AMAKURU

UKWEZI
ubumwe

Amb. Nduhungirehe yanyomoje ko ‘Camille Nkurunziza’ wiciwe muri Afurika y’ Epfo yahoze arinda Perezida

Amb. Nduhungirehe yanyomoje ko ‘Camille Nkurunziza’ wiciwe muri Afurika y’ Epfo yahoze arinda Perezida
6-06-2019 saa 16:44' | By Nsanzimana Ernest | Yasomwe n'abantu 3584 | Ibitekerezo

Umunyamabanga wa Leta muri Minisiteri y’ Ububanyi n’ amahanga Amb. Olivier Nduhungirehe yavuze ko Camille Nkurunziza atigeze aba umurinzi wa Perezida habe n’ umunsi umwe.

Camille Nkurunziza wigeze kuba umusirikare mu ngabo z’ u Rwanda , inkuru y’ urupfu rwe yakemenyekanye tariki 31 Gicurasi 2019. Amakuru atangazwa na Leta y’ u Rwanda n’ umuryango wa nyakwigendera avuga ko Nkurunziza yarashwe n’ abapolisi bo muri Afurika y’ Epfo.

Ubwo inkuru y’ urupfu rwa Nkurunziza yatangazwaga hari ibinyamakuru byatangaje ko nyakwigendera yahoze ari umurinzi wa Perezida Kagame.

Amb. Nduhungirehe mu butumwa yashyize kuri Twitter yavuze ko Camille Nkurunziza atigeze aba mu bashinzwe kurinda umutekano w’ abayobozi (Republican Guards).

Yagize ati “Amakuru aturuka ahantu hizewe ni uko Nkurunziza yinjiye muri RPA mu 1994 ukavamo muri 2000. [...] Ntabwo yigeze aba RG(Republican Guard) habe n’ umunsi umwe, nk’ uko bigaragazwa n’ amakuru abitse. Mu myaka 6 yamaze muri RPA yakoraga ku kibuga cy’ indege I Kanombe muri Gendarmerie".

Camille Nkurunziza yishwe amaze imyaka 8 ahungiye muri Afurika y’ Epfo. Umugore wa nyakwigendera Aneth Kabasindi avuga ko umugabo we yahoraga yibombaritse kuko yahoranaga impungege z’ umutekano we.

Kabasindi avuga ko abapolisi bo muri Afurika y’ Epfo bamubwiye ko kuri uyu wa Gatatu tariki 5 Kamena aribwo bakoze iperereza ku iyicwa ry’ umugabo we, ngo bamubwiye ko bamutangariza icyavuyemo.

Amb. Nduhungirehe avuga ko Camille Nkurunziza yahoze mu mutwe wa Kayumba Nyamwasa RNC, akaza kuwuvamo akajya muri FLN ya Callixte Sankara. Avuga kandi ko yarashwe agerageza kurwanya abapolisi akoresheje icyuma.

Umugore wa Camille Nkurunziza wiciwe i Cape Town yavuze iby’undi warashwe aje mu kiriyo


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...