabitekerezo ya Jenoside



INKURU ZA :
Tanga Igitekerezo
Ibitekerezo 3
Rutaganira Desire Kuya 11-04-2018

Ariko abantu babeshya ngo bacukuye urwobo bavuga muri iyi iyi nkuru bashaka amazi bagiye bavugisha ukuri ,bakanemerako kiriziya agize uruhare mu gucura umugambi wo kurimbura abatutsi ifatanije na leta,hariya hantu wahabona amazi koko nubwo wacukura metero ijana?
Baxukuye uriya mwobo bazi icyo bazawukoresha ntibakabeshye abanyarwanda bikuraho igisebo.

Rutaganira Desire Kuya 11-04-2018

Ariko abantu babeshya ngo bacukuye urwobo bavuga muri iyi iyi nkuru bashaka amazi bagiye bavugisha ukuri ,bakanemerako kiriziya agize uruhare mu gucura umugambi wo kurimbura abatutsi ifatanije na leta,hariya hantu wahabona amazi koko nubwo wacukura metero ijana?
Baxukuye uriya mwobo bazi icyo bazawukoresha ntibakabeshye abanyarwanda bikuraho igisebo.

Rutaganira Desire Kuya 11-04-2018

Ariko abantu babeshya ngo bacukuye urwobo bavuga muri iyi iyi nkuru bashaka amazi bagiye bavugisha ukuri ,bakanemerako kiriziya agize uruhare mu gucura umugambi wo kurimbura abatutsi ifatanije na leta,hariya hantu wahabona amazi koko nubwo wacukura metero ijana?
Baxukuye uriya mwobo bazi icyo bazawukoresha ntibakabeshye abanyarwanda bikuraho igisebo.

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...